ଭୁବନେଶ୍ୱର, ୧୦।୧୧(ବ୍ୟୁରୋ): ଆସନ୍ତା ୨୩ ତାରିଖରୁ ଆରମ୍ଭ ହେବ ଉତ୍କଳ ବିଶ୍ୱବିଦ୍ୟାଳୟର ପ୍ଲାଟିନମ୍ ଜୁବିଲି ପାଳନ ଉତ୍ସବ। ୨୪ ତାରିଖରେ ଆଲୁମିନି ମିଟ୍ ହେବ। ଏଥିପାଇଁ ଜୋର୍ଦାର ପ୍ରସ୍ତୁତି ଚାଲିଥିବାବେଳେ ଶନିବାର ପ୍ରସ୍ତୁତି ବୈଠକ ଉତ୍କଳ ବିଶ୍ୱବିଦ୍ୟାଳୟର ଏମ୍କେସିଜି ଅଡିଟୋରିୟମଠାରେ ଅନୁଷ୍ଠିତ ହୋଇଛି। ରାଜ୍ୟ ତଥା ଦେଶର କୋଣ ଅନୁକୋଣରେ ବିଭିନ୍ନ ଉଚ୍ଚ ପଦପଦବୀରେ ଅବସ୍ଥାପିତ ଥିବା ବିଶ୍ୱବିଦ୍ୟାଳୟର ୫ଶହରୁ ଊର୍ଦ୍ଧ୍ୱ ପୁରାତନ ଛାତ୍ର ଏକାଠି ହୋଇଥିଲେ। ବିଶ୍ୱବିଦ୍ୟାଳୟ କୁଳପତି ସୌମେନ୍ଦ୍ର ପଟ୍ଟନାୟକଙ୍କ ସମେତ ବିଭିନ୍ନ ଦଳର ନେତା ଓ ମନ୍ତ୍ରୀ ଉପସ୍ଥିତ ରହି ସେମାନଙ୍କ ସହ ଭାବ ବିନିମୟ କରିଥିଲେ। ଏହି ଅବସରରେ ସେମାନେ ପୁରାତନ ଛାତ୍ରଙ୍କୁ ଉତ୍କଳ ବିଶ୍ୱବିଦ୍ୟାଳୟର ଗର୍ବ ଓ ଗୌରବ ବୋଲି ଅଭିହିତ କରିବା ସହ ସ୍ବତନ୍ତ୍ର ଭାବେ ଆଲୁମ୍ନି ଅଫିସ୍କୁ ଉଦ୍ଘାଟନ କରିଥିଲେ।
ବୈଠକରେ ଉପସ୍ଥିତ ଥିବା ପୁରାତନ ଛାତ୍ରଙ୍କ ମଧ୍ୟରେ ଶିକ୍ଷାମନ୍ତ୍ରୀ ଅରୁଣ ସାହୁ, ବଡ଼ଚଣା ବିଧାୟକ ଅମର ଶତପଥୀ, ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ, ପୂର୍ବତନ ବିଧାୟକ ପ୍ରିୟଦର୍ଶୀ ମିଶ୍ର, ସୁଦର୍ଶନ ଘଡେଇ, ପୂର୍ବତନ ମନ୍ତ୍ରୀ ପ୍ରଫୁଲ ଘଡେଇ, ପଞ୍ଚାନନ କାନୁନ୍ଗୋ, ପୂର୍ବତନ ଏମ୍ପି ବୀରଭଦ୍ର ସିଂ, ବରିଷ୍ଠ ସାମ୍ବାଦିକ ସନ୍ଦୀପ ମିଶ୍ର, ରାଜାରାମ ଶତପଥୀ, ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ, ବିଶ୍ୱବିଦ୍ୟାଳୟର ପୂର୍ବତନ ସଭାପତି ତଥା ଓଏସ୍ଆଇସି ଅଧ୍ୟକ୍ଷ ଚିନ୍ମୟ ସାହୁ, ପୃଥ୍ବୀରାଜ ହରିଚନ୍ଦନ, ତନ୍ମୟ ସ୍ବାଇଁ, ପ୍ରକାଶ ତ୍ରିପାଠୀ, ରାଜେଶରାଜ ସ୍ବାଇଁ, ମହେଶ ପ୍ରସାଦ ପ୍ରମୁଖ ନିଜର ବକ୍ତବ୍ୟ ରଖିଥଲେ। ପ୍ଲାଟିନମ୍ ଜୁବିଲି ଓ ଆଲୁମ୍ନି ମିଟ୍ ପାଇଁ ଖର୍ଚ୍ଚ ଏବଂ ବିଭିନ୍ନ କାର୍ଯ୍ୟକ୍ରମ ଉପରେ ଆଲୋଚନା ହୋଇ ଦାୟିତ୍ୱ ନ୍ୟସ୍ତ କରାଯାଇଥିଲା। ସ୍ମରଣିକା ପୁସ୍ତିକାରେ ଉତ୍କଳ ବିଶ୍ୱବିଦ୍ୟାଳୟର ଇତିହାସ, ଗର୍ବଗୌରବର ଘଟଣାବଳୀ ଆଦି ଗୁରୁତ୍ୱବହନ କରିବ। ଏହା ୧୦୦୦ ପୃଷ୍ଠାରୁ ଅଧିକ ହୋଇଥିବାରୁ ଇ-ସୋଭେନିୟର ପ୍ରସ୍ତୁତ କରିବାକୁ ନିଷ୍ପତ୍ତି ନିଆଯାଇଛି। ୨୫ ତାରିଖରେ ଅଭିଭାବକଙ୍କୁ ନିମନ୍ତ୍ରଣ କରାଯାଇ ବିଶ୍ୱବିଦ୍ୟାଳୟର ପାଠପଢ଼ା ଓ ପରିବେଶ ସଂକ୍ରାନ୍ତରେ ପ୍ରସ୍ତାବ ଗ୍ରହଣ କରାଯିବ। ସେମାନେ କ୍ୟାମ୍ପସ ପରିସର ହଷ୍ଟେଲ ଓ କ୍ଲାସ୍ରୁମ୍ ବୁଲି ଦେଖିବେ। ୨୭ ତାରିଖ ପ୍ରତିଷ୍ଠା ଦିବସରେ ଯେପରି ସମସ୍ତ ପୁରାତନ ଛାତ୍ରୀଛାତ୍ର ଉପସ୍ଥିତ ରହିବେ ସେଥିପାଇଁ ସମସ୍ତେ ଉଦ୍ୟମ କରିବାକୁ ଶିକ୍ଷାମନ୍ତ୍ରୀ ସାହୁ ଆହ୍ବାନ ଦେଇଥିଲେ। ପୁରାତନ ଛାତ୍ରୀଛାତ୍ରଙ୍କ ଯୋଗଦାନ ପାଇଁ ସ୍ବତନ୍ତ୍ର ଓ୍ବେବ୍ସାଇଟ୍ (https://utkal.university)ରେ ଆକାଉଣ୍ଟ ଖୋଲାଯାଇଛି। ସେମାନେ ଉକ୍ତ ସାଇଟ୍ରେ ରେଜିଷ୍ଟ୍ରେଶନ କରିବାକୁ ପରାମର୍ଶ ଦିଆଯାଇଛି।
