ନୂଆଦିଲ୍ଲୀ, ୬।୪: କୋଭିଡ୍-୧୯ ବିରୋଧି ଲଢେଇରେ ଦେଶର ବିଭିନ୍ନ କର୍ପୋରେଟ ଯୋଗଦାନ ସ୍ବରୂପ ଆର୍ଥତ୍କ ସହାୟତା ଯୋଗାଣ ଧାରା ଜାରି ରଖିଛନ୍ତି। ଦେଶର ପ୍ରମୁଖ କର୍ପୋରେଟ ହାଉସଗୁଡିକ ଏ ନେଇ ଆଗେଇ ଆସିଛନ୍ତି। ପ୍ରମୁଖ ସଂସ୍ଥା ସେମାନଙ୍କ ଯୋଜନା ମୁତାବକ ଏଥିରେ ଯୋଗଦାନ ରଖୁଥିବା ଦେଖାଯାଇଛି। ସାରା ଦେଶରେ କୋଭିଡ ମାମଲା ଲଗାତାର ଭାବେ ବଢିଚାଲିଛି। ଏହା ଉଭୟ ସରକାର ଏବଂ ଶିଳ୍ପଜଗତ ତଥା ଲୋକମାନଙ୍କ ଲାଗି ଅସୁବିଧା ସୃଷ୍ଟି କରିଛି। ଏହା ବିରୋଧରେ ଶକ୍ତ ହୋଇ ଲଢିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଆହ୍ବାନ ଜଣାଇଛନ୍ତି। କର୍ପୋରେଟଗୁଡିକ ସହାୟତା ଯୋଗାଇ ଦେବା ନେଇ ପ୍ରଧାନମନ୍ତ୍ରୀ ନିକଟରେ ନିବେଦନ କରିଥିଲେ। ଏହି ଧାରାରେ ବିଭିନ୍ନ କର୍ପୋରେଟ ତଥା ଅନ୍ୟ ଅନୁଷ୍ଠାନ ରଖିଥିବା ଯୋଗଦାନ….
ଆଦିତ୍ୟ ବିର୍ଲା ଗ୍ରୁପ
ଆଦିତ୍ୟ ବିର୍ଲା ଗ୍ରୁପ ପକ୍ଷରୁ ପିଏମ୍ କେୟାର୍ସ ପାଣ୍ଠିକୁ ୪୦୦ କୋଟି ଟଙ୍କା ପ୍ରଦାନ ନେଇ ଘୋଷଣା କରାଯାଇଛି। କମ୍ପାନୀ କୋଭିଡ ବିରୋଧି ମୁକାବିଲା ଲାଗି ମୋଟ ୫୦୦ କୋଟି ଟଙ୍କା ଯୋଗଦାନ ରଖିବ ବୋଲି କହିଛି। କୋଭିଡ ବିରୋଧି ଲଢେଇରେ ସରକାରଙ୍କ ସହ ଯୋଗଦାନ ରଖିବା ଲାଗି କମ୍ପାନୀ ପକ୍ଷରୁ ନିବେଦନ କରାଯାଇଛି। ଏହାବାଦ କମ୍ପାନୀ ଅନ୍ୟ ପଦକ୍ଷେପ ନେଉଥିବା କହିଛି।
ଜଳ ଏଟିଏମ ପରିଚାଳନା ଅବ୍ୟାହତ ରଖିଛି ପିରାମଲ ସର୍ବଜଳ
ବର୍ତ୍ତମାନର ସଙ୍କଟ ସମୟରେ ଭୁବନେଶ୍ୱର ମୁନିସିପାଲ କର୍ପୋରେଶନର ସହାୟତାରେ ପିରାମଳ ସର୍ବଜଳ ପକ୍ଷରୁ ଜଳ ଏଟିଏମ୍ ପରିଚାଳନା ଅବ୍ୟାହତ ରଖାଯାଇଛି। ୪୦ଟି ଜଳ ଏଟିଏମ ଜରିଆରେ ଲୋକଙ୍କ ପାଇଁ ପାଣି ଯୋଗାଣ ହେଉଛି। ଲକ୍ଡାଉନ ସମୟରେ ଯେଭଳି ଲୋକଙ୍କ ଲାଗି କୌଣସି ଅସୁବିଧା ନ ହୁଏ ତାକୁ ଧ୍ୟାନରେ ରଖାଯାଇଛି ବୋଲି ପିରାମଲ ସର୍ବଜଳ ପକ୍ଷରୁ ସୂଚନା ରହିଛି।
ସହାୟତା ରାଶି ଦୁଇଗୁଣ କଲା ବେଦାନ୍ତ
ବେଦାନ୍ତ ପକ୍ଷରୁ ପିଏମ୍ କେୟାର୍ସ ଫଣ୍ଡକୁ ୧୦୧ କୋଟି ଟଙ୍କା ପ୍ରଦାନ କରାଯାଇଛି। କୋଭିଡ ସ୍ଥିତିର ମୁକାବିଲା କରିବା ଲାଗି କମ୍ପାନୀ ୨୦୦ କୋଟି ଟଙ୍କା ପର୍ଯ୍ୟନ୍ତ ଖର୍ଚ୍ଚ କରିବ ବୋଲି ଘୋଷଣା କରିଛି। ପୂର୍ବରୁ ୧୦୦ କୋଟି ଟଙ୍କା ପ୍ରଦାନ ନେଇ କମ୍ପାନୀ ଘୋଷଣା କରିଥିବା ବେଳେ ଏହାକୁ ଦୁଇଗୁଣକୁ ବଢାଇଛି। ନିଷ୍ପେସିତ ଲୋକମାନଙ୍କ ସହାୟତା ଲାଗି ବିଭିନ୍ନ କାର୍ଯ୍ୟପନ୍ଥା ଗ୍ରହଣ କରାଯାଉଥିବା ବେଦାନ୍ତର ଅଧ୍ୟକ୍ଷ ଅନୀଲ ଅଗ୍ରଓ୍ବାଲ ସୂଚନା ଦେଇଛନ୍ତି।
