ଭୁବନେଶ୍ୱର, ୨୯।୨ (ବ୍ୟୁରୋ): ୭ ଦେଶ ଫ୍ରାନ୍ସ, କେନିଆ, ଇକ୍ୱାଡାର, ଇଟାଲୀ, ସ୍ପେନ୍, ପର୍ତ୍ତୁଗାଲ୍ ଏବଂ ପୋଲାଣ୍ଡରୁ ୭ ଜଣ ବିଦେଶୀ ନାଗରିକ ଆସି ଶୁକ୍ରବାର ଭୁବନେଶ୍ୱରସ୍ଥ କିଚେନ୍ ଗାର୍ଡେନ ପରିଦର୍ଶନ କରିଛନ୍ତି। କିଚେନ୍ ଗାର୍ଡେନ ଏବେ ପ୍ରାକୃତିକ ଚାଷ ସଂକ୍ରାନ୍ତ ପ୍ରଶିକ୍ଷଣ ତଥା ପ୍ରଦର୍ଶନୀ ହବ୍ ପାଲଟିଥିବା ବେଳେ ସହରୀ ବଗିଚା, ଭୂମିଶଯ୍ୟା, ମୃତ୍ତିକା ଏବଂ କୀଟନାଶକ ପରିଚାଳନା, ଘରୋଇ ବର୍ଜ୍ୟବସ୍ତୁର କମ୍ପୋଷ୍ଟିଂ, ମୃତ ଜଳ ପ୍ରସ୍ତୁତି ସହ ଜଳ ସଫେଇ, ମତ୍ସ୍ୟ ଟ୍ୟାଙ୍କର ବିଭିନ୍ନ ଡେମୋକୁ ବିଦେଶୀ ନାଗରିକମାନେ ବୁଲି ଦେଖିଛନ୍ତି। ଏହି ଅବସରରେ ଅନୁଷ୍ଠିତ ପାରସ୍ପରିକ ଅଧିବେଶନରେ ସମସ୍ତ ବିଦେଶୀ ନାଗରିକ ସେମାନଙ୍କ ଦେଶରେ ସହରୀ ଚାଷ ସ୍ଥିତି ବିଷୟରେ ବଖାଣିଥିଲେ। ଆମ ଦେଶରେ ସହରୀ ଚାଷରେ ସଫଳତା ପାଇଥିବା କୃଷକ ଦୁଷ୍ମନ୍ତ ଦାସ ସେମାନଙ୍କ ସହ ଭାବ ବିନିମୟ କରିଥିଲେ। ଡ. ମନୋରଞ୍ଜନ ମିଶ୍ର, ଡ. ଆଦିତ୍ୟ ମହାନ୍ତି, ମାମୁନି ମହାନ୍ତି, ପ୍ରଦୀପ୍ତ ମହାରଣା, ମହେଶ୍ୱର ଖିଲାର, ପ୍ରିୟରଞ୍ଜନ ଦାସ ପ୍ରମୁଖ ଉପସ୍ଥିତ ରହି ବିଦେଶୀ ନାଗରିକଙ୍କୁ ବିଭିନ୍ନ ମଡେଲ ଦେଖାଇଥିଲେ। ବର୍ଜ୍ୟବସ୍ତୁକୁ ବ୍ୟବହାର କରିବା ସହ ସେଗୁଡ଼ିକୁ କାର୍ଯ୍ୟରେ ଉପଯୋଗ କରୁଥିବାରୁ ବିଦେଶୀ ନାଗରିକମାନେ କିଚେନ୍ ଗାର୍ଡେନର୍ସ ଆସୋସିଏଶନ୍କୁ ପ୍ରଶଂସା କରିଥିଲେ।
