ଓ୍ବେଲିଂଟନ,୨୨।୨- ସ୍ଥାନୀୟ ବସିନ ରିଜର୍ଭ ଗ୍ରାଉଣ୍ଡରେ ଚାଲିଥିବା ପ୍ରଥମ ଟେଷ୍ଟର ପ୍ରଥମ ଇନିଂସରେ ନ୍ୟୁଜିଲାଣ୍ଡ ଅଗ୍ରଣୀ ହାସଲ କରିଛି। ଭାରତୀୟ ଦଳ ତା’ର ଅସମାପ୍ତ ପ୍ରଥମ ଇନିଂସ ସ୍କୋର (୫/୧୨୨)ରୁ ବ୍ୟାଟିଂ ଆରମ୍ଭ କରି ବଳକା ୫ ଉଇକେଟରେ ୪୩ ରନ୍ ଯୋଡ଼ିଥିଲା। ଫଳରେ ଟିମ୍ ଇଣ୍ଡିଆ ୬୮.୧ ଓଭରରେ ୧୬୫ ରନ୍ରେ ଅଲଆଉଟ୍ ହୋଇଯାଇଥିଲା। ଦଳ ପାଇଁ ଅଜିଙ୍କ୍ୟ ରାହାନେ ୪୬, ରିଷଭ ପନ୍ତ ୧୯ ଓ ମହମ୍ମଦ ଶାମି ୨୧ ରନ୍ କରିଥିଲେ। ଘରୋଇ ଦଳ ପକ୍ଷରୁ ପଦାର୍ପଣକାରୀ କାଇଲ ଜମିସନ ଓ ଟିମ ସୌଦି ୪ଟି ଲେଖାଏ ଉଇକେଟ ଅକ୍ତିଆର କରିଥିଲେ। ଏହାପରେ ଘରୋଇ ନ୍ୟୁଜିଲାଣ୍ଡ ଦଳ ଦିନ ଶେଷ ପର୍ଯ୍ୟନ୍ତ ଖେଳି ୫ ଉଇକେଟ ହରାଇ ୨୧୬ ରନ୍ କରିଛି। କ୍ୟାରିୟରର ୧୦୦ତମ ଟେଷ୍ଟ ଖେଳୁଥିବା ଟେଲର ୪୪ ରନ୍ କରିଥିବାବେଳେ ଅଧିନାୟକ କେନ ଓ୍ବିଲିୟମସନ ୮୯ ରନ୍ କରିଥିଲେ। ଟିମ୍ ଇଣ୍ଡିଆ ଲାଗି ଈଶାନ୍ତ ଶର୍ମା ୩ ଉଇକେଟ ଅଧିକାର କରିଥିବାବେଳେ ଶାମି ଓ ରବିଚନ୍ଦ୍ରନ ଅଶ୍ୱିନ ଗୋଟିଏ ଲେଖାଏ ଉଇକେଟ ହାତେଇଥିଲେ। ନ୍ୟୁଜିଲାଣ୍ଡ ଦଳ ୫୧ ରନ୍ରେ ଆଗୁଆ ଥିବାବେଳେ ହାତରେ ଆହୁରି ୫ ଉଇକେଟ ରଖିଛି।
