କେନ୍ଦ୍ରାପଡ଼ା ଅଫିସ,୧୭।୭: କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଡାକ୍ତରଙ୍କ ଅସାବଧାନତା ଯୋଗୁ ପ୍ରସବ ନିମନ୍ତେ ଆସିଥିବା ଜନୈକା ମହିଳାଙ୍କ ଅପରେଶନ ସମୟରେ ପେଟରେ ରହିଯାଇଥିଲା ଛୁଞ୍ଚି ଓ ସୂତା। ଯନ୍ତ୍ରଣା ହେବା ପରେ ପୁନର୍ବାର ଅପରେଶନ କରାଯାଇ ତାକୁ ବାହାର କରାଯାଇଛି।
ସୂଚନାନୁଯାୟୀ, ରାଜନଗର ଥାନା ଆଳି କୁମାରତଙ୍ଗା ଗ୍ରାମର ଗଦାଧର ଶର୍ମାଙ୍କ ସ୍ତ୍ରୀ ଅଞ୍ଜନା ଗତ ୧୪ ତାରିଖ ପୂର୍ବାହ୍ନ ୧୦ଟାରେ ପ୍ରସବ ନିମନ୍ତେ ଉକ୍ତ ଡାକ୍ତରଖାନାରେ ଭର୍ତ୍ତି ହୋଇଥିଲେ। ଅପରେଶନ ପରେ ତାଙ୍କର ଏକ ଶିଶୁପୁତ୍ର ଜନ୍ମ ହୋଇଥିଲା। ମଙ୍ଗଳବାର ଡାକ୍ତରଖାନା ପକ୍ଷରୁ ତାଙ୍କୁ ଡିସ୍ଚାର୍ଜ କରାଯାଇଥିଲା। ହେଲେ ଘରକୁ ଯିବା ପରେ ଅଞ୍ଜନାଙ୍କ ପେଟରେ ଯନ୍ତ୍ରଣା ହୋଇଥିଲା। ଏଣୁ ତାଙ୍କୁ ପୁଣି ସେହି ରାତିରେ ଡାକ୍ତରଖାନା ଅଣାଯାଇଥିଲା। ସେଠାରେ ତାଙ୍କର ଅଲଟ୍ରାସାଉଣ୍ଡ କରାଯିବା ପରେ ପେଟରେ ଛୁଞ୍ଚି, ସୂତା ରହିଯାଇଥିବା ଦେଖିବାକୁ ମିଳିଥିଲା। ଫଳରେ ପୁନର୍ବାର ଅପରେଶନ କରାଯାଇ ଏହାକୁ କଢ଼ା ଯାଇଛି। ଘଟଣାକୁ ନେଇ ଅଞ୍ଜନାଙ୍କ ସ୍ବାମୀ ଗଦାଧର ସିଡିଏମ୍ଓ ଉର୍ମିଳା ମିଶ୍ରଙ୍କ ନିକଟରେ ଅଭିଯୋଗ କରିଛନ୍ତି। ଏ ନେଇ ପଚରାଯିବାରେ ସିଡିଏମ୍ଓ କହିଛନ୍ତି, ଏହାର ତଦନ୍ତ ହେବା ପରେ ସମ୍ପୃକ୍ତ ଡାକ୍ତରଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ।
