ଦିଗପହଣ୍ଡି,୧୧ା୩(ଡି.ଏନ.ଏ.)-ଦିଗପହଣ୍ଡି ଥାନା ମହୁଡ଼ା ଗ୍ରାମ ଶ୍ମଶାନ ନିକଟ ଇଟାଭାଟିରେ କାମ କରୁଥିବା ସୁପରଭାଇଜର ସାଗର ପାତ୍ରଙ୍କୁ ଗୁଳି ମାରି ହତ୍ୟା ଉଦ୍ୟମ କରାଯାଇଥିବା ଅଭିଯୋଗରେ ପୋଲିସ ବୁଧବାର ଜଣଙ୍କୁ କୋର୍ଟ ଚାଲାଣ କରିଛି। ସେ ହେଲେ ବ୍ରହ୍ମପୁର ଟାଉନ ଥାନା ବିଜିପୁର କେନାଲ ସାହିର ବସନ୍ତ ବେହେରା ଓରଫ ବାବୁ। ମାମଲା ନଂ.୪୫/୨୦ ଅନୁଯାୟୀ ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ବ୍ରହ୍ମପୁର ଜେଲ୍କୁ ପଠାଯାଇଛି।
ତଦନ୍ତକାରୀ ପୋଲିସ ଅଧିକାରୀ ଆଇଆଇସି ବସନ୍ତ କୁମାର ସେଠୀଙ୍କ ସୂଚନାନୁସାରେ, ବ୍ରହ୍ମପୁର ଟାଉନ ଥାନା ବିଜିପୁର ଲକ୍ଷ୍ମୀ ସାହିର ସାଗରଙ୍କ ସହ ବସନ୍ତଙ୍କ ମଧ୍ୟରେ କିଛିଦିନ ପୂର୍ବେ ଗଣ୍ଡଗୋଳ ହୋଇଥିଲା। ବସନ୍ତ ରାଗିଯାଇ ସାଗରଙ୍କୁ ହତ୍ୟା କରିବା ପାଇଁ ବ୍ଲ୍ୟୁ ପ୍ରିଣ୍ଟ ପ୍ରସ୍ତୁତ କରିବା ସହ ୨ ଜଣ ସୁପାରିକିଲରଙ୍କୁ ନିୟୋଜିତ କରିଥିଲେ। ଗତ ଗୁରୁବାର ସାଗର ଇଟାଭାଟିରେ କାମ କରୁଥିବା ବେଳେ ୨ ଜଣ ଦୁର୍ବୃତ୍ତ ଏକ ବାଇକ୍ରେ ଆସି ଇଟା କିଣିବେ ବୋଲି ସାଗରଙ୍କୁ କହିଥିଲେ। ଭାଟିରେ ଇଟା ଷ୍ଟକ ନ ଥିବାରୁ ନୂଆଁ ଇଟା ବାହାରିଲେ ବିକ୍ରି କରାଯିବ ବୋଲି ସାଗର କହିଥିଲେ। ଯୁବକ ଦ୍ୱୟ ସେଠାରୁ ଫେରି ଯାଇଥିଲେ। ପୁଣି ସେମାନେ ପ୍ରାୟ ୫ ମିନିଟ ପରେ ଆସି ସାଗରଙ୍କୁ ତାଙ୍କ ଫୋନ ଦେଇ ଦାଦାଙ୍କ ସଙ୍ଗେ କଥା ହେବାକୁ ବାଧ୍ୟ କରିଥିଲେ। ସାଗର ମନା କରିବାରୁ ଜଣେ ଦୁର୍ବୃତ୍ତ ତାଙ୍କୁ ଗୁଳି କରି ଚମ୍ପଟ ମାରିଥିଲେ। ଏତଲା ପାଇ ପୋଲିସ ଘଟଣାସ୍ଥଳରେ ପହଞ୍ଚତ୍ ଇଟାଭାଟି ପରିସରରୁ ଖୋକା ଜବତ କରିଥିଲା। ସୁପାରିକିଲର ସାଗରଙ୍କୁ ଗୁଳି ମାଡ କରିବା ବେଳେ ଅଭିଯୁକ୍ତ ବସନ୍ତ ଅନ୍ୟ ଏକ ବାଇକ୍ରେ କିଛି ଦୂରରେ ଛକି ରହି ପରିସ୍ଥିତି ପ୍ରତି ନଜର ରଖିଥିବା ତଦନ୍ତ ସମୟରେ ଜଣାପଡିଥିବା ଆଇଆଇସି କହିଛନ୍ତି।
