ଗୁଡ଼ଭେଲିପଦର, ୧୬।୨ (ଡି.ଏନ୍.ଏ.)- ବୌଦ୍ଧ ଜିଲା କଣ୍ଟାମାଳ ତହସିଲ ଅଧୀନ ଭିନେ ଭିନେ ଗାଁରେ ବେଆଇନ୍ ଇଟାଭାଟି ଦେଖ୍ବାକେ ମିଲୁଛେ। ଜାତୀୟ ଗ୍ରୀନ ଟ୍ରିବ୍ୟୁନାଲ ଆଇନକେ ଅନ୍ଦେଖା କରି କଣ୍ଟାମାଳ ତହସିଲ ଅଂଚଲରେ ବେପାରୀମାନେ ୨୦ରୁ ଅଧ୍କା ବେଆଇନ୍ ଇଟାଭାଟି ଲଗେଇ ବେପାର ଚଲେଇଛନ୍। ହେଲେ ଇ ଦିଗେ ପରଶାସନ ତରଫୁ ବେଆଇନ୍ ଇଟାଭାଟି ଉପରେ ଚଢ଼ଉ କି ମାଲିକ ଉପରେ କେହେନ୍ସି ପରକାର ପଦକ୍ଷେପ ନାଇଁ ନିଆଯିବର। ଏନ୍ତାଥି ରାଏଜ୍ ସରକାର ଲକ୍ଷାଧିକ୍ ଟଁକା ରାଜସ୍ବ ହରଉଥିଲାବେଲେ ବେଆଇନ୍ ଇଟାଭାଟି ଲାଗି ପରିବେଶ ଦୂଷିତ ହେଉଛେ ବଲି ଅଂଚଲର ବୁଧିଜୀବୀ ମହଲରେ ଚରଚା ହେଉଛେ। ଇଆଡ଼େ ଜାତୀୟ ଗ୍ରୀନ ଟ୍ରିବ୍ୟୁନାଲ ଇଟାଭାଟିକେ ପୂରାପୂରି ବେଆଇନ ବଲି କହେବାର ସଂଗେ ଇ ଦିଗେ ଚଢ଼ଉ କରି ପଦକ୍ଷେପ ନେବାକେ ରାଏଜ୍ ସରକାରକୁଁ ନିରଦେଶ ଦେଇଥିଲେ। ଯେନ୍ମାନେ ନିୟମକେ ବେଖାତିର କରୁଛନ୍ ସେମାନକର ନଁାରେ ପରଶାସନ ତରଫୁ ଏଫ୍ଆଇଆର୍ ଦେବାର ନିୟମ ରହିଛେ। ହେଲେ କଣ୍ଟାମାଳ ତହସିଲ ଅଂଚଲର ଅନେକ ଗାଁରେ ପରଶାସନ ଆର ଇଟାଭାଟି ମାଲିକମାନକର ସଲାସୁତରାରେ ସବୁ ଚାଲିଥିବାର ଦେଖ୍ବାକେ ମିଲୁଛେ। କଣ୍ଟାମାଳ ତହସିଲ ଅଧୀନ ଗୁଡ଼ଭେଲିପଦର ପଁଚେତ୍, ବିଲାସପୁର ପଁଚେତ୍, ବରଗୋଛା ପଁଚେତ୍ର ଅନେକ ଗାଁରେ ଲୋକ୍ ବେଆଇନ୍ ଇଟାଭାଟି ଲଗଉଥିବାର ଦେଖ୍ବାକେ ମିଲୁଛେ। ହେଲେ ଇ ଦିଗେ ରାଜସ୍ବ ବିଭାଗ ପଦକ୍ଷେପ ନେବାର ଜାଗାରେ ହାତ୍ ବାଁଧି ବସିଥିବାର ଅଂଚଲରେ ଚରଚାର ବିଷେ ପାଲଟିଛେ। ଇ ବାବ୍ଦେ ମନମୁଣ୍ଡା ରାଜସ୍ବ ଅଧ୍କାରୀ ସୁରେନ୍ଦ୍ର ସାହୁକୁଁ ପଚ୍ରାଲାରୁ ମୁଇଁ ଇ ଦିଗେ ତଦଁତ୍ କରୁଛେ। ତଦଁତ୍ ଉତାରୁ ପଦକ୍ଷେପ ନିଆଯିବା ବଲି ସେ କହିଥିଲେ।
