ଭୁବନେଶ୍ୱର,୧୭।୪(ବ୍ୟୁରୋ): ମାର୍ଚ୍ଚ ୨୫ ତାରିଖରୁ ସମଗ୍ର ଦେଶରେ ଲକ୍ଡାଉନ ଜାରି ରହିଛି। ବନ୍ଦ ଯୋଗୁ ଜନସାଧାରଣ ସେମାନଙ୍କର ବିଦ୍ୟୁତ୍ ବିଲ୍ ନିର୍ଦ୍ଧାରିତ ସମୟରେ ପଇଠ କରିନାହାନ୍ତି। ଲକ୍ଡାଉନକୁ ଦେଖି ସେଣ୍ଟ୍ରାଲ ଇଲେକ୍ଟ୍ରିସିଟି ସପ୍ଲାଏ ୟୁଟିିଲିଟି(ସେସୁ) ଉପଭୋକ୍ତାଙ୍କ ପାଇଁ ମାର୍ଚ୍ଚ ଏବଂ ଏପ୍ରିଲ ମାସ ଲାଗି ଅତିରିକ୍ତ ୪ ପ୍ରତିଶତ ରିହାତି ଦେବାକୁ ଘୋଷଣା କରିଛି। ଯେଉଁ ଉପଭୋକ୍ତାମାନେ ମାର୍ଚ୍ଚ ମାସର ବିଲ୍ ନିର୍ଦ୍ଧାରିତ ସମୟ ଅର୍ଥାତ୍ ସେହି ମାସର ୨୧ରୁ ୩୧ ତାରିଖ ମଧ୍ୟରେ ପଇଠ କରିନାହାନ୍ତି ସେମାନଙ୍କୁ ମଧ୍ୟ ଏହି ସୁବିଧା ଉପଲବ୍ଧ ହେବ। ପୂର୍ବରୁ ଥିବା ରିହାତି ଉପରେ ଏହି ଅତିରିକ୍ତ ୪ ପ୍ରତିଶତ ରିହାତି ପ୍ରଦାନ କରାଯିବ। ଏପ୍ରିଲରେ ବିଲ୍ ପୈଠ କଲେ ବିଦ୍ୟୁତ ଉପଭୋକ୍ତା ଏହି ସୁବିଧା ପାଇପାରିବେ। ଏ ନେଇ ଗୁରୁବାର ସେସୁ ପକ୍ଷରୁ ଏକ ବିଜ୍ଞପ୍ତି ପ୍ରକାଶ କରାଯାଇଛି। ପ୍ରକାଶିତ ବିଜ୍ଞପ୍ତିରେ କୁହାଯାଇଛି ଯେ, ଲକ୍ଡାଉନ ସମୟରେ ସେସୁ ପକ୍ଷରୁ ୨୭ ଲକ୍ଷ ପରିବାରଙ୍କୁ ୨୪ ଘଣ୍ଟିଆ ନିରବଚ୍ଛିନ୍ନ ବିଦ୍ୟୁତ୍ ସେବା ଯୋଗାଇ ଦିଆଯାଇଛି। ସେସୁର ରାଜ୍ୟରେ ଥିବା ୩୦୦ କାର୍ଯ୍ୟାଳୟର ୮୦୦ କର୍ମଚାରୀଙ୍କ ଦିନରାତି ପରିଶ୍ରମ ଯୋଗୁ ଏହା ସମ୍ଭବ ହୋଇପାରିଛି। ବିଦ୍ୟୁତ ଦେୟ ଡିଜିଟାଲ ମୋଡ୍ରେ ହୋଇପାରୁଛି। ମୋବାଇଲ ଆପ୍, ଡେବିଟ ଓ କ୍ରେଡିଟ କାର୍ଡ ଜରିଆରେ ଦେୟ ପଇଠ କରିବାକୁ ସେସୁ ପକ୍ଷରୁ କୁହାଯାଇଛି।
