ଭଦ୍ରକ ଅଫିସ, ୧୬।୫ – ଭଦ୍ରକ ଜିଲାପାଳଙ୍କ ଆବାସିକ କାର୍ଯ୍ୟାଳୟ ପରିସରରେ ବୁଧବାର ସନ୍ଧ୍ୟାରେ ପ୍ରସିଦ୍ଧ ଶୈବପୀଠ ଆରଡ଼ି ଧାମର ବାବା ଆଖଣ୍ଡଳମଣିଙ୍କ ବିବାହ ମହୋତ୍ସବ ପାଇଁ ଜିଲାସ୍ତରୀୟ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଜିଲାପାଳ ଜ୍ଞାନରଞ୍ଜନ ଦାସ ଏଥିରେ ସଭାପତିତ୍ୱ କରିଥିଲେ। ପ୍ରକଳ୍ପ ନିର୍ଦ୍ଦେଶକ ମଧୁସୂଦନ ମିଶ୍ର, ଚାନ୍ଦବାଲି ତହସିଲଦାର ସତ୍ୟଜିତ ରାଉତ, ସୂଚନା ଓ ଲୋକସମ୍ପର୍କ ଅଧିକାରୀ ଗୋଲଖ ଚନ୍ଦ୍ର ବେହେରା, ଧାମନଗର ଏସ୍ଡିପିଓ ମନୋରଞ୍ଜନ ସାମଲ, ଆରଡ଼ିର ସେବାୟତଙ୍କ ପକ୍ଷରୁ ଇଂ. ସରୋଜ ପାଢୀ, ବାବାଜୀ ପାଢୀ, ବିଜୟ ଦାଶ, ଆଶିଷ ପାଢୀ, ଅରବିନ୍ଦ ପାଢୀ, ଚନ୍ଦ୍ରକାନ୍ତ ପାଢୀ, ସଞ୍ଜୟ ପାଢୀ, ସୁଶାନ୍ତ ପାଢୀ ଓ ବଙ୍କିମ୍ ପାଢୀ ପ୍ରମୁଖ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ। ଚଳିତବର୍ଷ ଶିବବିବାହ ଉତ୍ସବ ଆସନ୍ତା ଜୁନ୍ ୭ ତାରିଖରେ ପାଳନ କରାଯିବ। ଏହି ମହୋତ୍ସବ ଶାନ୍ତିଶୃଙ୍ଖଳାର ସହ ମହାସମାରୋହରେ ପାଳନ କରାଯିବ ପାଇଁ ସମସ୍ତଙ୍କ ସହଯୋଗ ଲୋଡ଼ିଥିଲେ ଜିଲାପାଳ।
ଏହିବର୍ଷ କନ୍ୟାକର୍ତ୍ତା ଭାବେ ଗଞ୍ଜାମ ବ୍ରହ୍ମପୁରର ଚନ୍ଦ୍ରଶେଖର ଦାଶ ଓ ବରକର୍ତ୍ତା ଭାବେ ବାଲେଶ୍ୱରର କାର୍ତ୍ତିକ ବେହେରାଙ୍କୁ ଚୟନ କରାଯାଇଛି। ଆରଡ଼ି ମ୍ୟାନେଜିଂ ଟ୍ରଷ୍ଟି ପକ୍ଷରୁ ନୀତିକାନ୍ତି ନିର୍ଘଣ୍ଟ କରାଯାଇଛି। ଜୁନ୍ ୬ ତାରିଖ ଗୁରୁବାର ମଙ୍ଗଳକୃତ୍ୟ ଓ ୭ ତାରିଖ ଶୁକ୍ରବାର ବିବାହ ଉତ୍ସବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ସମାପନ କରାଯିବାକୁ ସ୍ଥିର ହୋଇଛି। ଏହି ଦେବଦମ୍ପତିଙ୍କ ବିବାହ ଉତ୍ସବରେ ବିଭିନ୍ନ ଜିଲାରୁ ପାରମ୍ପାରିକ ବାଦ୍ୟ ଅଣାଯାଇ ଶୋଭାଯାତ୍ରାରେ ସାମିଲ କରାଯିବ। ଚଳିତବର୍ଷ ପ୍ରଶାସନ ପକ୍ଷରୁ ୪ଲକ୍ଷ ଟଙ୍କାର ଖର୍ଚ୍ଚ ଅଟକଳ କରାଯାଇଛି। ବିଭିନ୍ନ ବିଭାଗ ପକ୍ଷରୁ ଅସ୍ଥାୟୀ ବ୍ୟବସ୍ଥା କରାଯିବା ପାଇଁ ସ୍ଥିର କରାଯାଇଥିଲା। ଶେଷରେ ଆରଡ଼ି ଟ୍ରଷ୍ଟି ବୋର୍ଡର କାର୍ଯ୍ୟନିର୍ବାହୀ ଅଧିକାରୀ ବିଦ୍ୟାଧର ପଲାଇ ଧନ୍ୟବାଦ ଅର୍ପଣ କରିଥିଲେ।
