ଭବାନୀପାଟଣା,୨୬।୨(ଡି.ଏନ୍.ଏ.): କଳାହାଣ୍ଡି ଜିଲାର ୨ ଜଣ ଆନ୍ତଃରାଜ୍ୟ ଗଞ୍ଜେଇ ବ୍ୟବସାୟୀ ରାଜସ୍ଥାନର ଜୟପୁରରୁ ଗିରଫ ହୋଇଛନ୍ତି। ସେମାନେ ହେଲେ ଭବାନୀପାଟଣା ସହରର ଅଭିଷେକ ଦାଶ ଓ ସମ୍ବିତ ପାଣିଗ୍ରାହୀ। ସେମାନଙ୍କଠାରୁ ୮କେଜି ୧୦୦ ଗ୍ରାମ ଗଞ୍ଜେଇ ଜବତ ହୋଇଛି। ଉଭୟ ଓଡ଼ିଶାରୁ କେଜି ପିଛା ୨ ହଜାର ୫୦୦ ଟଙ୍କାରେ ଗଞ୍ଜେଇ କ୍ରୟ କରି ରାଜସ୍ଥାନ ସମେତ ବିଭିନ୍ନ ଅଞ୍ଚଳରେ ଏହାକୁ କେଜି ୮ ହଜାର ଟଙ୍କାରେ ବିକ୍ରି କରୁଥିଲେ।
ସୂଚନାନୁଯାୟୀ, ରାଜସ୍ଥାନ ଜୟପୁର ପୋଲିସ ପକ୍ଷରୁ ଡଗ୍ସ ଫ୍ରି ଯୋଜନା କରିବା ପାଇଁ ଏକ ସିଏସ୍ଟି ଟିମ୍ ଗଠନ କରାଯାଇଥିଲା। ଉକ୍ତ ଟିମ୍ର ଅତିରିକ୍ତ ଡିସିପି ବିମଲ ସିଂଙ୍କ ନେତୃତ୍ୱରେ ସିନ୍ଧିକେ ବସଷ୍ଟାଣ୍ଡଠାରେ ଚଢ଼ାଉ କରି ଉଭୟଙ୍କୁ ଗିରଫ କରାଯାଇଛି। ବ୍ୟାଗରେ ଗଞ୍ଜେଇ ଭର୍ତ୍ତି କରି ବସ୍ ଓ ଟ୍ରେନରେ ଏମାନେ ବିକ୍ରି କରୁଥିବା ପୋଲିସ କହିଛି। ୨ ଅଭିଯୁକ୍ତଙ୍କୁ ଗିରଫ କରି ରାଜସ୍ଥାନ ପୋଲିସ କୋର୍ଟ ଚାଲାଣ କରିଥିଲା। ସେଠାରେ ଜାମିନ ନାମଞ୍ଜୁର ହେବା ପରେ ଅଭିଷେକ ଓ ସମ୍ବିତକୁ ଜୟପୁର ଜେଲକୁ ପଠାଇ ଦିଆଯାଇଛି।
