ପୁରୁଷୋତ୍ତମପୁର, ୧୭।୩(ଡି.ଏନ୍.ଏ.): ମାରାତ୍ମକ କରୋନା ଭାଇରସକୁ ନେଇ ଗଞ୍ଜାମ ଜିଲାରେ ୧୪୪ ଧାରା ଜାରି କରାଯାଇଛି। ୫ ଜଣରୁ ଅଧିକ ଲୋକ ଗୋଟିଏ ସ୍ଥାନରେ ଗହଳି ନେଇ କଟକଣା ଜାରି କରାଯାଇଛି। ହେଲେ ବିଭିନ୍ନ ପଞ୍ଚାୟତରେ ଏମ୍ଜିଏନ୍ଆର୍ଜିଏସ୍ ଯୋଜନାରେ ଚାଲିଥିବା କାର୍ଯ୍ୟରେ ବହୁ ସଂଖ୍ୟାରେ ଶ୍ରମିକ ଏକତ୍ରିତ ହୋଇ ଗହଳିପୂର୍ଣ୍ଣ ଭାବେ କାର୍ଯ୍ୟ କରୁଛନ୍ତି। ଶିକୁଳା ପଞ୍ଚାୟତ ଶିକୁଳା ଗ୍ରାମରେ ଥିବା ଭଗବତ ଗାଡିର ପୁନରୁଦ୍ଧାର କାର୍ଯ୍ୟ ଚାଲିଥିବା ବେଳେ ବଡ ବରଗାଁ ପଞ୍ଚାୟତ ତେନ୍ତୁଳିଆ ବନ୍ଧ, ନୂଆଗାଁ ବନ୍ଧର ପୁନରୁଦ୍ଧାର କାର୍ଯ୍ୟ ଚାଲିଛି। ଏହାକୁ ନେଇ ବଡ ବରଗାଁ ପଞ୍ଚାୟତ ନିର୍ବାହୀ ଅଧିକାରୀ ଅରକ୍ଷିତ ସାସମଲଙ୍କ ସହ ଯୋଗାଯୋଗ କରାଯିବାରୁ ଏଥିପାଇଁ ଜିଲା ପ୍ରଶାସନ ନିକଟରୁ କୌଣସି ନିର୍ଦ୍ଦେଶନାମା ଆସି ନ ଥିବା ସେ କହିଛନ୍ତି। ଶିକୁଳା ପଞ୍ଚାୟତ ନିର୍ବାହୀ ଅଧିକାରୀ ରମେଶ ଚନ୍ଦ୍ର ଗୌଡ ମଧ୍ୟ ଅନୁରୂପ ଭାବେ କହି ନିର୍ଦ୍ଦେଶ ଆସିଲେ ବନ୍ଦ କରିଦେବୁ ବୋଲି କହିଛନ୍ତି।
