ଅନୁଗୋଳ ଅଫିସ, ୬।୫ – ଅନୁଗୋଳ ସହରରେ ଥିବା ୧୨୦ ଇନଫ୍ୟାଣ୍ଟ୍ରି ବାଟାଲିୟନ(ଟିଏ)ର କ୍ୟାଣ୍ଟିନ ମଙ୍ଗଳବାର ଖୋଲାଯାଇଥିଲା। ଦୀର୍ଘଦିନ ପରେ କ୍ୟାଣ୍ଟିନ ଖୋଲାଯାଉଥିବାରୁ କାର୍ଯ୍ୟରତ କର୍ମଚାରୀ ଓ ଅବସରପ୍ରାପ୍ତ କର୍ମଚାରୀମାନଙ୍କ ସୁଅ ଛୁଟିଥିଲା। ଅନେକେ ରାତିରୁ ଲାଇନ୍ ଦେଇଥିବାରୁ ପୂର୍ବାହ୍ନରେ ସ୍ଥିତି ଅସମ୍ଭାଳ ହୋଇପଡ଼ିଥିଲା। ପୋଲିସର ବାରମ୍ବାର ତାଗିଦ୍ ସତ୍ତ୍ୱେ କେହି କଟକଣାକୁ ଖାତିର କରି ନ ଥିବା ଦେଖାଯାଇଥିଲା। ହେଲେ କ୍ୟାଣ୍ଟିନ ଖୋଲାଯିବା ସହ ୫୦ ଜଣଙ୍କୁ ସାମଗ୍ରୀ ଦେବାର ନୋଟିସ ମରାଯିବା ପରେ ଅନ୍ୟମାନଙ୍କୁ ନିରାଶ ହେବାକୁ ପଡ଼ିଥିଲା।
ସରକାରଙ୍କ ନିର୍ଦ୍ଦେଶକ୍ରମେ ଅନୁଗୋଳ ଆର୍ମି କ୍ୟାଣ୍ଟିନ ପୂର୍ବାହ୍ନରେ ଖୋଲାଯାଇଥିଲା। କିନ୍ତୁ ଏହା ପୂର୍ବରୁ ଶତାଧିକ କର୍ମଚାରୀ ଓ ଅବସରପ୍ରାପ୍ତ କର୍ମଚାରୀ ବ୍ୟାଗକୁ ଧାଡିରେ ରଖି ରାସ୍ତା ପାର୍ଶ୍ୱରେ ଠିଆ ହୋଇଥିଲେ। ଧୀରେ ଧୀରେ ଲୋକଙ୍କ ସଂଖ୍ୟା ବଢ଼ିବାରୁ ସେଠାରେ ବିଶୃଙ୍ଖଳିତ ପରିବେଶ ସୃଷ୍ଟି ହୋଇଥିଲା। ଖବରପାଇ ଏସ୍ଆଇ ପ୍ରକାଶ ଚନ୍ଦ୍ର ମାଝିଙ୍କ ନେତୃତ୍ୱରେ ଏସ୍ଆଇ ଅରକ୍ଷିତ ସେଠୀ, ଏଏସ୍ଆଇ ପ୍ରଶାନ୍ତ ସାହୁ ଓ ଅନ୍ୟ ପୋଲିସ କର୍ମଚାରୀମାନେ ଆସି ସାମାଜିକ ଦୂରତ୍ୱ ବଜାୟ ରଖିବାକୁ ତାଗିଦ୍ କରିଥିଲେ। କ୍ୟାଣ୍ଟିନ କର୍ମଚାରୀମାନଙ୍କୁ ମଧ୍ୟ ଏଥିପ୍ରତି ନଜର ଦେବାକୁ ପରାମର୍ଶ ଦେଇଥିଲେ। କିନ୍ତୁ ପୋଲିସର ତାଗିଦ ସତ୍ତ୍ୱେ ଅପେକ୍ଷାରତ କର୍ମଚାରୀ ଓ ଅବସରପ୍ରାପ୍ତ କର୍ମଚାରୀମାନେ ଶୃଙ୍ଖଳିତ ହୋଇ ନ ଥିଲେ। ତେବେ ପ୍ରତ୍ୟେକ ଦିନ କେବଳ ୫୦ ଜଣଙ୍କୁ ସାମଗ୍ରୀ ପ୍ରଦାନ କରାଯିବ ବୋଲି କ୍ୟାଣ୍ଟିନ ସମ୍ମୁଖରେ ନୋଟିସ ମରାଯାଇଥିଲା। ଏଥିସହ ଯେଉଁମାନଙ୍କ ନାମରେ କାର୍ଡ ରହିଛି ସେମାନଙ୍କୁ କ୍ୟାଣ୍ଟିନ ପରିସରକୁ ପ୍ରବେଶ ଅନୁମତି ଦିଆଯାଇଥିଲା। ଏପରି କି ମାସ୍କ ପରିଧାନ କରି ନ ଥିଲେ ସାମଗ୍ରୀ ପ୍ରଦାନ କରାଯିବ ନାହିଁ ବୋଲି ଜଣାଇ ଦିଆଯାଇଥିଲା। ସେହିପରି ସାମାଜିକ ଦୂରତା ବଜାୟ ରଖିବା ଓ ପାନ, ପୁଡିଆ ଖାଇ ନ ଥିଲେ ଭିତରକୁ ପ୍ରବେଶ କରିହେବ ବୋଲି ନୋଟିସରେ ଉଲ୍ଲେଖ କରାଯାଇଥିଲା। ତଦନୁଯାୟୀ ମାତ୍ର ୫୦ ଜଣଙ୍କୁ କ୍ୟାଣ୍ଟିନରୁ ସାମଗ୍ରୀ ପ୍ରଦାନ କରାଯାଇଥିଲା।
