ନୂଆଦିଲ୍ଲୀ,୯ା୬: ଭାରତର ରାଷ୍ଟ୍ରପତି, ଉପରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଗସ୍ତ ଲାଗି ଆସନ୍ତା ସେପ୍ଟେମ୍ବର ସୁଦ୍ଧା ଏୟାର ଇଣ୍ଡିଆକୁ ବୋଇଂ କମ୍ପାନୀ ଦୁଇଟି ଅତ୍ୟାଧୁନିକ ବି୭୭୭ ବିମାନ ଯୋଗାଇଦେବ। ଜୁଲାଇରେ ଏହି ବିମାନ ମିଳିବାକୁ ଥିବାବେଳେ କୋଭିଡ୍-୧୯ କାରଣରୁ ବିଳମ୍ବ ହୋଇଥିବା ଜଣେ ଅଧିକାରୀ କହିଛନ୍ତି। ଉକ୍ତ ବିମାନକୁ ଭାରତୀୟ ବାୟୁସେନାର ପାଇଲଟ ଉଡାଇବେ। ଏହାର ପରିଚାଳନା ଓ ରକ୍ଷଣାବେକ୍ଷଣ ଏୟାର ଇଣ୍ଡିଆ ଇଞ୍ଜିନିୟରିଂ ସର୍ଭିିସେସ୍ ଲିମିଟେଡ୍ କରିବ। ସମ୍ପ୍ରତି ରାଷ୍ଟ୍ରପତି, ଉପରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଯାତ୍ରା ପାଇଁ ଏୟାର ଇଣ୍ଡିଆର ବି୭୪୭ ବିମାନ ବ୍ୟବହୃତ ହେଉଛି, ଯାହା ଏୟାର ଇଣ୍ଡିଆ ଓ୍ବାନ୍ ଭାବେ ନାମିତ ହୋଇଛି।
ନୂଆ ବିମାନ ବି୭୭୭ର ବିଶେଷତ୍ୱ ହେଲା ଏଥିରେ ଅତ୍ୟାଧୁନିକ ମିଶାଇଲ ଡିଫେନ୍ସ ସିଷ୍ଟମ ଏବଂ ସେଲ୍ଫ ପ୍ରୋଟେକ୍ସନ ସୁଟ୍ ରହିଛି, ଯାହା ବିମାନକୁ ଶତ୍ରୁ ଆକ୍ରମଣରୁ ସୁରକ୍ଷିତ ରଖିପାରିବ। ୧୯୦ ନିୟୁତ ଡଲାର ମୂଲ୍ୟରେ ଦୁଇଟି ଡିଫେନ୍ସ ସିଷ୍ଟମ ଯୋଗାଇଦେବା ଲାଗି ଆମେରିକା ଫେବୃୟାରୀରେ ରାଜି ହୋଇଥିଲା।
