ନୂଆଦିଲ୍ଲୀ,୨୦ ।୪: କରୋନା ବିରୋଧୀ ଲଢ଼େଇରେ ସରକାର ପ୍ରାଥମିକ ପର୍ଯ୍ୟାୟରେ ୧.୭ ଲକ୍ଷ କୋଟି ଟଙ୍କାର ଏକ ପ୍ୟାକେଜ ଘୋଷଣା କରିଛନ୍ତି। କ୍ଷତିଗ୍ରସ୍ତ ହୋଇଥିବା ଶିଳ୍ପଜଗତ ଲାଗି ଏବେ ଯାଏ କୌଣସି ବିଶେଷ ପ୍ୟାକେଜ ଘୋଷଣା ହୋଇଛନ୍ତି। ସରକାରଙ୍କ ଏ ନେଇ କିଭଳି କୌଶଳ ଅବଲମ୍ବନ କରୁଛନ୍ତି ତାହା ଉପରେ ଏବେ ସମସ୍ତଙ୍କ ନଜର ରହିଛି। ଏହାବାଦ୍ ଶିଳ୍ପଜଗତ ଏକ ଉନ୍ନତ ପ୍ୟାକେଜ ଆଶାରେ ରହିଛି। ଏ ନେଇ ବିଭିନ୍ନ କ୍ଷେତ୍ର ସେମାନଙ୍କ ବହୁ ଦାବି ସରକାରଙ୍କ ନିକଟରେ ରଖିଛନ୍ତି। ଏଭଳି ବିଭିନ୍ନ ପ୍ରସଙ୍ଗକୁ ବିଚାରକରି ଏକ ସ୍ବତନ୍ତ୍ର କରୋନା ବଜେଟ ଉପରେ ସରକାର ବିଚାର କରୁଥିବା କୁହାଯାଉଛି।
୨୦୨୦-୨୧ ବର୍ଷ ଲାଗି ସରକାର ଧାର୍ଯ୍ୟ କରିଥିବା ବିତ୍ତୀୟ ନିଅଣ୍ଟ ଲକ୍ଷ୍ୟ ହାସଲ କରିବା ନେଇ ଆଶା ଦେଖାଯାଉନାହିଁ। ଅର୍ଥ ବ୍ୟବସ୍ଥାକୁ ବଞ୍ଚାଇବା ଏବଂ ଗତି ପ୍ରଦାନ କରିବା ଲାଗି ପ୍ୟାକେଜ ବାବଦକୁ ସରକାର ଯେତେ ଅଧିକ ବଡ ଘୋଷଣା କରିବେ ବିତ୍ତୀୟ ନିଅଣ୍ଟ ସେତେ ବଢ଼ିଯିବ। ନିକଟରେ ଘୋଷଣା କରାଯାଇଥିବା ୧.୭ ଲକ୍ଷ କୋଟି ଟଙ୍କାର ପ୍ୟାକେଜ ଦେଶର ମୋଟ ଜିଡିପିର ପ୍ରାୟ ୦.୭୦% ହେବ। ପ୍ରକ୍ରିୟା ସହ ଜଡ଼ିତ ଜଣେ ବରିଷ୍ଠ ଅଧିକାରୀ କହିଛନ୍ତି, ଅର୍ଥ ବ୍ୟବସ୍ଥାକୁ ବଞ୍ଚାଇବା ପାଇଁ ପ୍ୟାକେଜରେ କାଟଛାଣ୍ଟ ନ କରିବାକୁ ଆର୍ଥତ୍କ ବିଶେଷଜ୍ଞମାନେ ପରାମର୍ଶ ଦେଇଛନ୍ତି। ଏହାର ବିଭିନ୍ନ ଦିଗ ଉପରେ ଏବେ ସରକାର ବିଚାର କରୁଛନ୍ତି। ଚୂଡ଼ାନ୍ତ ନିଷ୍ପତ୍ତି ଆଗାମୀ ଦିନରେ ଘୋଷଣା କରାଯିବ।
