କେନ୍ଦୁଝର, ୩ା୧ (ସ୍ବ.ପ୍ର.)-ଦୁର୍ଘଟଣା ରୋକିବା ପାଇଁ ବିଭିନ୍ନ ପର୍ଯ୍ୟଟନ କେନ୍ଦ୍ର ଗୁଡ଼ିକରେ ସେଲଫି ଫଟୋ ଉଠା ଉପରେ କଟକଣା କରାଯାଇଛି। ଏହା ଛଡା ବାରିକେଡ ବ୍ୟବସ୍ଥା କରାଯାଇ ସତର୍କତା ସୂଚନା ଫଳକ ମରାଯାଇଛି । ଏହା ସତ୍ତ୍ୱେ ଉପଯୁକ୍ତ ତଦାରଖ ଅଭାବରୁ ବିଭିନ୍ନ ପର୍ଯ୍ୟଟନ କେନ୍ଦ୍ରରେ ବିଶେଷ କରି ବିପଦପୂର୍ଣ୍ଣ ଜଳପ୍ରପାତ ଗୁଡ଼ିକରେ ସେଲଫି ଉଠାଉଥିବାରୁ ସବୁବେଳେ ଅଘଟଣ ଆଶଙ୍କା ରହୁଛି। ଏଭଳି ରାଜ୍ୟ ପ୍ରସିଦ୍ଧ କେନ୍ଦୁଝର ଜିଲା ସାନଘାଗରା ଜଳ ପ୍ରପାତରେ ଦେଖିବାକୁ ମିଳିଛି । ନୂଆ ବର୍ଷ ଉପଲକ୍ଷେ ଏହି କେନ୍ଦ୍ରକୁ ହଜାର ହଜାର ସଂଖ୍ୟାରେ ପର୍ଯ୍ୟଟକଙ୍କ ଭିଡ ହେଉଛି । ପ୍ରାକୃତିକ ଜଙ୍ଗଲ ଓ ପରିବେଶର ମନୋରମ ଦୃଶ୍ୟକୁ ବୁଲିବା ସହ ଜଳପ୍ରପାତ ବୁଲିବାକୁ ରାଜ୍ୟ ଓ ରାଜ୍ୟ ବାହାର ପର୍ଯ୍ୟଟକ ଆସୁଛନ୍ତି । ମନୋରମ ଦୃଶ୍ୟକୁ ଓ ସ୍ମୃତିକୁ ସାଉଁଟି ନେବା ପାଇଁ କ୍ୟାମେରାରେ ଫଟୋ ଉଠାଉଛନ୍ତି ଏବଂ ସେଲଫି ନେଉଛନ୍ତି। ତେବେ ସାନଘାଗରାରେ ଆଗରୁ ବାରମ୍ବାର ଦୁର୍ଘଟଣା ଘଟୁଥିବାରୁ ଜଳପ୍ରପାତ ପରିସୀମାକୁ ଷ୍ଟିଲ ବାଡ ଦେଇ ଗାଧୋଇବା ପାଇଁ କଟକଣା କରାଯାଇଛି । କିନ୍ତୁ ଏହା ସତ୍ତ୍ୱେ ପାହାଡ ଉପରେ ଯେଉଁ ଭଳି ଭାବରେ ଉଠି ଫଟୋ ନେଉଛନ୍ତି, ସବୁବେଳେ ବିପଦ ଆଶଙ୍କା ରହୁଛି । ଜଗାରଖା କରୁଥିବା ସୁରକ୍ଷା କର୍ମୀ ମାନେ ଏସବୁକୁ ଧ୍ୟାନ ଦେଉନାହାନ୍ତି କିମ୍ବା ତାଗିଦ କରୁ ନାହାନ୍ତି।
