ଭୁବନେଶ୍ୱର,୧୧ା୧(ବ୍ୟୁରୋ): ପାରମ୍ପରିକ ସହ ଫ୍ୟୁଜନ୍ର ଝଲକ। ପ୍ରତି ପୋଷାକରେ ଥିଲା ଏକ କାହାଣୀ। ପଟଚିତ୍ରରୁ ଆରମ୍ଭ କରି ସମ୍ବଲପୁରୀ ପର୍ଯ୍ୟନ୍ତ, ପ୍ରତ୍ୟେକ ଡିଜାଇନ୍ରେ ଓଡ଼ିଶାର ଉତ୍କୃଷ୍ଟ କଳା ଓ କାରିଗରିର ଝଲକ ଦେଖିବାକୁ ମିଳିଥିଲା। ୟୁନିଟ୍-୩ସ୍ଥିତ ଇଡ୍କୋ ପ୍ରଦର୍ଶନୀ ପଡ଼ିଆରେ ଚାଲିଥିବା ଏମ୍ଏସ୍ଏମ୍ଇ ଅନ୍ତର୍ଜାତୀୟ ବାଣିଜ୍ୟ ମେଳା ୨୦୨୦ରେ ଶୁକ୍ରବାର ସନ୍ଧ୍ୟାରେ ଏଭଳି ଏକ ନିଆରା ଫ୍ୟାଶନ ଶୋ ଆୟୋଜିତ ହୋଇଯାଇଛି। ଦେଶ ତଥା ଦେଶ ବାହାରୁ ଆସିଥିବା ପ୍ରତିନିଧିମାନଙ୍କୁ ଓଡ଼ିଶାର ଉତ୍କୃଷ୍ଟ ହସ୍ତତନ୍ତ ସମ୍ପର୍କରେ ଅବଗତ କରାଇବା ସହ ଏହାର ପ୍ରଚାର ପ୍ରସାର ଉଦ୍ଦେଶ୍ୟରେ ଓଡ଼ିଶା ଆସୋସିଏଶନ୍ ଅଫ୍ ସ୍ମଲ୍ ଆଣ୍ଡ୍ ମିଡିୟମ୍ ଏଣ୍ଟରପ୍ରାଇଜେସ୍(ଓଏଏସ୍ଏମ୍ଇ) ଆପାରେଲ୍ ଗ୍ରୁପ୍ ପକ୍ଷରୁ ଆୟୋଜିତ ହୋଇଥିଲା ଓଡ଼ିଶା ଏଥ୍ନିକ୍ ଫ୍ୟାଶନ୍ ଶୋ। ମୋଟ ୫ଟି ରାଉଣ୍ଡରେ ‘ଇକୋଫ୍ରେଣ୍ଡ୍ଲି ସଷ୍ଟେନେବୁଲ ଫ୍ୟାଶନ’ ବା ‘ପରିବେଶ ଉପଯୋଗୀ ଫ୍ୟାଶନ’ ଥିମ୍ ଉପରେ ଏକାଧିକ ଆକର୍ଷଣୀୟ ପୋଷାକ ପ୍ରଦର୍ଶିତ ହୋଇଥିଲା। ଓଡ଼ିଶାର ହସ୍ତତନ୍ତକୁ ନେଇ ଆୟୋଜିତ ଏହି ଶୋ’ର ମୁଖ୍ୟ ଫୋକସ୍ ରହିଥିଲା ସମ୍ବଲପୁରୀ ପୋଷାକ। ଜ୍ୟୋତ୍ସ୍ନା ଦାସଙ୍କ ‘ବିଭାବରୀ’, ‘ଉତ୍କଳ ଅମ୍ରିତା’, ‘ଶୁଚି ନନ୍ଦ ବୁଟିକ୍’, ‘ମ୍ରିଗିକା’ ଏବଂ ଚୈତାଳୀ ମିଶ୍ରଙ୍କ ‘ସାଥୀ’ ଦ୍ୱାରା ପ୍ରସ୍ତୁତ ଇଣ୍ଡିଆନ୍ ଏବଂ ଇଣ୍ଡୋ ଓ୍ବେଷ୍ଟର୍ନ ଡିଜାଇନ୍ ଉପସ୍ଥିତ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା। ମୋଟ ୮ ମଡେଲ୍ ଇଣ୍ଡୋ ଓ୍ବେଷ୍ଟର୍ନ କଲେକ୍ସନ ସହ ପଟଚିତ୍ର ଶାଢ଼ି ଓ ହ୍ୟାଣ୍ଡ୍ ପେଣ୍ଟେଡ୍ ଶାଢ଼ି ପିନ୍ଧି ର଼୍ୟାମ୍ପ୍ରେ ଚାଲିଥିଲେ।
