ଭୁବନେଶ୍ୱର,୧୪-୭(ବ୍ୟୁରୋ): ଦେଶର ଜିଡିପି ଅଭିବୃଦ୍ଧି କ୍ଷେତ୍ରରେ ଅଣୁକ୍ଷୁଦ୍ର ମଧ୍ୟମ ଉଦ୍ୟୋଗ (ଏମ୍ଏସ୍ଏମ୍ଇ) ଗୁଡିକ ପ୍ରମୁଖ ଅଂଶୀଦାର ହୋଇପାରିବେ। ବର୍ତ୍ତମାନ ସ୍ଥିତିରେ ଏହି ଶିଳ୍ପଗୁଡିକର ଜିଡିପିକୁ ଯୋଗଦାନ ନଗଣ୍ୟ ରହିଛି। ଏଭଳି ସ୍ଥିତିକୁ ଧ୍ୟାନରେ ରଖି ଏମ୍ଏସ୍ଏମ୍ଇଗୁଡିକର ସଶକ୍ତୀକରଣ ଜରୁରୀ ବୋଲି ସିଏସ୍ଆଇଆର୍-ଆଇଏମ୍ଏମ୍ଟି ପକ୍ଷରୁ ଭିଜନ ଓଡ଼ିଶା ସଂକ୍ରାନ୍ତ କାର୍ଯ୍ୟକ୍ରମରେ ଏହା ମତ ପ୍ରକାଶ ପାଇଛି। ପ୍ରତିଷ୍ଠାନ ପରିସରରେ ଅନୁଷ୍ଠିତ କାର୍ଯ୍ୟକ୍ରମରେ ରାଜ୍ୟର ଏମ୍ଏସ୍ଏମ୍ଇଗୁଡିକୁ ବିକାଶ ନେଇ ବିଭିନ୍ନ ଆଲୋଚନା ହୋଇଥିଲା। ସିଏସ୍ଆଇଆର୍ ଆନୁକୂଲ୍ୟରେ ଆୟୋଜିତ ଉକ୍ତ କାର୍ଯ୍ୟକ୍ରମରେ ରାଜ୍ୟରେ କ୍ଷୁଦ୍ରଶିଳ୍ପର ବିକାଶ ନେଇ ସିଏସ୍ଆଇଆର୍ ଲାବରୋଟୋରୀ, ଓଡ଼ିଶା ସରକାର ଏବଂ ୟୁଏନ୍ଆଇଡିଓ ମଧ୍ୟରେ ଉତ୍ତମ ସମନ୍ବୟ ରକ୍ଷା ଉପରେ ଗୁରୁତ୍ୱ ଦିଆଯାଇଥିଲା। ଏଥିରେ ପେଟେଣ୍ଟ ଦୃଢିକରଣ, ନୂତନ ଜ୍ଞାନକୌଶଳ ବ୍ୟବହାର, ଦକ୍ଷତା ବିକାଶ, ଏମ୍ଏସ୍ଏମ୍ଇ ଊତ୍ପାଦଗୁଡିକର ସିଏସ୍ଆଇଆର ଅଧୀନରେ ବ୍ରାଣ୍ଡିଂ, ପରୀକ୍ଷା ପ୍ରମାଣପତ୍ର ପ୍ରଦାନ ଉପରେ ଏଠାରେ ଆଲୋଚନା କରାଯାଇଥିଲା।
ସିଏସ୍ଆଇଆର୍ ଲ୍ୟାବ ସହାୟତାରେ ୟୁଏନ୍ଆଇଡିଓ କ୍ଷୁଦ୍ରଶିଳ୍ପ ଲାଗି ବିଭିନ୍ନ ପଦକ୍ଷେପ ଗ୍ରହଣ ଉପରେ ଏଠାରେ ମତ ପ୍ରକାଶ ପାଇଛି। ସେହିଭଳି ଭିଜନ ପେପରକୁ ରାଜ୍ୟ ସରକାରଙ୍କୁ ପ୍ରଦାନ କରାଯିବା ନେଇ ନିଷ୍ପତ୍ତି ହୋଇଛି। ଭିଜନ ପେପରରେ ଜଳ ସଂରକ୍ଷଣ, ଭୂତଳ ଜଳ ପରିଚାଳନା, ଶିଳ୍ପ ସଂସ୍ଥାଗୁଡିକର ବର୍ଜ୍ୟ ପରିଚାଳନା, ପରିବେଶ ଉପଯୋଗୀ ଡାଉନଷ୍ଟ୍ରିମ ଶିଳ୍ପ, ପରିବେଶ ଉପଯୋଗି ଶକ୍ତି ପରିଚାଳନା ଭଳି ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡିକ ଉପରେ ଗୁରୁତ୍ୱାରୋପ କରାଯାଇଛି। ସିଏସ୍ଆଇଆର୍ ମହାନିର୍ଦ୍ଦେଶକଙ୍କ ପରାମର୍ଶଦାତା ଡ.ଡି. ସେନଗୁପ୍ତା କାର୍ଯ୍ୟକ୍ରମକୁ ଶୁଭାରମ୍ଭ କରିଥିଲେ। ପ୍ରଫେସର ନିର୍ଦ୍ଦେଶକ ଏସ୍. ବାସୁଙ୍କ ସମେତ ୧୨ ସିଏସ୍ଆଇଆର୍ ଲାବୋରେରଟେରୀର ବରିଷ୍ଠ ବୈଜ୍ଞାନିକ ଏବଂ ନିର୍ଦ୍ଦେଶକମାନେ କାର୍ଯ୍ୟକ୍ରମରେ ଅଂଶ ଗ୍ରହଣ କରିଥିଲେ। ସରକାରଙ୍କ ବିଭିନ୍ନ ବିଭାଗର ଅଧିକାରୀମାନେ ଏଠାରେ ଉପସ୍ଥିତ ଥିଲେ।
