ଦେଶର ବିଭିନ୍ନ ସ୍ଥାନରେ ବିଜୟାଦଶମୀରେ ରାବଣ ପୋଡି ସହ ଦଶହରା ଶେଷ ହେଉଥିବାବେଳେ ଛତିଶଗଡ଼ରେ ଏହି ପର୍ବରେ କିଛି ଭିନ୍ନତା ଦେଖିବାକୁ ମିଳେ। ଏହି ରାଜ୍ୟର କେତେକ ଅଞ୍ଚଳରେ ଦଶହରାରର ପୂଜା ବିଧି ଓ ରାବଣ ପୋଡିକୁ ନେଇ ଅଜବ ପରମ୍ପରା ପ୍ରଚଳିତ ରହିଛି। ମୁଖ୍ୟତଃ ବସ୍ତର ଦଶହରା ୭୫ ଦିନ ଧରି ପାଳନ କରାଯାଏ। ଏହି ପର୍ବରେ ରାବଣ କି ରାମଙ୍କର କିଛି ବି ସମ୍ବନ୍ଧ ନ ଥାଏ। ବସ୍ତର ଦଶହରାରେ କେବଳ ମା’ ଦନ୍ତେଶ୍ୱରୀଙ୍କୁ ପୂଜା କରାଯାଏ ଓ ରଥଯାତ୍ରା ଅନୁଷ୍ଠିତ ହୁଏ। ପୂରା ଦଶହରାରେ ୨୧ଟି ବିଧି ପାଳନ କରାଯାଏ। ଏହି ଅବସରରେ ଶ୍ରୀକ୍ଷେତ୍ର ପୁରୀରେ ଅନୁଷ୍ଠିତ ରଥଯାତ୍ରା ଭଳି ରଥଯାତ୍ରାର ଆୟୋଜନ କରାଯାଏ। ୬୦୦ ବର୍ଷ ପୂର୍ବେ ବସ୍ତରର ରାଜା ପୁରୀରେ ଶ୍ରୀଜଗନ୍ନାଥଙ୍କ ଆଶୀର୍ବାଦ ଲାଭ କରି ଫେରିବା ପରେ ଏହି ରଥଯାତ୍ରାର ଆୟୋଜନ କରିଥିଲେ, ଯାହା ଏବେ ପାଳନ କରାଯାଉଛି। ରଥଯାତ୍ରାରେ ବହୁ ଦେବଦେବୀଙ୍କୁ ରଥାରୂଢ଼ କରାଯାଏ। ସେହିଭଳି ଛତିଶଗଡ଼ର ବାଲୋଦ ଜିଲା ଗୁରୁର୍ ଗ୍ରାମରେ ଶାର୍ଟ, ପ୍ୟାଣ୍ଟ ଓ ଟାଇ ପିନ୍ଧିଥିବା ୧୦୦ ବର୍ଷର ପୁରୁଣା ରାବଣ ମୂର୍ତ୍ତିକୁ ପଣ୍ଡିତ, ସଙ୍ଗୀତପ୍ରେମୀ ଓ ଚିକିତ୍ସକ ଭାବେ ଗ୍ରହଣ କରି ଲୋକମାନେ ତାହାକୁ ଦହନ ନ କରି ପୂଜା କରୁଛନ୍ତି। ଏହାବାଦ୍ ଧମତରୀ ଜିଲାର ସୋନାମଗର ଗାଁରେ ଲୋକମାନେ କଞ୍ଚାମାଟିରେ ରାବଣର ଅର୍ଦ୍ଧନଗ୍ନ ପ୍ରତିମୂର୍ତ୍ତି ତିଆରି କରନ୍ତି। ମା’ ଶୀତଳା ମନ୍ଦିରରୁ ଖଣ୍ଡା ଅଣ ିସେହି ପ୍ରତିମୂର୍ତ୍ତିକୁ ଖଣ୍ଡ ଖଣ୍ଡ କରନ୍ତି। ଲୋକମାନେ ରାବଣ ଉପରେ ମଧ୍ୟ ଆକ୍ରମଣ କରି ମାଟିକୁ ଘରକୁ ନେଇଯିବା ପରେ ଦଶହରା ଶେଷ ହୋଇଥାଏ।
