ବ୍ରହ୍ମପୁର ଅଫିସ,୨୩ା୫-ବ୍ରହ୍ମପୁର ଆମ୍ବପୁଆ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ଶାଖା ସ୍ଥାନାନ୍ତରଣକୁ ନେଇ ଜନଅସନ୍ତୋଷ ବୃଦ୍ଧି ପାଇବାରେ ଲାଗିଛି।
ଶରଧାବାଲିରେ ଥିବା ଏହି ବ୍ରାଞ୍ଚକୁ ଖୋଡାସିଙ୍ଗି ଏଡିବି ଶାଖା ସହ ମିଶ୍ରଣ କରାଯିବାକୁ ଯୋଜନା କରାଯାଉଥିବା ବେଳେ ଏହାକୁ ସ୍ଥାନୀୟ ଅଞ୍ଚଳବାସୀ ତୀବ୍ର ବିରୋଧ କରିଛନ୍ତି। ଏହି ବ୍ରାଞ୍ଚ ଉପରେ ଅନେକ ସହରତଳି ଅଞ୍ଚଳର ହଜାର ହଜାର ଗ୍ରାହକ ନିର୍ଭର କରୁଥିବାରୁ ସହରତଳି ମିଳିତ କ୍ରିୟାନୁଷ୍ଠାନ କମିଟି ମଧ୍ୟ ଏହାକୁ ବିରୋଧ କରିଛି। ସ୍ଥାନାନ୍ତରକୁ ବନ୍ଦ କରିବା ଦାବି ନେଇ ବୁଧବାର କମିଟିର ସଦସ୍ୟମାନେ ବ୍ରହ୍ମାନଗର ଦ୍ୱିତୀୟ ଗଳିରେ ଅବସ୍ଥିତ ଷ୍ଟେଟବ୍ୟାଙ୍କ ଜୋନାଲ କାର୍ଯ୍ୟାଳୟର ଏଜିଏମ୍ଙ୍କୁ ଦାବିପତ୍ର ପ୍ରଦାନ କରିଛନ୍ତି। ସରକାର ଆର୍ଥତ୍କ ଅନ୍ତଭୁକ୍ତି ଯୋଜନା ଅଧୀନରେ ଲୋକଙ୍କୁ ବ୍ୟାଙ୍କି ବ୍ୟବସ୍ଥା ସହ ଯୋଡିବାକୁ ଅଧିକରୁ ଅଧିକ ବ୍ୟାଙ୍କ ଶାଖା ଖୋଲିବା ଉପରେ ଗୁରୁତ୍ୱ ଦେଉଥିବା ବେଳେ ଆମ୍ବପୁଆ ଷ୍ଟେଟବ୍ୟାଙ୍କ ଶାଖାର ସ୍ଥାନାନ୍ତରଣ ନେଇ ଯୋଜନା ଅତ୍ୟନ୍ତ ଦୁର୍ଭାଗ୍ୟ ଜନକ ବୋଲି କମିିିଟି ପକ୍ଷରୁ କୁହାଯାଇଛି।
ଏହି ବ୍ୟାଙ୍କ ଉପରେ ବର୍ତ୍ତମାନ ମହାନଗର ନିଗମର ୩୮, ୩୯ ଓ ୪୦ ନଂ. ୱାର୍ଡ ସମେତ ଦଶ ଖଣ୍ଡ ଆଖପାଖ ଗ୍ରାମାଞ୍ଚଳର ଲୋକେ ନିର୍ଭର କରୁଛନ୍ତି।
ଏଥିସହ ଏହି ଅଞ୍ଚଳରେ ରହିଥିବା ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ, ବ୍ୟବସାୟିକ ପ୍ରତିଷ୍ଠାନ, ସରକାରୀ କାର୍ଯ୍ୟାଳୟ, ଶିଳ୍ପାନୁଷ୍ଠାନ ୟୁନିଟ ଗୁଡିକ ମଧ୍ୟ ଏହା ଉପରେ ନିର୍ଭରଶୀଳ। ଏହି ବ୍ୟାଙ୍କରେ ପ୍ରାୟ ୨୦୦ରୁ ଊର୍ଦ୍ଧ୍ୱ ବରିଷ୍ଠ ନାଗରିକଙ୍କ ପେନସନ ଖାତା ରହିଛି। ଏହି ଶାଖାକୁ ସ୍ଥାନାନ୍ତର କରାଗଲେ ହଜାର ହଜାର ଲୋକ ନାନା ସମସ୍ୟାର ସମ୍ମୁଖୀନ ହେବେ ବୋଲି କମିଟି ପକ୍ଷରୁ ଦିଆଯାଇଥିବା ଦାବିପତ୍ରରେ ଉଲ୍ଲେଖ କରାଯାଇଛି। ସ୍ଥାନାନ୍ତରଣକୁ ନେଇ ହୋଇଥିବା ଯୋଜନାକୁ ବ୍ୟାଙ୍କ କର୍ତ୍ତୃପକ୍ଷ ପ୍ରତ୍ୟାହୃତ କରିବାକୁ ସେମାନେ ଦାବି କରିଛନ୍ତିି। ଦାବି ପୂରଣ ନ ହେଲେ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛନ୍ତି। ଦାବିପତ୍ର ପ୍ରଦାନ ବେଳେ କମିଟି ସଭାପତି ସଞ୍ଜୀବ କୁମାର ପଟ୍ଟନାୟକ, ଉପସଭାପତି ହରିହର ନାୟକ, ଉପଦେଷ୍ଟା ସୁବାସ ଚନ୍ଦ୍ର ପାତ୍ର, ପ୍ରଫେସର ରଙ୍ଗନାଥ ମିଶ୍ର, ନାରାୟଣ ଚନ୍ଦ୍ର ପରିଚ୍ଛା, ଏଲ ଲକ୍ଷ୍ମଣ ପାତ୍ର, ସିଲ୍ଲା ବୈରୀ ଓ କାହ୍ନୁଚରଣ ପତି ପ୍ରମୁଖ ଉପସ୍ଥିତ ଥିଲେ।
