ଭୁବନେଶ୍ବର, ୨୩ା୯,(ସ୍ପୋଟର୍ସ ବ୍ୟୁରୋ):ପଶ୍ଚିମବଙ୍ଗର ଆସାନସୋଲରେ ଚାଲିଥିବା ଷଷ୍ଠ ପୂର୍ବାଞ୍ଚଳ ବନ୍ଧୁକଚାଳନା ପ୍ରତିଯୋଗିତାରେ ଓଡିଶାର ପ୍ରତିଯୋଗୀ ଅଦ୍ଭୂତପୂର୍ବ ସଫଳତା ହାସଲ କରିଛନ୍ତି। ଏହି ପ୍ରତିଯୋଗିତାରେ ଓଡ଼ିଶାରୁ ୫୩ ଜଣ ପ୍ରତିଯୋଗୀ ବିଭିନ୍ନ ବର୍ଗରେ ଭାଗ ନେଇଥିଲେ। ଏହା ମଧ୍ୟରୁ ୧୨ ଜଣ ପୁରୁଷ ଓ ୯ ଜଣ ମହିଳା ଜାତୀୟ ପ୍ରତିଯୋଗିତା ପାଇଁ ଯୋଗ୍ୟତା ଅର୍ଜନ କରିଛନ୍ତି। ପ୍ରତିଯୋଗୀ ମାନଙ୍କ ମଧ୍ୟରୁ ତ୍ରିଶ ପାଣିଗ୍ରାହୀ ଏୟାର ରାଇଫଲ ଜୁନିୟର ଓ ସବ୍ ଜୁନିୟର ବର୍ଗରେ ଦୁଇଟି ସ୍ବର୍ଣ୍ଣ ହାସଲ କରିଥିଲେ। ଏୟାର ପିସ୍ତଲ ବର୍ଗରେ ଦିଲୀପ କୁମାର ପାଢୀ,ରଶ୍ମୀ ଭଟ୍ଟ, ୫୦ ମିଟର ରାଇଫଲ ପ୍ରୋନ ବର୍ଗରେ ଭଗବାନ ବେହେରା ସ୍ବର୍ଣ୍ଣ ପଦକ ହାସଲ କରିଥିଲେ। ୨୫ ମିଟର ଷ୍ଟାଣ୍ଡାର୍ଡ ପିସ୍ତଲ ଡାଃ ସତ୍ୟଜିତ ସାହୁ ରୌପ୍ୟ ପଦକ ବିଜୟୀ ହୋଇଥିବା ବେଳେ ତନିଷ୍କା ସାମନ୍ତ ଗୋଟିଏ ଲେଖାଏ ରୌପ୍ୟ ଓ ବ୍ରୋଞ୍ଜ ଜିତିଛନ୍ତି। ଓଡ଼ିଶା ସମୁଦାୟ ୫ ସ୍ବର୍ଣ୍ଣ, ୨ ରୌପ୍ୟ, ଓ ୧ ବ୍ରୋଞ୍ଜ ବିଜୟୀ ହୋଇଛି। ଏହି ସଫଳତା ନିମନ୍ତେ ଓଡିଶା ରାଇଫଲ ସଂଘର ସଭାପତି ଅନଙ୍ଗ ଉଦୟ ସିଂହଦେଓ, ପୃଷ୍ଠପୋଷକ କଳିକେଶ ନାରାୟଣ ସିଂହଦେଓ, ସମ୍ପାଦକ ଡାଃ ହରି ପ୍ରସାଦ ପଟ୍ଟନାୟକ, କୋଷଧକ୍ଷ ଗୌରୀ ମହାନ୍ତି, ଯୁଗ୍ମ ସମ୍ପାଦକ ବଳଭଦ୍ର ଦାସ, କୋଚ ଆଶିଷ ନାୟକ ପ୍ରମୁଖ ଶୁଭଛା ଜଣାଇଛନ୍ତି।
