ଝାନ୍ସି,୮ା୨: ଉତ୍ତରତପ୍ରଦେଶରେ ଖାପ୍ ପଞ୍ଚାୟତର ତାଲିବାନୀ ଶାସନ ଥମିବାର ନାଁ ଧରୁନି। ଦୈନିକ ଅଜବ ଅଜବ ଘଟଣା ସାମ୍ନାକୁ ଆସୁଛି। ଖାପ୍ ପଞ୍ଚାୟତ ନେଉଥିବା ନିଷ୍ପତ୍ତିକୁ ଦେଖିଲେ ଲାଗୁଛି ଯେଭଳି ଆମ ଦେଶର ଆଇନ ବ୍ୟବସ୍ଥା ଦୁର୍ବଳ ହୋଇପଡ଼ିଛି। କିଛି ଏଭଳି ବିଚିତ୍ର ଦୃଶ୍ୟ ଦେଖିବାକୁ ମିଳିଛି ଉତ୍ତରପ୍ରଦେଶ ଝାନ୍ସିରେ। ସୂଚନାଯୋଗ୍ୟ, ଝାନ୍ସିର ଗୁଆଲଟୋଲିରେ ରହୁଥିବା ଭୂପେଶ ପାଲ ୫ ବର୍ଷ ତଳେ ଅର୍ଥାତ୍ ୨୦୧୫ରେ ପ୍ରେମ ବିବାହ କରିଥିଲେ। ଯୁବତୀ ଜଣକ ଭିନ୍ନ ସମ୍ପ୍ରଦାୟର ହୋଇଥିଲେ ମଧ୍ୟ ୨ ପରିବାରର ସହମତିରେ ଏହି ବିବାହ ହୋଇଥିଲା। ଭିନ୍ନ ଜାତିରେ ବିବାହ କରିଥିବାରୁ ୫ ବର୍ଷ ପରେ ଉକ୍ତ ଗାଁର ଖାପ୍ ପଞ୍ଚାୟତ ଭୂପେଶଙ୍କ ପରିବାରକୁ ସାମାଜିକ ବାସନ୍ଦ କରିଛନ୍ତି। ତେବେ ଯଦି ସେମାନେ ଜାତିରେ ସାମିଲ ହେବେ, ତେବେ ପ୍ରଥମେ ଯୁବତୀଙ୍କୁ ଗୋମୂତ୍ର ପିଇବାକୁ ଓ ଗୋବର ଖାଇବାକୁ ପଡ଼ିବ। ଶୁକ୍ରବାର ଏଭଳି ଅଜବ ନିର୍ଦ୍ଦେଶ ଜାରି କରିଛନ୍ତି ଖାପ୍ ପଞ୍ଚାୟତର ସଦସ୍ୟମାନେ। ଏତଦ୍ବ୍ୟତୀତ ସେମାନଙ୍କ ଉପରେ ୫ ଲକ୍ଷ ଟଙ୍କାର ଜରିମାନା ମଧ୍ୟ ଲଗାଇଛନ୍ତି। ଖାପ୍ ପଞ୍ଚାୟତର ଏହି ନିଷ୍ପତ୍ତିରୁ ଅତିଷ୍ଠ ହୋଇ ଭୂପେଶ ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି। ଜିଲାପାଳ ମଧ୍ୟ ଏହି ସମସ୍ୟାକୁ ଗମ୍ଭୀରତାର ନେଇ ଉକ୍ତ ପୀଡ଼ିତ ଦମ୍ପତିଙ୍କ ଘରକୁ ସିଟି ମାଜିଷ୍ଟ୍ରେଟଙ୍କୁ ପଠାଇଥିଲେ। ଆଉ ଏହି ମାମଲାର ଯାଞ୍ଚ କରି ଏକ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି। ଅପରପକ୍ଷେ ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ଖାପ୍ ପଞ୍ଚାୟତର ସଦସ୍ୟଙ୍କ ବିରୋଧରେ ମାମଲା ଦାଏର କରିଛି। ଏଥିସହ ଉକ୍ତ ଦମ୍ପତି ପରିବାରଙ୍କୁ ସମ୍ପୂର୍ଣ୍ଣ ସୁରକ୍ଷା ପ୍ରଦାନ କରାଯାଇଛି।
