ଖଡିଆଳ,୮।୮(ଡି.ଏନ.ଏ.) ନୂଆପଡା ଜିଲା ଖଡିଆଳ ଓକିଲ ସଂଘ ତରଫରୁ ଅନିର୍ଦ୍ଦିଷ୍ଟ କାଳ ପାଇଁ କାର୍ଯ୍ୟ ବନ୍ଦ ଆନ୍ଦୋଳନ କରାଯାଇଛି । ଖଡିଆଳ, ସିନପାଲି, ବୋଡେନ ଅଞ୍ଚଳର ସମସ୍ତ ମାମଲାକୁ ଖଡିଆଳ ସିନିୟର ସିଭିଲ ଜଜ୍ ତଥା ଜିଲା ଦୌରାଜଜ୍ଙ୍କ କୋର୍ଟରେ ବିଚାର ନ କରି ନୂଆପଡା ଜିଲା ଦୌରା ଜଜ୍ଙ୍କ କୋର୍ଟରେ ବିଚାର କରାଯାଇଥିବା ନିଷ୍ପତ୍ତିକୁ ଖଡିଆଳ ଓକିଲ ସଂଘ କର୍ମକର୍ତ୍ତାମାନେ ତୀବ୍ର ବିରୋଧ କରିଛନ୍ତି । ଏହାର ପ୍ରତିବାଦରେ ବୁଧବାର ସକାଳ ୧୦ଟାରେ ଖଡିଆଳ କୋର୍ଟ ପରିସରରେ ଖଡିଆଳ, ବୋଡେନ, ସିନାପାଲି ବ୍ଲକର ସମସ୍ତ ଆଇନଜୀବୀମାନେ ଏକତ୍ରିତ ହୋଇ ଏକ ପ୍ରତିବାଦ ସଭା କରିବା ସହିତ ସବୁ ପ୍ରକାର କୋର୍ଟ କାମକୁ ବର୍ଜନ କରିଛନ୍ତି । ସେମାନଙ୍କ ଦାବି ପୂରଣ ନ ହେଲେ ଅନିର୍ଦ୍ଦିଷ୍ଟ କାଳ ପାଇଁ କାର୍ଯ୍ୟବନ୍ଦ ଆନ୍ଦୋଳନ ଜାରି ରହିବ ବୋଲି ଚେତାବନୀ ଦେଇଛନ୍ତି । ଏହି ଆନ୍ଦୋଳନରେ ଖଡିଆଳ ଓକିଲ ସଂଘର ସଭାପତି ତୁଳସୀ ତାଣ୍ଡି, ବରିଷ୍ଠ ଆଇନଜୀବୀ ସାରଦା ପ୍ରସାଦ ପଣ୍ଡା, ସମ୍ପାଦକ ସୁବ୍ରତ ସେନାପତି, ସହସମ୍ପାଦକ ସଚିନ୍ଦ୍ର ମୋହନ ଯୋଶୀ, ଆଇନଜୀବୀ ଅସିତ ମହାପାତ୍ର, ଅଭିନବ ନାୟକ, ସଞ୍ଜୟ ମହାପାତ୍ର, ମନୋରଞ୍ଜନ ମହାପାତ୍ର, ସୁରେଶ ପ୍ରଧାନୀ, ଜିତେନ୍ଦ୍ର ପ୍ରଧାନୀ, ଗିରିଧାରୀ ବିଭାର, ସୁରେଶ ମେହେର, ମନୋରଞ୍ଜନ ରାଉତ ପ୍ରମୁଖ ଉପସ୍ଥିତ ଥିଲେ ।
