ଜମନକିରା, ୧୧।୨ (ଡି.ଏନ୍.ଏ.)-
କେନ୍ଦ୍ର ଆର ରାଏଜ୍ ଉଭଏ ସରକାର ଗରିବ୍ ଦୁଖି, ବାସହୀନ ପରିବାରମାନକୁ ପକାଘର ଯୁଗେଇ ଦେଉଛନ୍। ଅନେକ୍ ହକ୍ଦାର ହିତାଧିକାରୀ ସରକାରୀ ଯୋଜନାରେ ଘରଖଁଡ଼େ ପାଏବାର ଆଶ୍ରେ ଦରକାରୀ କାଗଜପତର ଧରି ପଁଚେତ୍ନୁ ବ୍ଲକ ତକ୍ ନରଦି ନରଦି ନିହାଲ ହେଇଯାଉଛନ୍। ହେଲେ ସେମାନକର କଥା କେହି ନାଇଁ ଶୁନୁଥିବାର ଅଭିଯୋଗ ହେଉଛେ। ଆଗରୁ ସରକାରୀ ଯୋଜନାର ସଫଲତା ଲାଗି ଜମନକିରା ବ୍ଲକକେ ରାଏଜ ସରକାର ପୁରସ୍କାର ଦେଇଥିଲେ। ହେଲେ ଏହେଦେ ଇ ବ୍ଲକରେ ଆବାସ ଯୋଜନା ବାଟ୍ବନା ହେଇଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ବ୍ଲକ ସଦରନୁ ୫ କି.ମି. ଦୂରେ ରହିଛେ ଛେମୁଣ୍ଡା ଗଁା। ଇ ଗଁାର ଗଜପତି ସାମଲ। ପରିବାର କହେଲେ ଦୁଇ ଝି’ ମୋନିକା ଆର ଶିବାନୀକେ ନେଇ ସଁସାର। ବଛର କେତେ ତଲେ ତାକର ମାଏକିନା ଆରପାରକେ ଚାଲିଯାଇଛନ୍। ଏନ୍ତାଥି ଗଜପତି ନିଜର ଦୁଇ ଝି’ର ସଂଗେ ଗୁଟେ ଝାଟିମାଟିର କୁରିଆରେ ମୁଡ଼ ଗୁଁଜିଛନ୍। ସେ ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ପଁଚେତ୍ନୁ ବ୍ଲକ ତକ୍ ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ସେନ୍ତା ଗଁାର ଶଙ୍କର ଶବର। ପରିବାର କହେଲେ ମାଏକିନା ପ୍ରତିମା ଆର ୪ ଝି’ପୁଓକୁଁ ନେଇ ସଁସାର। ଶଙ୍କର ଝନେ ନିହାତି ଗରିବ୍ ଲୋକ୍। ସେ ଟ୍ରାକ୍ଟର ଡ୍ରାଇଭର ହିସାବେ ଯାହା ରୁଜଗାର କରୁଛନ୍ ସେଥ୍ରେ ତାକର ପରିବାର ଚଲୁଛେ। ହେଲେ ସେଟା ପରିବାରର ପେଟ୍କେ ଅଁଟ୍ଲେ ଦିହିକେ ନାଇଁ। ଏନ୍ତାଥି ସେ ଭଲ ଘରଖଁଡ଼େ କରି ନାଇଁପାରବାର। ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ଶଙ୍କର ଥାନୀଅ ପରଶାସନକେ ବାରବାର ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ଇ ବାବ୍ଦେ ଜମନକିରା ପଁଚେତ୍ ନିର୍ବାହୀ ଅଧ୍କାରୀ କ୍ଷୀରୋଦଚନ୍ଦ୍ର ଖାଡ଼ିଆ, ବିଡିଓ ଅଜୟ ତିଓ୍ବାରୀ ଆର ପଁଚେତ୍ ସମିତି ଅଧ୍ୟକ୍ଷ ଅରୁଣ କୁମାର ନାଏକକୁଁ ପଚ୍ରାଲାରୁ ଆଏବାର ଦିନେ ଇ ଦୁଇ ଗରିବ୍ ପରିବାରକେ ଆବାସ ଯୋଜନାରେ ସାମିଲ କରାଯିବା ବଲି କହିଥିଲେ।
