କଟକ ଅଫିସ,୯।୮ : କଟକରେ କିଛିଦିନ ତଳେ ୨୪ ଘଣ୍ଟା ମଧ୍ୟରେ ୩ ଜଣଙ୍କ ଗଳାକାଟି ହତ୍ୟା କରାଯାଇଥିଲା। ଏହି ଘଟଣାରେ ପୋଲିସ ନୟାଗଡ ଅଞ୍ଚଳର ନାରାୟଣ ସାହୁଙ୍କୁ ଗିରଫ କରି କୋର୍ଟଚାଲାଣ କରିଥିଲା। ମାତ୍ର ଗତ ବୁଧବାର ନାରାୟଣଙ୍କ ସ୍ତ୍ରୀ ଗୀତାଞ୍ଜଳିଙ୍କ ପକ୍ଷରୁ ଏ ନେଇ କଟକ ଜେଏମ୍ଏଫ୍ସିରେ ମାମଲା ରୁଜୁ ହୋଇଥିଲା। ସେହିପରି ଉକ୍ତ ଘଟଣାର ତଦନ୍ତ ମାଜିଷ୍ଟ୍ରେଟ୍ କିମ୍ବା ସିବିଆଇ ଦ୍ୱାରା କରାଇବାକୁ ଗୀତାଞ୍ଜଳି ଗୁରୁବାର ଆଉ ଏକ ପିଟିଶନ୍ ଦାଏର କରିଛନ୍ତି। ଗୀତାଞ୍ଜଳି କହିଛନ୍ତି, ନାରାୟଣଙ୍କୁ ସେ କଟକ ଏସ୍ସିବି ମେଡ଼ିକାଲ ମାନସିକ ବିଭାଗରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ନାରାୟଣ ଚାଲି ଯାଇଥିବାବେଳେ ପରିବାର ଲୋକେ ତାଙ୍କୁ ଅନେକ ଖୋଜି ପାଇ ନ ଥିଲେ। ନାରାୟଣ ଜୁଲାଇ ୨୨ରେ ଭୁବନେଶ୍ୱର ସାଲିଆସାହି ସ୍ଥିତ ତାଙ୍କ ଭଉଣୀଙ୍କ ଘରେ ଥିଲେ। ଏହାପରେ ସେ ନୟାଗଡ଼ ସୁନାମୁହିଁ ସ୍ଥିତ ତାଙ୍କ ପୈତୃକ ଘରକୁ ଯାଇଥିଲେ। ତେଣୁ ସାଲିଆ ସାହି ସ୍ବାଇଁ ମଦ ଦୋକାନ ଏବଂ ନୟାଗଡ଼ ସୁନାମୁହିଁସ୍ଥିତ ବ୍ୟାଙ୍କର ସିସିଟିଭି ଯାଞ୍ଚ କରାଗଲେ ପ୍ରକୃତ ତଥ୍ୟ ଜଣାପଡ଼ିବ ବୋଲି ଗୀତାଞ୍ଜଳି କୋର୍ଟରେ ବୟାନ ଦେଇଛନ୍ତି। ଅଭିଯୋଗକାରିଣୀଙ୍କ ପକ୍ଷରୁ ଆଇନଜୀବୀ ବ୍ୟୋମକେଶ ତ୍ରିପାଠୀ, କଳିଙ୍ଗ କେଶରୀ ମହାପାତ୍ର ଓ ସରକାରଙ୍କ ତରଫରୁ ଅତିରିକ୍ତ ପବ୍ଲିକ ପ୍ରସିକ୍ୟୁଟର ବିଶ୍ୱଜିତ ବରାଳ ମାମଲା ପରିଚାଳନା କରୁଛନ୍ତି।
