ନୂଆଦିଲ୍ଲୀ,୧୨।୭- ଭାରତୀୟ ଅଧିନାୟକ ବିରାଟ କୋହଲି ଓ ପେସର ଯଶପ୍ରୀତ ବୁମରାଙ୍କୁ ସମ୍ଭବତଃ ସମ୍ପୂର୍ଣ୍ଣ ଓ୍ବେଷ୍ଟଇଣ୍ଡିଜ ଗସ୍ତରୁ ବିଶ୍ରାମ ଦିଆଯାଇପାରେ। ଅଗଷ୍ଟ ୩ ତାରିଖଠାରୁ ଆରମ୍ଭ ହେବାକୁ ଥିବା ଗସ୍ତରେ ଭାରତୀୟ ଦଳ ୩ ଲେଖାଏ ଟି୨୦ ଓ ଦିନିକିଆ ପରେ ଦୁଇ ଟେଷ୍ଟ ମ୍ୟାଚ୍ ଖେଳିବ। ଟେଷ୍ଟ ସିରିଜ୍ ଆଇସିସି ଟେଷ୍ଟ ଚାମ୍ପିୟନଶିପ୍ର ଅଂଶବିଶେଷ, ଯାହାକି ୨୦୧୯ରୁ ୨୧ ପର୍ଯ୍ୟନ୍ତ ଖେଳାଯିବ। ଏହାର ଫାଇନାଲ ୨୦୨୧ରେ ଇଂଲଣ୍ଡଠାରେ ହେବ। କୋହଲି ଓ ବୁମରା ଗତ ଏକ ବର୍ଷ ହେଲା କ୍ରମାଗତ କ୍ରିକେଟ ଖେଳିଆସୁଛନ୍ତି। ଦେଶର ଦୁଇ ଶ୍ରେଷ୍ଠ କ୍ରିକେଟରଙ୍କୁ ଲମ୍ବା ଘରୋଇ ସିଜନ ଲାଗି ଆହତ ସମସ୍ୟାରୁ ଦୂରେଇ ରଖିବା ପାଇଁ ଚୟନ କମିଟି ବିଶ୍ରାମ ଦେଇପାରେ। କୋହଲିଙ୍କ ଅନୁପସ୍ଥିତିରେ ଉପଅଧିନାୟକ ଅଜିଙ୍କ୍ୟ ରାହାନେ ଟେଷ୍ଟ ଫର୍ମାଟରେ ଦଳର ନେତୃତ୍ୱ ନେବେ। ସେହିଭଳି ଦିନିକିଆ ଓ ଟି୨୦ରେ ରୋହିତ ଶର୍ମା ଅଧିନାୟକ ଦାୟିତ୍ୱ ତୁଲାଇବେ। ଜାତୀୟ ଚୟନ କମିଟି ଖୁବ୍ ଶୀଘ୍ର ଓ୍ବେଷ୍ଟଇଣ୍ଡିଜ ଗସ୍ତ ଲାଗି ବୈଠକ ଆୟୋଜନ କରିିବ। ପୂର୍ବରୁ କୋହଲି ଓ ବୁମରାଙ୍କୁ ଦିନିକିଆ ଓ ଟି୨୦ ଫର୍ମାଟରୁ ବିଶ୍ରାମ ଦିଆଯିବା ନେଇ ବିସିସିଆଇ ପକ୍ଷରୁ ସୂଚନା ଦିଆଯାଇଥିଲା।
