ଜଳେଶ୍ୱର, ୧୦।୫(ସ୍ବ.ପ୍ର)-ବାଲେଶ୍ୱର ଜିଲା ଜଳେଶ୍ୱର ବ୍ଲକ ଅଧୀନ ମାକିଡିଆ ପଞ୍ଚାୟତଠାରେ ନିର୍ମାଣାଧୀନ ସୁବର୍ଣ୍ଣରେଖା ନଦୀର ପଥରବନ୍ଧ ଓ ସ୍ପର ନିର୍ମାଣ ନ ସରୁଣୁ ୩ଦିନରେ ୩ଟି ସ୍ଥାନରେ ଧସି ଯାଇଛି। ବର୍ଷାଋତୁ ଆସିବା ପୂର୍ବରୁ ପଥରବନ୍ଧର ଏପରି ଅବସ୍ଥା ନେଇ ଗ୍ରାମବାସୀଙ୍କ ମନରେ ସନ୍ଦେହ ପ୍ରକାଶ ପାଇଛି।
ସୁବର୍ଣ୍ଣରେଖା ନଦୀ ଓଡିଶାର ପ୍ରବେଶପଥର ମାତ୍ର ୧ କିମି. ପରେ ପଡେ ମାକିଡ଼ିଆ ଗାଁ। ଏହି ଗାଁକୁ ସୁବର୍ଣ୍ଣରେଖା ନଦୀ ତିନି ପଟୁ ଘେରି ରହିଛି । ଏହାର ରକ୍ଷା ଲାଗି ୧୯୭୮ରେ ବିଶ୍ୱବ୍ୟାଙ୍କ ସହାୟତାରେ ଛୋଟ ଛୋଟ ସ୍ପର ନିର୍ମାଣ କରାଯାଇଥିଲା। ତେବେ ୨୦୧୦ରେ ଗାଁଟି ନଦୀଗର୍ଭରେ ଲୀନ ହେବାକୁ ବସିଥିବାବେଳେ ନଦୀପାର୍ଶ୍ୱରେ ସୁଦୀର୍ଘ ସ୍ପର ଓ ପଥରପ୍ୟାକିଂ ଯୋଗୁ ଗାଁଟି ତିଷ୍ଠି ରହିଛି। ଏବେ ନିକଟରେ ୭ଟି ସ୍ପର ଓ ୮ଶହ ମିଟର ପଥରପ୍ୟାକିଂ ଲାଗି ୧୪କୋଟି ୩୬ଲକ୍ଷ ଟଙ୍କା ବ୍ୟୟବରାଦ ହୋଇଥିଲା। ଗତ ୩୦ା୧ା୧୯ରେ ଏହି କାର୍ଯ୍ୟ ଆରମ୍ଭ ହୋଇ ୩୦ା୪ା୨୦ରେ ସରିବାକୁ ଥିବା ବେଳେ ଏବେ ପ୍ରାୟ ୬୦ଭାଗ କାମ ଶେଷ ହୋଇଛି। କିନ୍ତୁ ନିର୍ମାଣ ହୋଇଥିବା ପଥରପ୍ୟାକିଂର ୩ଟି ସ୍ଥାନରେ ଧସିଯାଇଥିବା ଦେଖିବାକୁ ମିଳିଛି। ଅଦିନିଆ ବର୍ଷାରେ ସୁବର୍ଣ୍ଣରେଖା ନଦୀର ମାକିଡ଼ିଆରୁ କୁଅଁରପୁର ଚାଲିଥିବା ପଥରବନ୍ଧ କାର୍ଯ୍ୟ ଧସିଯାଉଥିବା ବେଳେ ଆସନ୍ତା ବର୍ଷାଋତୁ ଓ ବନ୍ୟା ଆସିଲେ ଏହାର ସ୍ଥିତି କ’ଣ ହେବ ସେନେଇ ଗ୍ରାମବାସୀଙ୍କ ମଧ୍ୟରେ ପ୍ରଶ୍ନବାଚୀ ସୃଷ୍ଟି ହୋଇଛି। ନିମ୍ନମାନର ପଥର ବ୍ୟବହାର କରାଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏନେଇ ଗାଁର ବିବେକ ପ୍ରିୟଦର୍ଶୀ ପ୍ରଧାନ ନାମକ ଯୁବକ ଆର୍ଟିଆଇରେ ୧୬ା୧୨ା୧୯ରେ ସବିଶେଷ ତଥ୍ୟ ମାଗିଥିଲେ ମଧ୍ୟ ଜଳ ସମ୍ପଦ ବିଭାଗ ଅଦ୍ୟାବଧି ଦେଉ ନ ଥିବାରୁ ସେ ଆର୍ଟିଆଇ କମିଶନରଙ୍କ ଦ୍ୱାରସ୍ଥ ହେବେ ବୋଲି ଶନିବାର କହିଛନ୍ତି। ଏହାର ଭିଜିଲାନ୍ସ ତଦନ୍ତ କରିବାକୁ ସେ ବିଭାଗୀୟ ଏସ୍ପିଙ୍କ ଦୃଷ୍ଟି ଆକର୍ଷଣ କରିଛନ୍ତି।
ଏ ସମ୍ପର୍କରେ ଜଳେଶ୍ୱରସ୍ଥିତ ଜଳ ସମ୍ପଦ ବିଭାଗର ସହକାରୀ ନିର୍ବାହୀ ଇଂ. ପ୍ରିୟବ୍ରତ ସିଂଙ୍କୁ ପଚରାଯିବାରୁ ସେ କହିଛନ୍ତି ଯେ, ଦୁଇଟି ପର୍ଯ୍ୟାୟରେ ୧୭କୋଟି ଟଙ୍କା ବ୍ୟୟରେ ୮ଟି ସ୍ପର ଓ ୮ଶହ ମିଟର ପଥର ପ୍ୟାକିଂ କାର୍ଯ୍ୟ ଚାଲିଛି। ୬୫ଭାଗ କାର୍ଯ୍ୟ ହୋଇଥିବା ବେଳେ ଲକ୍ଡାଉନ୍ ଯୋଗୁ କାର୍ଯ୍ୟ ବନ୍ଦ ହୋଇରହିଛି। ଅନ୍ୟପକ୍ଷରେ ଏହି କାର୍ଯ୍ୟ ଓଡ଼ିଶା ନିର୍ମାଣ ନିଗମ ପକ୍ଷରୁ ଚାଲିଥିବା ବେଳେ ଆର୍ଟିଆଇ ସମ୍ପର୍କରେ ସେ ସମ୍ପୃକ୍ତ ନିଗମ କର୍ତ୍ତୃପକ୍ଷଙ୍କୁ ଜଣାଉଥିଲେ ମଧ୍ୟ ସେମାନେ ତଥ୍ୟ ଦେଉ ନ ଥିବାରୁ ଆବେଦନକାରୀଙ୍କୁ ତଥ୍ୟ ଦିଆଯାଇପାରୁ ନାହିଁ।
