ଭୁବନେଶ୍ୱର,୨୭।୧୨(ବ୍ୟୁରୋ): ଗତ ୩ ମାସ ହେବ ରାଜ୍ୟରେ ପିଆଜ ଦର ଆକାଶ ଛୁଆଁ ରହିଛି। ଖୁଚୁରା ବଜାରରେ କିଲୋ ପିଛା ୧୦୦ରୁ ୧୨୦ ଟଙ୍କାରେ ବିକ୍ରି ହେଉଛି। ନୂଆ ପିଆଜ ମାର୍କେଟକୁ ସେତେ ପରିମାଣରେ ଆସି ନାହିଁ। ତୁର୍କିରୁ ମଗାଯାଇଥିବା ପିଆଜ ମଧ୍ୟ ବଜାର ଚାହିଦା ମେଣ୍ଟାଇ ପାରୁ ନାହିଁ। ଫଳରେ ଖାଉଟିମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଆଳୁ ଦର ମଧ୍ୟ ଗତ କିଛିଦିନ ହେବ ବୃଦ୍ଧି ପାଇଛି। ଆଳୁ ଓ ପିଆଜ ଗଚ୍ଛିତ ନେଇ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଜିଲାପାଳଙ୍କୁ ଚିଠି ଲେଖିଛି। ଚିଠିରେ ଉଲ୍ଲେଖ କରାଯାଇଛି ଯେ ଭୁବନେଶ୍ୱର ଅଞ୍ଚଳରେ ହୋଲସେଲରମାନେ ସର୍ବାଧିକ ୧ ହଜାର କୁଇଣ୍ଟାଲ ଆଳୁ ଓ ୫୦୦ କୁଇଣ୍ଟାଲ ପିଆଜରୁ ଅଧିକ ଗଚ୍ଛିତ ରଖି ପାରିବେ ନାହିଁ । ସେହିପରି କଟକ, ରାଉରକେଲା, ବ୍ରହ୍ମପୁର ଓ ସମ୍ବଲପୁର ଅଞ୍ଚଳରେ ହୋଲସେଲରମାନେ ୫୦୦ କୁଇଣ୍ଟାଲ ଆଳୁ ଓ ୨୫୦ କୁଇଣ୍ଟାଲ ପିଆଜ ନିଜ ଗୋଦାମରେ ରଖି ପାରିବେ। ରାଜ୍ୟର ଅନ୍ୟାନ୍ୟ ଅଞ୍ଚଳରେ ଥିବା ହୋଲସେଲରମାନେ ୩୦୦ କୁଇଣ୍ଟାଲ ଆଳୁ ଓ ୧୫୦ କୁଇଣ୍ଟାଲ ପିଆଜ ରଖିପାରିବେ। ସେହିପରି କଟକ, ରାଉରକେଲା, ଖୁଚୁରା ବ୍ୟବସାୟୀମାନେ ନିଜ ଦୋକାନରେ ୪୦ କୁଇଣ୍ଟାଲ ଆଳୁ ଏବଂ ୨୦ କୁଇଣ୍ଟାଲ ପିଆଜ ଏବଂ ଅନ୍ୟାନ୍ୟ ଅଞ୍ଚଳର ଦୋକାନୀମାନେ ୧୫ କୁଇଣ୍ଟାଲ ଆଳୁ ଓ ୮ କୁଇଣ୍ଟାଲରୁ ଅଧିକ ପିଆଜ ଗଚ୍ଛିତ କରି ପାରିବେ ନାହିଁ। ଯଦି ଏହି ଗାଇଡ ଲାଇନକୁ କୌଣସି ବ୍ୟବସାୟୀ ଅଣଦେଖା କରିବେ ତେବେ ସେମାନଙ୍କ ବିରୋଧରେ ଅତ୍ୟାବଶ୍ୟକ ଦ୍ରବ୍ୟ ଆଇନ ଅନୁଯାୟୀ ପଦକ୍ଷେପ ନେବାକୁ ଜିଲାପାଳଙ୍କୁ ନିର୍ଦ୍ଦେଶ ଦିଆଯାଇଛି। ଯୋଗାଣ ଅଧିକାରୀମାନେ ନିୟମିତ ଭାବେ ହୋଲସେଲ ଓ ଖୁଚୁରା ବ୍ୟବସାୟୀଙ୍କ ଉପରେ ନଜର ରଖିବାକୁ କୁହାଯାଇଛି।
