କେନ୍ଦୁଝର, ୨୭ା୩ (ନରେଶ ଚନ୍ଦ୍ର ପଟ୍ଟନାୟକ)-କର୍ତ୍ତବ୍ୟ ଆଗ, ଆଉ ସବୁ ପଛ। ଏହାକୁ ପାଥେୟ କରି କେନ୍ଦୁଝର ପୌରପାଳିକା ସଫେଇ କର୍ମଚାରୀ ଆଗେଇ ଆସିଛନ୍ତି। କରୋନା ଭୂତାଣୁ ସଂକ୍ରମଣ ରୋକିବା ଲାଗି ସ୍ବଚ୍ଛ ପରିବେଶକୁ ପ୍ରାଥମିକତା ଦିଆଯାଉଛି। ଏଭଳି ପରିସ୍ଥିତିରେ ସମସ୍ତେ ସ୍ବଚ୍ଛ ପରିବେଶରେ ରହି ସାମାଜିକ ଦୂରତ୍ୱ ରକ୍ଷା କରୁଥିବା ବେଳେ ସଫେଇ କର୍ମଚାରୀମାନେ ମଇଳା ଆବର୍ଜନା ସଫେଇ କରିବା ପାଇଁ ବାହାରକୁ ବାହାରିଛନ୍ତି। କମ୍ ଦରମାରେ କାମ କରୁଥିବା ଏହି କର୍ମଚାରୀମାନେ ସମସ୍ତଙ୍କୁ ସୁସ୍ଥ ପରିବେଶ ଯୋଗାଇ ଦେଇ ଉଦାହରଣ ପାଲଟିଛନ୍ତି।
କେନ୍ଦୁଝର ପୌରପାଳିକାରେ ମୋଟ ୧୮୦ଜଣ ମହିଳା ଓ ପୁରୁଷ ସଫେଇ କର୍ମଚାରୀ ଅଛନ୍ତି। ପ୍ରତ୍ୟେକ ଦିନ ସେମାନେ ବିଭିନ୍ନ ଓ୍ବାର୍ଡରେ ରାସ୍ତାଘାଟ ସଫେଇ କାମ କରିବା ସହ ମଇଳା ଆବର୍ଜନାକୁ ସଂଗ୍ରହ କରିବା ସହ ଟ୍ରାକ୍ଟରରେ ଲୋଡ କରି ବାହାରେ ପକାଇଥାନ୍ତି। ତେବେ ଅନେକ କର୍ମଚାରୀ ବିନା ଗ୍ଲୋଭସ, ନୋଜ ମାସ୍କ, ଜୋତାରେ କାମ କରୁଥିବା ଦେଖିବାକୁ ମିଳୁଛି ା କରୋନା ପାଇଁ ରାସ୍ତାଘାଟ ଶୂନଶାନ ରହିଥିଲେ ହେଁ ସେମାନେ କର୍ତ୍ତବ୍ୟ କରିଚାଲିଛନ୍ତି ା ସେମାନଙ୍କୁ ନା ମିଳୁଛି ପ୍ରୋତ୍ସାହନ ଭତ୍ତା ନା ମିଳୁଛି ସୁରକ୍ଷା ସରଞ୍ଜାମ। ସେମାନଙ୍କୁ ଆଗୁଆ ମୁଜରି ଦେବା ସହ ପ୍ରୋତ୍ସାହନ ଭତ୍ତା ଦେବା ଆବଶ୍ୟକ ବୋଲି କେନ୍ଦୁଝର ଜଣେ ବୟୋଜ୍ୟେଷ୍ଠ ବ୍ୟକ୍ତି ଅଲେଖ ଚନ୍ଦ୍ର ପାତ୍ର କହିଛନ୍ତି ା ଏ ସମ୍ପର୍କରେ କେନ୍ଦୁଝରଗଡ ପୌରପାଳିକା ସହକାରୀ ନିର୍ବାହୀଯନ୍ତ୍ରୀ ସଂଗ୍ରାମ ବେହେରା କହିଛନ୍ତି ଯେ, ସଫେଇ କର୍ମଚାରୀମାନେ ସେମାନଙ୍କ କାମ ଠିକ୍ ଭାବରେ କରୁଛନ୍ତି ା ସେମାନଙ୍କ ସୁବିଧା ପ୍ରତି ଧ୍ୟାନ ଦିଆଯାଉଛି।
