ଅନଗୁଳ ସହର, ୩ା୩
ଅନୁଗୋଳ ସହର ହୁଲୁରିସିଙ୍ଗା ଜେମାଦେଈପୁର କମାରସାହି ବାସିନ୍ଦାଙ୍କୁ ମିଳୁନି ଘରଡିହ ପଟ୍ଟା। ଦୀର୍ଘ ବର୍ଷ ଧରି ଆଦିବାସୀ ସମ୍ପ୍ରଦାୟର ପ୍ରାୟ ୪୦ ଗରିବ ପରିବାର ସେଠାରେ ବାସ କରିଆସୁଥିବା ବେଳେ ଆଜି ପର୍ଯ୍ୟନ୍ତ ସେମାନଙ୍କୁ ପଟ୍ଟା ମିଳୁ ନ ଥିବା ସେମାନେ ଅଭିଯୋଗ କରିଛନ୍ତି। ଏ ନେଇ ସୋମବାର ଅନୁଷ୍ଠିତ ଜନ ଅଭିଯୋଗ ଶୁଣାଣି ଶିବିରରେ ସାହିବାସୀ ଜିଲାପାଳଙ୍କୁ ଜଣାଇଛନ୍ତି।
ସେମାନଙ୍କ ଅଭିଯୋଗ ମୁତାବକ, ଶହେରୁ ଊର୍ଦ୍ଧ୍ୱ ବର୍ଷ ହେବ ସାହିବାସୀ ସେଠାରେ ବସବାସ କରିଆସୁଛନ୍ତି। ହେଲେ ଆଜି ପର୍ଯ୍ୟନ୍ତ ସେମାନଙ୍କୁ ଘର ପଟ୍ଟା ମିଳିପାରୁନାହିଁ। ଏ ନେଇ ବାରମ୍ବାର ତହସିଲଦାର, ଉପଜିଲାପାଳ, ଜିଲାପାଳଙ୍କ ନିକଟରେ ଅଭିଯୋଗ କରିଆସୁଥିଲେ ହେଁ କିଛି ସୁଫଳ ମିଳୁନି। ନିଜର ଘର ଡିହ ନ ଥିବାରୁ ପ୍ରଧାନମନ୍ତ୍ରୀ ଆବାସ କିମ୍ବା ବିଜୁ ପକ୍କା ଘର ଯୋଜନରେ ଘର ମିଳୁନି। ଦୀର୍ଘ ବର୍ଷ ହେଲା ସେଠାରେ ରହୁଥିବାର ପ୍ରମାଣପତ୍ର, ଫଟୋ ପରିଚୟ ପତ୍ର ଏପରିକି ଭୋଟର ପରିଚୟ ମଧ୍ୟ ପ୍ରଶାସନକୁ ଦିଆଯାଇଥିଲେ ବି ସରକାରୀ ଭାବେ ସେମାନଙ୍କୁ ଜାତି କିମ୍ବା ବାସସ୍ଥାନ ପ୍ରମାଣପତ୍ର ପ୍ରଦାନ କରାଯାଉନାହିଁ। ଫଳରେ ସେମାନଙ୍କ ପିଲାମାନେ ପାଠପଢା ସହ ଚାକିରି କ୍ଷେତ୍ରରେ ଅସୁବିଧା ଭୋଗୁଛନ୍ତି। ଉକ୍ତ ଜାଗାଟି ଶ୍ମଶାନ ବୋଲି ସରକାରୀ ରେକର୍ଡ ରହିଛି। ହେଲେ ରେକର୍ଡ ପ୍ରସ୍ତୁତ ପୂର୍ବରୁ ସେଠାରେ ଜନବସତି ଥିବାବେଳେ ଏହାକୁ କିପରି ଶ୍ମଶାନ ଜମି ବୋଲି ଦର୍ଶାଯାଇଛି ସେ ନେଇ ସେମାନେ ପ୍ରଶ୍ନ ଉଠାଇଛନ୍ତି। ଏ ସମସ୍ତ ବିଷୟରେ ସାହିବାସୀ ଜିଲାପାଳଙ୍କୁ ଅବଗତ କରାଇଛନ୍ତି। ଉକ୍ତ ସାହିକୁ ତହସିଲଦାର ଓ ରାଜସ୍ବ ଅଧିକାରୀଙ୍କୁ ପଠାଇ ତଦନ୍ତ କରିବା ପାଇଁ ଜିଲାପାଳ ପ୍ରତିଶ୍ରୁତି ଦେଇଥିବା ଜଣାପଡିଛି। ତୁରନ୍ତ ସାହିବାସୀଙ୍କୁ ଘରଡିହ ପଟ୍ଟା ଯୋଗାଇ ଦେବା ପାଇଁ ସୁଭଦ୍ରା ପେଣ୍ଠୋଇ, ଦମୟନ୍ତୀ ପ୍ରଧାନ, ମୋତି ପେଣ୍ଠୋଇ, ସୀତା ବେହେରା, ମଞ୍ଜଳା ବେହେରା, ମିନତୀ ବେହେରା, ଦୁଲେଇ ବେହେରା, ଜୟନ୍ତୀ ମାଝି, ଲକ୍ଷ୍ମୀ ଭୋଇ, ଅନନ୍ତ ଭୋଇ, ବିନୋଦ ଭୋଇ, ସୁକାନ୍ତି ଭୋଇ, ସୁନୀଲ ବେହେରା, ମିନତୀ ବେହେରା, ଜୟନ୍ତୀ ଭୋଇ, ରଞ୍ଜିତା ପେଣ୍ଠୋଇ ପ୍ରମୁଖ ଦାବି କରିଛନ୍ତି।
