ବଲାଙ୍ଗୀର ଅଫିସ, ୨୧।୧- ବଲାଙ୍ଗୀର ଜିଲା ବଙ୍ଗୋମୁଣ୍ଡା ଥାନା ଚୁଲିଫୁଙ୍କା ଗାଁରେ ମଙ୍ଗଳବାର ଏକ ଅଘଟଣ ଘଟିଛି। ସମ୍ପର୍କୀୟ କାକାଙ୍କୁ କୂଅ ଭିତରକୁ ଠେଲି ପୁତୁରା ହତ୍ୟା କରିଥିବା ଅଭିଯୋଗ ହୋଇଛି। ଗାଁର ଜଗଦାନନ୍ଦ ବେହେରା ମଙ୍ଗଳବାର ତାଙ୍କ କ୍ଷେତରେ ଥିବା କୂଅ ପାଖରେ ଠିଆ ହୋଇଥିବା ବେଳେ ସମ୍ପର୍କୀୟ ପୁତୁରା ବାଙ୍କନିଧି ବେହେରା ତାଙ୍କୁ କୂଅକୁ ଠେଲି ଦେଇ ନିଜେ ମଧ୍ୟ କୂଅକୁ ଲମ୍ଫ ପ୍ରଦାନ କରିଥିଲେ। କିଛି ସମୟ ପରେ କୂଅ ଭିତରେ ଜଗଦାନନ୍ଦଙ୍କ ମୃତ୍ୟୁ ଘଟିଥିଲା। ଖବର ପାଇ ଅଗ୍ନିଶମ ବିଭାଗ ଓ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚିି କୂଅ ଭିତରୁ ଜଗଦାନନ୍ଦଙ୍କ ମୃତଦେହ ଓ ପୁତୁରା ବାଙ୍କନିଧିଙ୍କୁ ଉଦ୍ଧାର କରିଥିଲେ। ଜଗଦାନନ୍ଦଙ୍କୁ ବାଙ୍କନିଧି ହତ୍ୟା କରିଥିବା ପରିବାର ଲୋକେ ପୋଲିସ ନିକଟରେ ଅଭିଯୋଗ କରିଛନ୍ତି। ପୋଲିସ ବାଙ୍କନିଧିଙ୍କୁ ଅଟକ ରଖି ପଚରାଉଚରା କରୁଥିବା ଜଣାପଡିଛି। ଅଟକ ବାଙ୍କନିଧିଙ୍କ ବିରୋଧରେ ପୂର୍ବରୁ ହତ୍ୟା ଅଭିଯୋଗ ରହିଛି। ୨୦୧୪ ମସିହାରେ ବାଙ୍କନିଧି ଏକ ଶିଶୁବଳି ଘଟଣାରେ ଗିରଫ ହୋଇ ଜେଲ ଯାଇଥିଲେ। ପରେ ସେ ଜାମିନରେ ବାହାରିଥିଲେ ।
