ଜେନାପୁର/ଧର୍ମଶାଳା, ୧୫।୫ (ଡି.ଏନ୍.ଏ.)- ଧର୍ମଶାଳା ବ୍ଲକ ଅଧୀନ କବାଟବନ୍ଧ ସରକାରୀ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଶୁକ୍ରବାର ଜଣେ ଗର୍ଭବତୀଙ୍କ ସନ୍ଦେହଜନକ ମୃତ୍ୟୁ ଘଟିଛି। ସେ ହେଲେ ଜେନାପୁର ଥାନା ଅଧୀନ ବଳଭଦ୍ରପୁର ଗ୍ରାମର ପ୍ରଫୁଲ୍ଲ ବେହେରାଙ୍କ ସ୍ତ୍ରୀ ପଦ୍ମାବତୀ ବେହେରା। ପଦ୍ମାବତୀଙ୍କୁ ଶାଶୁଘର ଲୋକେ ଯୌତୁକ ପାଇଁ ହତ୍ୟା କରିଥିବା ତାଙ୍କ ଭାଇ ପ୍ରମୋଦ ରାଉଳ ଥାନାରେ ଅଭିଯୋଗ କରିଛନ୍ତି। ୩ବର୍ଷ ପୂର୍ବେ ପଦ୍ମାବତୀ ବଳଭଦ୍ରପୁରର ପ୍ରଫୁଲ୍ଲଙ୍କୁ ବିବାହ କରିଥିଲେ। ଏହାପରେ ବିଭିନ୍ନ ସମୟରେ ଶାଶୁଘର ଲୋକେ ତାଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଉଥିଲେ। ତେବେ ସେମାନେ ହିଁ ପଦ୍ମାବତୀଙ୍କୁ ହତ୍ୟା କରିଥିବା ପ୍ରମୋଦ ଏତଲାରେ ଦର୍ଶାଇଛନ୍ତି। ଏ ନେଇ ୧୪୦/୨୦ ନଂ.ରେ ମାମଲା ରୁଜୁ କରାଯାଇ ମୃତଦେହ ବ୍ୟବଚ୍ଛେଦ ପାଇଁ ଯାଜପୁର ଟାଉନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଥିବା ପୋଲିସ ସୂତ୍ରରୁ ପ୍ରକାଶ। ଅନ୍ୟପଟେ ପୋଲିସ ପ୍ରଫୁଲ୍ଲ ଓ ତାଙ୍କ ସାନ ଭାଇଙ୍କୁ ଅଟକ ରଖି ପଚରାଉଚୁରା କରୁଛି।
ଶାଶୁଘର ଲୋକଙ୍କ କହିବା ଅନୁସାରେ, ପଦ୍ମାବତୀଙ୍କ ଦେହ ଅସୁସ୍ଥ ହେବାରୁ ସେମାନେ ଆମ୍ବୁଲାନ୍ସକୁ ଫୋନ୍ କରିଥିଲେ। ମାତ୍ର ଆମ୍ବୁଲାନ୍ସ ଆସିବାରେ ବିଳମ୍ବ ହେବାରୁ ପ୍ରାଇଭେଟ ଗାଡ଼ି ଯୋଗାଡ଼ ପାଇଁ ଚେଷ୍ଟା କରିଥିଲେ। ହେଳେ ଲକ୍ଡାଉନ୍ ସକାଶେ ଗାଡ଼ି ନ ମିଳିବାରୁ ପ୍ରଫୁଲ୍ଲ ଓ ତାଙ୍କ ଭାଇ ପଦ୍ମାବତୀଙ୍କୁ ବାଇକ୍ରେ କବାଟବନ୍ଧ ପ୍ରାଥମିକ ସରକାରୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
