ଅନୁଗୋଳ ଅଫିସ,୩୦।୧୦: ଅନୁଗୋଳ ଜିଲା ତାଳଚେରସ୍ଥିତ ଏମ୍ସିଏଲ୍ ହିଙ୍ଗୁଳା କୋଇଲା ଖଣି ନିକଟରେ ଥିବା ଭାଲୁଗାଡିଆ ଗ୍ରାମକୁ ମଙ୍ଗଳବାର ଜବରଦସ୍ତ ଉଚ୍ଛେଦ ବେଳେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ତେବେ ଉଚ୍ଛେଦକୁ ବିରୋଧ କରି ତାଳଚେର ବିଧାୟକ ବ୍ରଜକିଶୋର ପ୍ରଧାନ ଗ୍ରାମବାସୀଙ୍କ ସହ ଅଟକ ସ୍ଥାନରେ ବସିଥିବାରୁ ଉତ୍ତେଜନା ବୃଦ୍ଧି ପାଇଥିଲା। ଏ ନେଇ ବୁଧବାର ଜିଲାପାଳଙ୍କ କାର୍ଯ୍ୟାଳୟ ଘେରାଉ କରାଯାଇଛି। ବିଧାୟକ ପ୍ରଧାନଙ୍କ ନେତୃତ୍ୱରେ ଶତାଧିକ ଗ୍ରାମବାସୀ ଏକ ଶୋଭାଯାତ୍ରାରେ ଯାଇ ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିଛନ୍ତି। ଅନୁଗୋଳ ଏସ୍ପିଙ୍କ ବିରୋଧରେ ବିଭିନ୍ନ ନାରା ଦେବା ସହ କ୍ଷତିଗ୍ରସ୍ତଙ୍କୁ ଉଚିତ ନ୍ୟାୟ ପ୍ରଦାନ ଦାବିରେ ଶୋଭାଯାତ୍ରା କରାଯାଇଛି। ଭାଲୁଗାଡ଼ିଆ ହରିଜନ ସାହିର ୪୧ ଜଣ ଓ ରାକସ୍ ଗୋଚ୍ଛାୟତ ସାହିର ୧୮ ଜଣ ଲୋକଙ୍କ ସହ ଏକ ପ୍ରତିନିଧିଦଳ ଜିଲାପାଳଙ୍କୁ ଭେଟି ଆର୍ପିଡିଏସିର ୨୪ ନମ୍ବର ପଏଣ୍ଟକୁ କାର୍ଯ୍ୟକାରୀ କରିବା ଓ ପୂର୍ଣ୍ଣ ଥଇଥାନ କରିବାକୁ ନେଇ ଦାବିପତ୍ର ପ୍ରଦାନ କରିଛନ୍ତି। ଜିଲାପାଳଙ୍କ ଜରିଆରେ ଏହି ଦାବିପତ୍ର ମୁଖ୍ୟମନ୍ତ୍ରୀ ଓ ରାଜ୍ୟପାଳଙ୍କ ନିକଟକୁ ପ୍ରଦାନ କରାଯାଇଛି।
ପ୍ରକାଶ ଯେ, କୋଇଲା ଖନନ ନିମନ୍ତେ ହିଙ୍ଗୁଳା ଖଣି କର୍ତ୍ତୃପକ୍ଷ ଅଧିକ ଜମିର ଆବଶ୍ୟକତା କରୁଛନ୍ତି। ତେଣୁ ପୂର୍ବରୁ ଅଧିଗ୍ରହଣ ସରିଥିବା ନିକଟସ୍ଥ ଭାଲୁଗାଡ଼ିଆ ଗ୍ରାମକୁ ମଙ୍ଗଳବାର ଉଚ୍ଛେଦ ପାଇଁ ଖଣି କର୍ତ୍ତୃପକ୍ଷ ସ୍ଥିର କରିଥିଲେ।
