ପାଟଣା,୧।୬(ସ୍ବ.ପ୍ର.)-କାଳବୈଶାଖୀ ପ୍ରଭାବରେ ସୋମବାର ଅପରାହ୍ନରେ କେନ୍ଦୁଝର ଜିଲ ପାଟଣା ଅଞ୍ଚଳରେ କୁଆପଥର ବର୍ଷା, ଘଡଘଡି ସାଙ୍ଗକୁ ବହୁତ ଜୋର୍ସେ ପବନରେ ବିଦ୍ୟୁତ ସରବରାହ ବ୍ୟାହତ ହେବା ସହ ୩ଜଣ ଆହତ ହୋଇଛନ୍ତି। ପୂର୍ବାହ୍ନରୁ ସା ମଧ୍ୟରେ ପାଟଣା ଅଞ୍ଚଳରେ ୪୧.୪ ମିଲି ମିଟର ବର୍ଷା ହୋଇଥିବା ପାଟଣା ସ୍ଥିତ ସେଣ୍ଟ୍ରାଲ ୱାଟର କମିଶନ କାର୍ଯ୍ୟାଳୟ ସୂତ୍ରରୁ ପ୍ରକାଶ। ବଡ଼ପାଟଣା ପଞ୍ଚାୟତ ଶିବନାରାୟଣ ପୁର ଗ୍ରାମର ଅସହାୟ ବୃଦ୍ଧା ଆଶାମଣି ନାଏକଙ୍କ ଆଜବେଷ୍ଟସ୍ ଘର ସହ ଚାଳ ଘର ସମ୍ପୂର୍ଣ୍ଣ ଭାଙ୍ଗି ଯାଇଛି। ବୃଦ୍ଧା ଜଣଙ୍କ ଅଳ୍ପକେ ବର୍ତ୍ତି ଯାଇଛନ୍ତି। ପୂର୍ବରୁ ପୁଅବୋହୂଙ୍କୁ ହରାଇ ୪ ନାତି ନାତୁଣୀଙ୍କ ସହ ରହୁଛନ୍ତି। ସେ ଜଣେ ଅସହାୟ ବିଧବା ମହିଳା। ଗରିବ ହୋଇଥିବାରୁ ତାଙ୍କୁ ସରକାରୀ ସହାୟତା ଯୋଗାଇଦେବାକୁ ସ୍ଥାନୀୟବାସୀ ଦାବି କରିଛନ୍ତି। ଅନୁରୂପ ଭାବେ ବଡ଼ପାଟଣା ପଞ୍ଚାୟତ ପୁଟୁଳିଆ ଗ୍ରାମର ସର ପାତ୍ର ଓ ତାଙ୍କ ଦୁଇ ପୁଅ ଲକ୍ଷ୍ମଣ ପାତ୍ର ଓ ଡାକ୍ତର ପାତ୍ର ଘର ଭିତରେ ଥିବା ବେଳେ ହଠାତ ବର୍ଷା ପବନ ଜୋର ହେବାରୁ ଘର ପାଖରେ ଥିବା ଏକ ବିରାଟ ଆମ୍ବ ଗଛଘର ଉପରେ ଖସିପଡିବାରୁ ଘର ଭାଙ୍ଗିବା ସହ ସେମାନେ ଆହତ ହୋଇଛନ୍ତି।
