ଭୁବନେଶ୍ୱର,୮-୭(ବ୍ୟୁରୋ): ଦେଶର ଅର୍ଥନୈତିକ ଅଭିବୃଦ୍ଧି କ୍ଷେତ୍ରରେ ପ୍ଲାଷ୍ଟିକ ଶିଳ୍ପର ଯୋଗଦାନ ଗୁରୁତ୍ୱପୂର୍ଣ୍ଣ। ଅଟୋଶିଳ୍ପ, ନିର୍ମାଣ, ଇଲେକଟ୍ରୋନିକ୍ସ, ସ୍ବାସ୍ଥ୍ୟସେବା, ବିୟନ, ଏଫ୍ଏମ୍ସିଜି ଭଳି କ୍ଷେତ୍ର ସହ ପ୍ଲାଷ୍ଟିକ ଶିଳ୍ପ ଜଡିତ ରହିଛି। ୨୦୧୮-୧୯ରେ ଦେଶର ମୋଟ୍ ମର୍ଚ୍ଚାଣ୍ଡାଇଜ୍ ରପ୍ତାନି ୩୩୧ ବିଲିୟନ ଡଲାର ରହିଛି। ଏଥିରେ ପ୍ଲାଷ୍ଟିକ ରପ୍ତାନିର ଅଂଶ ୧୦.୮୯ ବିଲିୟନ ଡଲାର। ୨୦୧୭-୧୮ରେ ଏହା ୮.୮୫ ବିଲିୟନ ଡଲାର ଥିବା ବେଳେ ଏଥିରେ ୨୪% ବୃଦ୍ଧି ଘଟିଛି। ଏଭଳିସ୍ଥିତିରେ ସାରା ଦେଶ କଥା ବିଚାର କଲେ ଓଡ଼ିଶା ପ୍ଲାଷ୍ଟିକ କ୍ଲଷ୍ଟର କ୍ଷେତ୍ରରେ ଏକ ପ୍ରମୁଖ ସ୍ଥାନ ହୋଇ ପାରିବ। ପ୍ଲାଷ୍ଟିକ ରପ୍ତାନି ପ୍ରୋତ୍ସାହନ ପରିଷଦ ଏବଂ ରାଜ୍ୟ ସରକାରଙ୍କ ରପ୍ତାନି ପ୍ରୋତ୍ସାହନ ଏବଂ ବିପଣନ ନିର୍ଦ୍ଦେଶାଳୟ ପକ୍ଷରୁ ଅନୁଷ୍ଠିତ ପ୍ଲାଷ୍ଟିକ ରପ୍ତାନି ସଚେତନତା କାର୍ଯ୍ୟକ୍ରମରେ ବିଶେଷଜ୍ଞମାନେ ଏଭଳି ମତ ରଖିଛନ୍ତି। ରାଜ୍ୟରୁ ପ୍ଲାଷ୍ଟିକ ରପ୍ତାନି ପ୍ରୋତ୍ସାହନକୁ ଧ୍ୟାନରେ ରଖି ଏଭଳି କାର୍ଯ୍ୟକ୍ରମ ଆୟୋଜନ କରାଯାଇଥିଲା।
କାର୍ଯ୍ୟକ୍ରମରେ ପ୍ଲାଷ୍ଟିକ ରପ୍ତାନି ପ୍ରୋତ୍ସାହନ ପରିଷଦର ଇଡି ଶ୍ରୀବାସ ଦାସ ମହାପାତ୍ର କହିଛନ୍ତି, ପାରାଦୀପରେ ଇଣ୍ଡିଆନ ଅଏଲର ପଲିପ୍ରପିଲିନ ଫାସିଲିଟି ଏବଂ ପାରାଦୀପରେ ପ୍ରସ୍ତାବିତ ପ୍ଲାଷ୍ଟିକ ପାର୍କ କାର୍ଯ୍ୟକ୍ଷମ ହେଲେ ରାଜ୍ୟ ପ୍ଲାଷ୍ଟିକ ରପ୍ତାନିର ପ୍ରମୁଖ ସ୍ଥାନ ଗ୍ରହଣ କରିବ। କେଉଁ ଦେଶଗୁଡିକୁ ପ୍ଲାଷ୍ଟିକ ରପ୍ତାନିର ସୁଯୋଗ ରହିଛି ତାହା ସେମିନାର ମାଧ୍ୟମରେ ସଚେତନ କରାଯାଉଛି। ବାଣିଜ୍ୟ ମନ୍ତ୍ରଣାଳୟ ଅଧିନରେ ବିଭିନ୍ନ ପ୍ରୋତ୍ସାହନ ପଦକ୍ଷେପ ରପ୍ତାନିକାରୀଙ୍କ ଲାଗି ନିଆଯାଉଥିବା ଇଡି ମହାପାତ୍ର କହିଛନ୍ତି। ଜଗତୀକରଣ ଯୋଗୁ ବିଶ୍ୱ ବଜାରରେ ପ୍ରତିଦ୍ୱନ୍ଦ୍ୱିତା ବଢିଥିବାରୁ କମ୍ପାନୀ ଗୁଡିକ ବିଦେଶରେ ମଧ୍ୟ ରପ୍ତାନି ସୁଯୋଗ ସ୍ଥିତିକୁ ବିଚାର କରିବାର ସମୟ ଆସିଥିବା ପରିଷଦର ଆଞ୍ଚଳିକ ଅଧ୍ୟକ୍ଷ ପ୍ରସନ୍ନ ଲୋହିଆ ସୂଚନା ଦେଇଥିଲେ। ସେହିଭଳି ରପ୍ତାନିର ସୁଯୋଗ ରାଜ୍ୟର ଏମ୍ଏସ୍ଏମ୍ଇଗୁଡିକ ନେବା ଆବଶ୍ୟକ ବୋଲି ପ୍ରଶାସନିକ କମିଟିର ସଦସ୍ୟ ଅମିତ ପାଲ୍ କହିଛନ୍ତି।