କରୋନା ବିରୋଧରେ ଲଢ଼େଇ ଲାଗି ସରକାର ସ୍ବତନ୍ତ୍ର ବଜେଟ ଆଣିବାର ବିଶେଷ ସମ୍ଭାବନା ରହିଛି। କାରଣ ୨୦୦୮-୦୯ ସମୟରେ ଉପୁଜିଥିବା ମାନ୍ଦାବସ୍ଥା ବିରୋଧରେ ଲଢ଼େଇ କରିବା ଲାଗି ସରକାର କିଛି ପଦକ୍ଷେପ ନେଇ ନ ଥିଲେ। ଏହି ଭୁଲ୍କୁ ଦୋହରାଇବାକୁ ବର୍ତ୍ତମାନର ସରକାର ଚାହୁଁନାହାନ୍ତି ବୋଲି କୁହାଯାଇଛି। ସେହି ସମୟର ତତ୍କାଳୀନ ସରକାର ଏକ ସ୍ବତନ୍ତ୍ର ପ୍ୟାକେଜ ଘୋଷଣା କରି ନ ଥିଲେ। ଏଥିଯୋଗୁ ୨୦୦୮ର ବିତ୍ତୀୟ ନିଅଣ୍ଟ ୨.୭% ରହିଥିବା ବେଳେ ୨୦୦୯ରେ ଏହା ବୃଦ୍ଧି ଘଟି ୬%ରେ ପହଞ୍ଚିଥିଲା।
ଏହି ପ୍ରସଙ୍ଗ ଉପରେ ବଜାର ବିଶେଷଜ୍ଞମାନେ ଭିନ୍ନ ଭିନ୍ନ ମତ ପ୍ରକାଶ କରିଛନ୍ତି। ରେଟିଂ ଏଜେନ୍ସି କ୍ରିସିଲର ମୁଖ୍ୟ ଅର୍ଥନୀତିଜ୍ଞ ଡି.କେ.ଜୋଷୀ କହିଛନ୍ତି ଯେ, କରୋନା ସ୍ପେଶାଲ ଆକାଉଣ୍ଟିଂରୁ ଗୋଟିଏ ଫାଇଦା ହୋଇପାରେ। କେତେ ଖର୍ଚ୍ଚ ହେଉଛି ସେ ସମ୍ପର୍କରେ ଜଣାପଡିବ। ୟର୍ନଷ୍ଟ ଆଣ୍ଡ ୟଙ୍ଗର ମୁଖ୍ୟ ପଲିସି ପରାମର୍ଶଦାତା କହିଛନ୍ତି ଯେ, ସ୍ବତନ୍ତ୍ର କରୋନା ବଜେଟରେ ବିଶେଷ ଫାଇଦା ହେବାର ସମ୍ଭାବନା ନାହିଁ। କରୋନା ଉପରେ ହେଉଥିବା ଖର୍ଚ୍ଚକୁ ଅଲଗା ଭାବେ ଦର୍ଶାଯାଇପାରେ। ଚଳିତ ଆର୍ଥତ୍କ ବର୍ଷ ଲାଗି ଆସିଥିବା ବଜେଟ ଏବେ ପ୍ରାସଙ୍ଗିକତା ହରାଇଛି। ଏଭଳି ସ୍ଥିତିରେ କେନ୍ଦ୍ର ଏବଂ ରାଜ୍ୟଗୁଡିକ ନିଜ ବଜେଟକୁ ପୁନଃ ମୂଲ୍ୟାୟନ କରିବାକୁ ପଡିବ। ସମ୍ପୂର୍ଣ୍ଣ ଭାବେ ନୂଆ ବଜେଟ ଆଣିବାର ମଧ୍ୟ ଆବଶ୍ୟକତା ରହିଛି। ଖର୍ଚ୍ଚ ଏବଂ ରାଜସ୍ବ ଆକଳନ ଏବେ ବିଗିଡ଼ିଛି। ଏଭଳି ସ୍ଥିତିରେ ସରକାରଙ୍କୁ ବଜେଟର ପୁନଃ ମୂଲ୍ୟାଙ୍କନ କରିବାର ଆବଶ୍ୟକତା ରହିଛି ବୋଲି ସେ କହିଛନ୍ତି।
