ନାଉଗାଁ , ୬।୨ (ସ୍ବ.ପ୍ର.): ଏମ୍ଜିଏନ୍ଆର୍ଇଜିଏସ୍ ମାଧ୍ୟମରେ କରାଯାଉଥିବା ବିଭିନ୍ନ କାର୍ଯ୍ୟର ସୂଚନା ଓ ତଦାରଖ ବ୍ଲକ ଏପିଓ (ଆଡିସନାଲ୍ ପ୍ରୋଗ୍ରାମ୍ ଅଫିସର୍) କରିଥାନ୍ତି। ଏମ୍ଜିଏନ୍ଆର୍ଇଜିଏସ୍ରେ ଏପିଓ ଏକ ଗୁରୁତ୍ୱପୂର୍ଣ୍ଣ ପଦବୀ ହୋଇଥିବା ବେଳେ ନାଉଗାଁ ବ୍ଲକରେ ଜଣେ ଜିଆର୍ଏସ୍ ଏପିଓ ଦାୟିତ୍ୱ ତୁଲାଉଛନ୍ତି। ୩ ମାସ ହେବ ନାଉଗାଁ ବ୍ଲକ ପୂର୍ବତନ ଏପିଓ ଜ୍ୟୋତିପ୍ରକାଶ ନାୟକଙ୍କୁ ଜଗତ୍ସିଂହପୁର ବ୍ଲକକୁ ବଦଳି କରିଦିଆଯାଇଥିବା ବେଳେ ଜିଆର୍ଏସ୍ଙ୍କୁ ଏପିଓ ଦାୟିତ୍ୱ ଦିଆଯାଇଛି। ଏ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଥିବା ବେଳେ ଜିଆର୍ଏସ୍ମାନେ ବି ଏପିଓଙ୍କ କାର୍ଯ୍ୟ କରିପାରିବେ ବୋଲି ଜଗତ୍ସିଂହପୁର ଗ୍ରାମ୍ୟ ଉନ୍ନୟନ ବିଭାଗ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି କହିଛନ୍ତି। ଏହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏପିଓଙ୍କ ଶିକ୍ଷାଗତ ଯୋଗ୍ୟତା ସର୍ବନିମ୍ନ ଗ୍ରାଜୁଏଶନ ସହ ମ୍ୟାନେଜମେଣ୍ଟ କୋର୍ସ କିମ୍ବା ଏମ୍ଏସ୍ଡବ୍ଲ୍ୟୁ ରହିଥିବା ବେଳେ ଜିଆର୍ଏସ୍ଙ୍କ ଶିକ୍ଷାଗତ ଯୋଗ୍ୟତା ଯୁକ୍ତ ୨ ସହ କମ୍ପ୍ୟୁଟର ଜ୍ଞାନ ରହିଛି। ତେବେ ଜିଆର୍ଏସ୍ମାନେ କିଭଳି ଏପିଓଙ୍କ ଦାୟିତ୍ୱ ତୁଲାଇବେ ସେ ନେଇ ସ୍ଥାନୀୟ ଲୋକେ ଅସନ୍ତୋଷ ବ୍ୟକ୍ତ କରିଛନ୍ତି।
ପ୍ରକାଶ ଯେ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ କାର୍ଯ୍ୟାଳୟ ପକ୍ଷରୁ ପତ୍ର ସଂଖ୍ୟା-୧୮୪୩୧, ତା-୧୭।୧୦।୨୦୧୯ରେ ଜିଆରଏସ୍ମାନଙ୍କ ବଦଳି ପାଇଁ ନିର୍ଦ୍ଦେଶନାମା ଜାରି କରାଯାଇଥିବା ବେଳେ ଜିଲା ଭିତରେ ଏମାନଙ୍କ ବଦଳି କରିବାକୁ ଜିଲା ଗ୍ରାମ୍ୟ ଉନ୍ନୟନ ସଂସ୍ଥା କାର୍ଯ୍ୟାଳୟ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି। ଏହା ବଳରେ ବ୍ଲକ ପ୍ରଶାସନ ଜିଆରଏସ୍ମାନଙ୍କୁ ବଦଳି କରିଥିବା ବେଳେ କେତେଜଣ ଏହାକୁ ସ୍ଥଗିତ ରଖିବା ପାଇଁ ନ୍ୟାୟାଳୟର ଦ୍ୱରସ୍ଥ ହୋଇଛନ୍ତି। ଅନ୍ୟମାନେ କାର୍ଯ୍ୟରେ ଯୋଗଦେଇଥିବା ଜଣାପଡ଼ିଛି। ତିର୍ତ୍ତୋଲ ଓ ବାଲିକୁଦା ବ୍ଲକ ଅଞ୍ଚଳର ୨ଜଣ ଜିଆର୍ଏସ୍ଙ୍କୁ ନାଉଗାଁ ବଦଳି କରାଯାଇଛି। ତିର୍ତ୍ତୋଲର ଶୁଭେନ୍ଦୁ ମୁଦୁଲିଙ୍କୁ ନାଉଗାଁ ର ବଛାଳୋ ଓ ବାଲିକୁଦା ବ୍ଲକର ରାଜକିଶୋର ପରିଡ଼ାଙ୍କୁ ଡାବର ପଞ୍ଚାୟତରେ କାର୍ଯ୍ୟ କରିବା ପାଇଁ ନିର୍ଦ୍ଦେଶ ରହିଛି। କିନ୍ତୁ ବଛାଳୋରେ ଶୁଭେନ୍ଦୁ ଯୋଗଦେଇ ନ ଥିବା ବେଳେ ରାଜକିଶୋର ପରିଡ଼ା ଡାବରରେ ଯୋଗଦେଇଛନ୍ତି। ହେଲେ ରାଜକିଶୋର ପଞ୍ଚାୟତ ଦାୟିତ୍ୱ ନ ନେଇ ବ୍ଲକରେ ଏପିଓଙ୍କ କାର୍ଯ୍ୟ ସମ୍ଭାଳୁଛନ୍ତି। ବ୍ଲକରେ ଅନ୍ୟାନ୍ୟ ଉଚ୍ଚ ପଦ ପଦବୀ ଅଧିକାରୀ ରହିଥିଲେ ବି ଜଣେ ଜିଆରଏସ୍ଙ୍କୁ ଏପିଓ ଦାୟିତ୍ୱ ଦିଆଯାଇଥିବା ନେଇ ଜୋର୍ଦାର୍ ଚର୍ଚ୍ଚା ହେଉଛି। ଅପରପକ୍ଷେ ଉକ୍ତ ବ୍ଲକ ଅଧୀନ ବିଭିନ୍ନ ପଞ୍ଚାୟତରେ ଏମ୍ଜିଏନ୍ଆର୍ଇଜିଏସ୍ ଠିକ୍ ଭାବେ କାର୍ଯ୍ୟକାରୀ କରାଯାଉ ନ ଥିବା ଅଭିଯୋଗ ହେଉଛି। ଏ ସମ୍ପର୍କରେ ଜଗତ୍ସିଂହପୁର ଗ୍ରାମ୍ୟ ଉନ୍ନୟନ ବିଭାଗ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତିଙ୍କୁ ପଚାରିବାରେ, ଜିଆର୍ଏସ୍ମାନେ ଉକ୍ତ ପଦବୀରେ ରହିଲେ କୌଣସି ଅସୁବିଧା ନାହିଁ। ସେମାନେ ବି ଏପିଓ କାର୍ଯ୍ୟ କରିପାରିବେ ବୋଲି କହିଛନ୍ତି।
