ମାଧପୁର, ୨୮।୧୨ (ମନୋଜ କୁମାର ପ୍ରଧାନ)
ଅନୁଗୋଳ ଜିଲା ଆଠମଲ୍ଲିକ ବ୍ଲକ ଅଞ୍ଚଳରେ ରହିଛି ବହୁ ପର୍ଯ୍ୟଟନସ୍ଥଳୀ। ଏହା ମଧ୍ୟରୁ ଅନେକ ରାଜ୍ୟ ପର୍ଯ୍ୟଟନ ମାନଚିତ୍ରରେ ସ୍ଥାନ ପାଇ ନ ଥିଲେ ମଧ୍ୟ ରାଜ୍ୟର କୋଣ ଅନୁକୋଣରୁ ହଜାର ହଜାର ସଂଖ୍ୟାରେ ପର୍ଯ୍ୟଟକ ଏଠାକୁ ଆସିଥାନ୍ତି। ନଦୀ, ଝରଣା, ଉଷ୍ଣପ୍ରସ୍ରବଣ ଓ ବଣ ପାହାଡ଼ ପରି ପ୍ରାକୃତିକ ପରିବେଶର ମଜା ନେବାକୁ ଚଳିତବର୍ଷ ପର୍ଯ୍ୟଟନ ଋତୁରେ ଏଠାରେ ପର୍ଯ୍ୟଟକଙ୍କ ବେଶ୍ ଗହଳି ପରଲକ୍ଷିତ ହେଉଛି।
ମହାନଦୀ କୂଳରେ ଥିବା ମା’ ବିନିକେୟୀଙ୍କ ଶକ୍ତିପୀଠର ମନୋରମ ପରିବେଶ ପିକ୍ନିକ୍ ପାଇଁ ଏକ ପ୍ରକୃଷ୍ଟ ସ୍ଥାନ ହୋଇଥିବାରୁ ସବୁବର୍ଷ ପରି ଏଠାରେ ବହୁ ସଂଖ୍ୟକ ପର୍ଯ୍ୟଟକ ଚଳିତବର୍ଷ ବଣଭୋଜି କରୁଥିବା ଦେଖାଯାଉଛି। ଗୋଟିଏ ସ୍ଥାନରେ ଭୋଜି ସହ ମନ୍ଦିର ଦର୍ଶନ ଓ ନୌବିହାର ସୁବିଧା ଥିବାରୁ ଏହାର ଭରପୂର ମଜା ଉଠାଉଛନ୍ତି ପର୍ଯ୍ୟଟକ। ସେହିପରି ଓଡ଼ଶିଙ୍ଗା କିଆବଣରେ ଅବସ୍ଥିତ ଦେଉଳଝରୀ ଉଷ୍ଣ ପ୍ରସ୍ରବଣ ତଥା ସିଦ୍ଧେଶ୍ୱର ଶୈବପୀଠରେ ମଧ୍ୟ ଭିଡ଼ ଜମୁଛି। ଏଠାରେ ଭକ୍ତ ଓ ପର୍ଯ୍ୟଟକଙ୍କ ସ୍ନାନ ନିମନ୍ତେ ଥିବା ଗରମ ଓ ଥଣ୍ଡା କୁଣ୍ଡ ଏକାଠି ଲଗାଲଗି ହୋଇ ରହିଥିଲେ ବି ୨ଟି ଯାକର ତାପମାତ୍ରା ସ୍ଥିର, ଯାହା ଅତ୍ୟନ୍ତ ବିରଳ ବୋଲି କୁହାଯାଉଛି। ଆଠମଲ୍ଲିକ ସହରର ପ୍ରବେଶ ପଥରେ ଥିବା ପଞ୍ଚଧାର ପର୍ବତମାଳା ପାଦଦେଶର କୁକୁଡ଼ାଦରହ ଓ ଝରଝରୀ ଘାଟି ନିକଟ ଝରଣା କୂଳରେ ବଣଭୋଜି ଆୟୋଜନ ପାଇଁ ଦୂର ଦୂରାନ୍ତରୁ ଲୋକେ ଆସୁଥିବା ଦେଖାଯାଉଛି। ସେହିପରି ମାଧପୁରର ମାନଯୋର ଡ୍ୟାମ୍ର ସୌନ୍ଦର୍ଯ୍ୟକରଣ ହୋଇଥିବାରୁ ଏହା ପୂର୍ବାପେକ୍ଷା ଅଧିକ ସଂଖ୍ୟକ ପର୍ଯ୍ୟଟକଙ୍କୁ ଆକର୍ଷିତ କରୁଛି। ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ଏହି ଡ୍ୟାମ୍ ନିକଟରେ ବନ ବିଭାଗ ତରଫରୁ ନବନିର୍ମିତ ଓ୍ବାଚ୍ ଟାୱାର, ଦେବୀ ମନ୍ଦିର ମଧ୍ୟ ଆକର୍ଷଣର କେନ୍ଦ୍ରବିନ୍ଦୁ ସାଜିଛି। କଇଁଫୁଲିଆ ବାବାଙ୍କ ମଠ ବେଲପୁଞ୍ଜିର ପ୍ରାକୃତିକ ପରିବେଶ ହେଉ ଅବା ଝିମେଇଚୁଆର ବାବା ଗୁପ୍ତେଶର ମନ୍ଦିର, ଅଧିଷ୍ଠାତ୍ରୀ ଦେବୀ ମା’ ମାହେଶ୍ୱରୀ ମନ୍ଦିର ନିକଟରେ ବି ପର୍ଯ୍ୟଟକଙ୍କ ଭିଡ଼ ଜମୁଛି। ତେବେ ପ୍ରତିବର୍ଷ ଏତେ ସଂଖ୍ୟକ ପର୍ଯ୍ୟଟକଙ୍କ ଆଗମନ ହେଉଥିଲେ ବି ସେମାନଙ୍କ ରହଣି ପାଇଁ ଆଠମଲ୍ଲିକରେ ସେପରି କିଛି ବିଶେଷ ସୁବିଧା ନାହିଁ। ଦେଉଳଝରୀ ନିକଟ କୁରୁମଟାପଠାରେ ଥିବା ସରକାରୀ ବଙ୍ଗଳା ଓ ଆଠମଲ୍ଲିକ କଲେଜ ନିକଟରେ ଏନ୍ଏସି ତରଫରୁ ନିର୍ମିତ ସରକାରୀ ବଙ୍ଗଳା ଭୂତ କୋଠିରେ ପରିଣତ ହୋଇଥିବା ବେଳେ ଆଠମଲ୍ଲିକ ସର୍କିଟ ହାଉସ ରକ୍ଷଣାବେକ୍ଷଣ ଅଭାବରୁ ଦୟନୀୟ ସ୍ଥିତିରେ ରହିଛି। ତେଣୁ ବିଭିନ୍ନ ପର୍ଯ୍ୟଟନସ୍ଥଳୀର ଉନ୍ନତୀକରଣ ସହ ପର୍ଯ୍ୟଟକଙ୍କ ରହଣି ପାଇଁ ଆବଶ୍ୟକୀୟ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି।
