ବଡ଼ସାହି,୧୦ା୨(ସ୍ବ.ପ୍ର)- ଉତ୍ତର ଓଡିଶାର ପ୍ରସିଦ୍ଧ ମା’ ହିଙ୍ଗୁଳାଙ୍କ ବାର୍ଷିକ ପୂଜା ଶନିବାରଠାରୁ ଆରମ୍ଭ ହୋଇଛି। ୪ ଦିନ ଧରି ଅନୁଷ୍ଠିତ ହେବାକୁ ଥିବା ଏହି ପୂଜା ୧୧ତାରିଖରେ ଉଦ୍ଯାପିତ ହେବ ା ପ୍ରତିକୂଳ ପାଗ ସତ୍ତ୍ୱେ ଏହି ପୀଠରେ ହଜାର ହଜାର ଶ୍ରଦ୍ଧାଳୁଙ୍କ ଭିଡ଼ ଜମୁଥିବା ଦେଖିବାକୁ ମିଳୁଛି।
ବଡ଼ସାହି ମୁଖ୍ୟାଳୟରୁ ୫କିମି ଦୂର ବଡ଼ସାହି-ଉଦଳା ରାସ୍ତା ସୁହାଗପୁର ପଞ୍ଚାୟତ ଛକଠାରୁ ଚାନ୍ଦଡିହା ରାସ୍ତାର ମଧ୍ୟଭାଗରେ ଏହି ପୀଠ ଅବସ୍ଥିତ। ବିଗତ ୫୦ବର୍ଷରୁ ଊର୍ଦ୍ଧ୍ୱ ପ୍ରଚଳିତ ଜନଶ୍ରୁତି ଅନୁଯାୟୀ ମା’ଙ୍କ ଆର୍ବିଭାବ ଅତୀବ ଆଶ୍ଚର୍ଯ୍ୟଜନକ ଓ ଅଲୌକିକ ା ଅଞ୍ଚଳଟି ଘଞ୍ଚ ଶାଳ ଜଙ୍ଗଲ ପରିପୂର୍ଣ୍ଣ ଥିବାବେଳେ ହିଂସ୍ର ଜୀବଜନ୍ତୁ ରହୁଥିଲେ। ଫଳରେ ଲୋକମାନେ ଭୟରେ ସେ ସ୍ଥାନକୁ ଯାଉ ନ ଥିଲେ। ପୂର୍ବରୁ ଆଖପାଖ ଗ୍ରାମରେ ଅଗ୍ନିକାଣ୍ଡ ଘଟି ବହୁ ଧନଜୀବନ ହାନି ହେଉଥିଲା ା ଲୋକମାନେ ତ୍ରାହି ତ୍ରାହି ଡାକ ଦେଉଥିବା ବେଳେ ମା’ଙ୍କ ସ୍ବପ୍ନାଦେଶ ହୋଇଥିଲା ା ପରେ ଗ୍ରାମବାସୀମାନେ ମା’ଙ୍କ ଶରଣାପନ୍ନ ହୋଇ ପୂଜାପାଠ ଆରମ୍ଭ କରିଥିଲେ ା ମା’ଙ୍କଠାରେ ଲାଗି ହେଉଥିବା ଭୋଗରାଗ ଯଜ୍ଞକୁଣ୍ଡରେ ସମର୍ପିବା ପରେ ଅଗ୍ନି ସଂଯୋଗ କରାଯାଇଥାଏ ା ବାର୍ଷିକ ପୂଜା ଦିନ ଭକ୍ତ ଆଣିଥିବା ଭୋଗରାଗ ଅଗ୍ନିକୁଣ୍ଡରେ ଦେଲେ ଘରପୋଡ଼ି ହୁଏ ନାହିଁ ବୋଲି ଭକ୍ତ ରନତ୍ମଣି ବିଶ୍ୱାଳ(୭୫) କହିଛନ୍ତି ା ଭକ୍ତମାନଙ୍କ ହୃଦୟରେ ଏହି ଦୃଢ ବିଶ୍ୱାସ କେଉଁ ଆବହମାନ କାଳରୁ ରହି ଆସିଛି ା କେହି ବିପଦରେ ପଡ଼ିିଥିଲେ ଯଦି ମା’ଙ୍କୁ ସୁମରଣା କରନ୍ତି, ତେବେ ମା’ ତତ୍କ୍ଷଣାତ ତାଙ୍କୁ ସହାୟ ହୁଅନ୍ତି ା ସେହିପରି ମାଡ଼ି ଆସୁଥିବା ବଡ଼ ବିପତ୍ତି ଦୂର ହେବା ସହିତ ଦୂରାରୋଗ୍ୟ ଓ ମନସ୍କାମନା ପୂରଣ ହୋଇଥାଏ ବୋଲି ବାଲେଶ୍ୱର ଜିଲା ବର୍ଦ୍ଧନପୁର ଗ୍ରାମରୁ ଆସିଥିବା ଭକ୍ତ ରବୀନ୍ଦ୍ର ସାହୁ(୫୭)ପ୍ରକାଶ କରିଛନ୍ତି ା ମା’ଙ୍କୁ ଭୋଗ ରୂପରେ ନଡିଆ, କଦଳୀ, ନାଲି ଉଖୁଡା, ବିଭିନ୍ନ ପ୍ରକାରର ଫଳ ଇତ୍ୟାଦି ଲାଗି କରାଯାଇଥାଏ ା ଅଗ୍ନି ପୂର୍ଣ୍ଣିମା ପରବର୍ତ୍ତୀ ଶନିବାର କିମ୍ବା ମଙ୍ଗଳବାର ଲକ୍ଷ ଲକ୍ଷ ଭକ୍ତଙ୍କର ମନବାଞ୍ଛା ପୂର୍ଣ୍ଣ ହୋଇଥିବା ଭୋଗ ସୂର୍ଯ୍ୟାସ୍ତ ପୂର୍ବରୁ ଏହି କୁଣ୍ଡରେ ଅଗ୍ନି ସଂଯୋଗ କରାଯାଇଥାଏ ବୋଲି ପୂଜକ ବୈଦ୍ୟନାଥ ମିଶ୍ର କୁହନ୍ତି। ଏହି ଦିନରେ ମୟୂରଭଞ୍ଜ, ବାଲେଶ୍ୱର, ଭଦ୍ରକ, କେନ୍ଦୁଝର ଜିଲା ସହିତ ପଡୋଶୀ ଝାଡଖଣ୍ଡ, ପଶ୍ଚିମବଙ୍ଗ, ବିହାର ରାଜ୍ୟରୁ ଲକ୍ଷାଧିକ ଭକ୍ତଙ୍କ ସମାଗମ ହୋଇଥାଏ ା ଏହି ଦିନ ଭକ୍ତମାନେ ମା’ଙ୍କ ନିକଟରେ ନିଜର ମନସ୍କାମନା ଜଣାଇ ତାହା ପୂରଣ ହେଲେ ଯୋଡ଼ି ଘୋଡ଼ା ଦେବାକୁ ମାନସିକ କରିଥାନ୍ତି ା କେହି କେହି ମାଟି ଘୋଡ଼ା, ଅଳଙ୍କାର, ପାଟଶାଢୀ ଦେଇ ଗୁହାରି କରିଥାନ୍ତି ା କାହିଁ କେଉଁ କାଳରୁ ମା’ ହିଙ୍ଗୁଳା ଏଠାରେ ପୂଜା ପାଇ ଆସୁଛନ୍ତି ବୋଲି ମୁଖ୍ୟ ଟ୍ରଷ୍ଟି ସୁନୀଲ କୁମାର ଦାଶ ପ୍ରକାଶ କରିଛନ୍ତି ା
ମା’ଙ୍କ ପୀଠ କହିଲେ ମୁଖ୍ୟତଃ ବେଢା ମଧ୍ୟରେ ସମ୍ପୂର୍ଣ୍ଣ ଯୋଡି ହୋଇ ରହିଥିବା ଦୁଇଟି ବଟ ଓ ସାହାଡା ବୃକ୍ଷ ମୂଳରେ ମା’ ହିଙ୍ଗୁଳା ଆବିର୍ଭୂତା ା ଏହି ବୃକ୍ଷମାନଙ୍କରେ ବନ୍ଧା ହୋଇଥିବା ନାଲି କପଡା, ରଙ୍ଗବେରଙ୍ଗି ଶାଢୀ ଦ୍ୱାରା ଆବୃତ, ଫୁଲମାଳ, ଧୁପ, ଓ ବୋଳାଯାଇଥିବା ସିନ୍ଦୂରର ଦୃଶ୍ୟ ସମ୍ପୃକ୍ତ ଅଞ୍ଚଳର ଧାର୍ମିକ ଚେତନା ଓ ବିଶ୍ୱାସରେ ‘ଜିଅନ୍ତା ଠାକୁରାଣୀ’ ଭାବେ ଜନାଦୃତ ା ବୃକ୍ଷର ଦୁଇ ପାଶର୍ବରେ ଦୁଇଟି ବଡ଼ ବଡ଼ ମାଟି ଘୋଡା ଶୋଭା ପାଉଥିବା ବେଳେ ବେଢା ଭିତରେ ପଡି ରହିଛି ହଜାର ହଜାର ଭକ୍ତଙ୍କ ମାନସିକ ଘୋଡ଼ା ା
