ନୂଆଦିଲ୍ଲୀ, ୨୮ା୫(ପି.ଟି.)- ଦେଶର ସର୍ବୋଚ୍ଚ ଖେଳରତ୍ନ କ୍ରୀଡ଼ା ପୁରସ୍କାର ପାଇ ସାରିଥିଲେ ହେଁ ଏକ ଅପ୍ରତ୍ୟାଶିତ ଘଟଣାକ୍ରମରେ ଭାରତୀୟ ଭାରୋତ୍ତୋଳନ ସଂଘ (ଆଇଡବ୍ଲ୍ୟୁଏଲଏଫ)ପକ୍ଷରୁ ତାରକା ଭାରୋତ୍ତୋଳିକା ମିରାବାଇ ଚାନୁଙ୍କ ନାମ ଅର୍ଜୁନ ପୁରସ୍କାର ପାଇଁ ସୁପାରିସ କରାଯାଇଛି। ଚାନୁ ୨୦୧୮ରେ ଭାରତୀୟ କ୍ରିକେଟ ଦଳ ଅଧିନାୟକ ବିରାଟ କୋହଲିଙ୍କ ସହ ଖେଳରତ୍ନ ପୁରସ୍କାର ପାଇଥିଲେ। ସେହିବର୍ଷ ସେ ପଦ୍ମଶ୍ରୀ ପୁରସ୍କାରରେ ମଧ୍ୟ ସମ୍ମାନିତ ହୋଇଥିଲେ। ୨୦୧୭ରେ ଆମେରିକାରେ ଅନୁଷ୍ଠିତ ବିଶ୍ୱ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ସଫଳତା ଯୋଗୁ ୨୦୧୮ରେ ତାଙ୍କୁ ଡବଲ ପୁରସ୍କାରରେ ସମ୍ମାନିତ କରାଯାଇଥିଲା। ”ଖେଳରତ୍ନ ସର୍ବୋଚ୍ଚ ପୁରସ୍କାର ହୋଇଥିଲେ ହେଁ ମୁଁ ଅର୍ଜୁନ ପୁରସ୍କାର ମିସ୍ କରିଛି। ମୁଁ ଏହି ପୁରସ୍କାର ମଧ୍ୟ ହାସଲ କରିବାକୁ ଚାହେଁ“ ବୋଲି ଚାନୁ ପ୍ରକାଶ କରିଛନ୍ତି। ଖେଳରତ୍ନ ପୁରସ୍କାର ପାଇ ସାରିଥିଲେ ହେଁ ଜଣଙ୍କ ନାମ ଅର୍ଜୁନ ପୁରସ୍କାର ପାଇଁ ସୁପାରିସ କରାଯିବାରେ କିଛି ଅସୁବିଧା ନାହିଁ ବୋଲି ଆଇଡବ୍ଲ୍ୟୁଏଲଏଫ ମହାସଚିବ ସହଦେବ ଯାଦବ ପ୍ରକାଶ କରିଛନ୍ତି।
