ଭୁବନେଶ୍ୱର,୧୬ା୯(ବ୍ୟୁରୋ) : ଓଡ଼ିଶା ଏକ ପ୍ରାକୃତିକ ବିପର୍ଯ୍ୟୟ ପ୍ରବଣ ରାଜ୍ୟ। ନିୟମିତ ବ୍ୟବଧାନରେ ବିଭିନ୍ନ ବିପର୍ଯ୍ୟୟ ଦ୍ୱାରା ରାଜ୍ୟ ବହୁଳ ଭାବେ ପ୍ରଭାବିତ ହୋଇଥାଏ। ତେଣୁ ଏହାର ସଫଳ ମୁକାବିଲା ଏବଂ ବିପର୍ଯ୍ୟୟ ଜନିତ କ୍ଷୟକ୍ଷତି ହ୍ରାସ ପାଇଁ ରାଜ୍ୟରେ ସ୍ବତନ୍ତ୍ର ଗ୍ରୀଡ୍ ପ୍ରତିଷ୍ଠା କରାଯିବ। ଏହି ଗ୍ରୀଡ୍ର ରାଜ୍ୟ ମୁଖ୍ୟାଳୟ ରହିବା ସହ ଦକ୍ଷିଣ, ପଶ୍ଚିମ ଓ ଉତ୍ତର ପ୍ରାନ୍ତରେ ସ୍ବତନ୍ତ୍ର କେନ୍ଦ୍ର ରହିବ। ଓଡ଼ିଶା ଗସ୍ତରେ ଥିବା ଜାତୀୟ ବିପର୍ଯ୍ୟୟ ପ୍ରଶମନ ବଳ(ଏନ୍ଡିଆର୍ଏଫ୍) ଡିଜି ସତ୍ୟନାରାୟଣ ପ୍ରଧାନ ରବିବାର ଏହି ସୂଚନା ଦେଇଛନ୍ତି। ମୁଣ୍ଡୁଳିଠାରେ ଏହାର ମୁଖ୍ୟାଳୟ ହେବ ବୋଲି ଜଣାପଡିଛି। ଏହି ସ୍ଥାନରୁ ସବୁ ସ୍ଥାନକୁ ବିପର୍ଯ୍ୟୟ ସମୟରେ ଯାତାୟାତ ସୁବିଧାଜନକ ହେବ ବୋଲି ମନେ କରାଯାଉଛି। ସେହିପରି ବିପର୍ଯ୍ୟୟ ପରିଚାଳନା ବ୍ୟତୀତ ଏବେ ଠିକ୍ ଭାବେ ସହରାଞ୍ଚଳ ନିର୍ମାଣ କରିବାର ସମୟ ଆସିଥିବା ପ୍ରଧାନ କହିଛନ୍ତି। ଅଧିକରୁ ଅଧିକ ବିପର୍ଯ୍ୟୟ ପ୍ରତିରୋଧ ନିର୍ମାଣ ଉପରେ ସେ ଗୁରୁତ୍ୱାରୋପ କରିଛନ୍ତି। ଏହା ଦ୍ୱାରା ସହରାଞ୍ଚଳରେ ହେଉଥିବା ବନ୍ୟା ଏବଂ କ୍ଷୟକ୍ଷତିକୁ ରୋକାଯାଇ ପାରିବ। ପବନର ଗତିରୋଧକୁ ନିୟନ୍ତ୍ରଣ କରିପାରୁଥିବା ଜଙ୍ଗଲ ସୃଷ୍ଟି ଉପରେ ମଧ୍ୟ ସେ ଗୁରୁତ୍ୱ ଦେଇଛନ୍ତି। ଖୁବଶୀଘ୍ର ବାଂଲାଦେଶ, ଭାରତ,ମ୍ୟାନମାର, ଶ୍ରୀଲଙ୍କା ଏବଂ ଥାଇଲାଣ୍ଡ(ବିଆଇଏମ୍ଏସ୍ଟି) ରାଜ୍ୟରେ ମିଳିତଭାବେ ସମରାଭ୍ୟାସ କରିବେ ବୋଲି ମଧ୍ୟ ସତ୍ୟ ନାରାୟଣ ସୂଚନା ଦେଇଛନ୍ତି।
