କେନ୍ଦୁଝର,୩ା୫(ସ୍ବ.ପ୍ର.)-କରୋନା ଲକ୍ଡାଉନ ଯୋଗୁ କେରଳରେ ଫସିଥିବା ୩୦ ଓଡ଼ିଆ ଶ୍ରମିକ ଜନ୍ମ ସ୍ଥାନକୁ ଫେରିବା ପାଇଁ ଦିନ ଗଣୁଛନ୍ତି। ଏନେଇ ସେମାନେ କେନ୍ଦ୍ର ଓ ରାଜ୍ୟ ସରକାରଙ୍କ ସହିତ କେନ୍ଦୁଝର ଜିଲାପାଳଙ୍କୁ ଜଣାଇଛନ୍ତି। ଘରକୁ ଆସିବାକୁ ସେମାନେ ନାମ ପଞ୍ଜୀକରଣ ମଧ୍ୟ କରିଛନ୍ତି। ବର୍ତ୍ତମାନ ସେଠାରେ ଖାଇବା ଓ ରହିବାରେ ଅସୁବିଧା ହେଉଥିବାରୁ ଉଦ୍ଧାର ଲାଗି ଭିଡିଓ ବାର୍ତ୍ତା ମାଧ୍ୟମରେ ଆକୁଳ ନିବେଦନ କରିଛନ୍ତି।
ସୂଚନା ଅନୁଯାୟୀ, ଲକ୍ଡାଉନ ହେବାର କିଛି ମାସ ପୂର୍ବରୁ କେନ୍ଦୁଝର,କଟକ,କେନ୍ଦ୍ରାପଡା ଜିଲାର କେତେକ ଶ୍ରମିକ କାମ କରିବା ପାଇଁ କେରଳ ଯାଇଥିଲେ। ସେମାନଙ୍କ ମଧ୍ୟରୁ ପ୍ରାୟ ୩୦ ଜଣ କେରଳର ଏରନାକୁଲମ ଜିଲା ଅନ୍ତର୍ଗତ ମୁଲ୍ଲାବୁର ନିକଟରେ ଥିବା ମାରାଙ୍ଗାଟୁ ପ୍ଲାଏଉଡ କମ୍ପାନୀରେ କାମ କରୁଥିଲେ। ଲକ୍ଡାଉନ ଚାଲିଥିବାରୁ କମ୍ପାନୀ ମାଲିକ ଏବେ ସେମାନଙ୍କର ଖାଇବା ପିଇବା ଓ ରହିବା କଥା ବୁଝୁ ନାହାନ୍ତି। ସେମାନଙ୍କୁ ମଜୁରୀ ନ ଦେଇ କମ୍ପାନୀ ମାଲିକ ଗେଟରେ ତାଲା ପକାଇ ଦେଇଥିବା ଉକ୍ତ ଶ୍ରମିକମାନେ ଭିଡିଓ ବାର୍ତ୍ତାରେ ଜଣାଇଛନ୍ତି। କେନ୍ଦୁଝର ଜିଲା ହରିଚନ୍ଦନପୁର ବ୍ଲକର ପିଠାଗୋଳା ପଞ୍ଚାୟତରୁ ୬ ଜଣ, ବଡପଳାଶପାଳ ପଞ୍ଚାୟତର ୮ , ଭଅଁରପୁର ପଞ୍ଚାୟତରୁ ଜଣେ, ସୁନାପେଣ୍ଠ ପଞ୍ଚାୟତର ଜଣେ, ତେଲକୋଇ ବ୍ଲକରୁ ୫, ଘଟଗଁା ବ୍ଲକରୁ ଜଣେ ରହିଥିବା ବେଳେ କଟକ ଜିଲା ନରସିଂହପୁର ବ୍ଲକରୁ ଜଣେ, କେନ୍ଦ୍ରାପଡା ଜିଲା ରାଜନଗର ବ୍ଲକରୁ ୫ଜଣ ଶ୍ରମିକ ଫସି ରହିଥିବା ଜଣାପଡିଛି। ରାଜ୍ୟ ସରକାର ଏହି ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ସେମାନଙ୍କ ପରିବାର ବର୍ଗ ନିବେଦନ କରିଛନ୍ତି।
