ନୂଆଦିଲ୍ଲୀ,୨୫।୧: ଟେଲିଭିଜନ ଧାରାବାହିକ ‘ଦିଲ ତୋ ହାପି ହୈ ଜି’ର ଅଭିନେତ୍ରୀ ସେଜଲ ଶର୍ମା ଶୁକ୍ରବାର ଆତ୍ମହତ୍ୟା କରିଥିବା ଜଣାପଡିଛି। ସେଜଲଙ୍କ ଆତ୍ମହତ୍ୟାର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇ ନ ଥିବା ବେଳେ ବ୍ୟକ୍ତିଗତ କାରଣରୁ ସେ ଆତ୍ମହତ୍ୟା କରିଥାଇ ପାରନ୍ତି ବୋଲି କୁହାଯାଉଛି। ତାଙ୍କ ଘର ଉଦୟପୁରରେ ହୋଇଥିବାରୁ ତାଙ୍କର ଅନ୍ତିମ ସଂସ୍କାର ସେଠାରେ କରାଯିବ ବୋଲି ଜଣାପଡିଛି। ସେଜଲ ବିଭିନ୍ନ ଟେଲି ଧାରାବାହିକ ସହ କିଛି ବିଜ୍ଞାପନରେ ମଧ୍ୟ କାମ କରିଛନ୍ତି। ପ୍ରଥମେ ସେଜଲଙ୍କ ମୃତ୍ୟୁ ଖବର ତାଙ୍କ କୋ-ଆକ୍ଟର ଅରୁ ବି ବର୍ମା ଦେଇଥିଲେ। ପ୍ରାୟ ୧୦ ଦିନ ତଳେ ସେ ସେଜଳଙ୍କ ସହ କଥା ହୋଇଥିବା ବେଳେ ସେଜଲ ଏକଦମ୍ ଠିକ୍ ଥିଲେ ବୋଲି ଅରୁ କହିଛନ୍ତି। ଉଭୟଙ୍କ ମଧ୍ୟରେ ଭାଇ-ଭଉଣୀର ସମ୍ପର୍କ ଥିଲା ବୋଲି ସେ କହିଛନ୍ତି। ଏମିତିକି ସେଜଲ ତାଙ୍କୁ ରାକ୍ଷୀ ବାନ୍ଧନ୍ତି ବୋଲି ଅରୁ କହିବା ସହ ସେଜଲ ଯେ ଏ ଦୁନିଆରେ ନାହାନ୍ତି ଏକଥା ସେ ବିଶ୍ୱାସ କରିପାରୁ ନାହାନ୍ତି ବୋଲି ପ୍ରକାଶ କରିଛନ୍ତି।
