ପ୍ୟାରିସ୍/ନୂଆଦିଲ୍ଲୀ,୧୧।୨: ଭାରତ ଶକ୍ତି ସପ୍ତାହ ୨୦୨୫ କାର୍ଯ୍ୟକ୍ରମରେ ସମ୍ବୋଧିତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଅବସରରେ ସେ କହିଛନ୍ତି, ଭାରତ ପ୍ରତ୍ୟେକ କ୍ଷେତ୍ରରେ ଦ୍ରୁତ ଗତିରେ ପ୍ରଗତି କରୁଛି। ଆଗାମୀ ଦୁଇ ଦଶନ୍ଧି ଭାରତ ପାଇଁ ବହୁତ ଗୁରୁତ୍ୱପୂର୍ଣ୍ଣ। ଗତ ୧୦ ବର୍ଷ ମଧ୍ୟରେ ଭାରତ ଯାହା ହାସଲ କରିଛି, ତାହା ଆମକୁ ଆତ୍ମବିଶ୍ୱାସ ଦିଏ ଯେ ଆମେ ସମୟ ପୂର୍ବରୁ ଶକ୍ତି କ୍ଷେତ୍ରର ଲକ୍ଷ୍ୟ ହାସଲ କରିବୁ।
ଦିଲ୍ଲୀରେ ଭାରତ ଶକ୍ତି ସପ୍ତାହ ୨୦୨୫ ଆରମ୍ଭ କରିବା ସମୟରେ ପ୍ରଧାନମନ୍ତ୍ରୀ ମୋଦି କହିଥିଲେ, ବିଶ୍ୱର ପ୍ରତ୍ୟେକ ବିଶେଷଜ୍ଞ କହୁଛନ୍ତି ଯେ, ୨୧ତମ ଶତାବ୍ଦୀ ଭାରତର ଶତାବ୍ଦୀ। ଭାରତ କେବଳ ନିଜର ଅଭିବୃଦ୍ଧିକୁ ନୁହେଁ ବରଂ ବିଶ୍ୱର ଅଭିବୃଦ୍ଧିକୁ ମଧ୍ୟ ଆଗେଇ ନେଉଛି। ଏଥିରେ ଆମର ଶକ୍ତି କ୍ଷେତ୍ରର ଏକ ବଡ଼ ଭୂମିକା ରହିଛି। ଭାରତର ଶକ୍ତି ମହତ୍ୱାକାଂକ୍ଷା ୫ଟି ସ୍ତମ୍ଭ ଉପରେ ଠିଆ ହୋଇଛି। ପ୍ରଥମ- ଆମ ପାଖରେ ସମ୍ବଳ ଅଛି, ଯାହାକୁ ଆମେ ବ୍ୟବହାର କରୁଛୁ। ଦ୍ୱିତୀୟତଃ- ଆମେ ଆମର ଚତୁର ମନକୁ ନବସୃଜନ ପାଇଁ ଉତ୍ସାହିତ କରୁଛୁ। ତୃତୀୟ- ଆମର ଆର୍ଥିକ ଏବଂ ରାଜନୈତିକ ସ୍ଥିରତା ଅଛି। ଚତୁର୍ଥ- ଭାରତର ଏକ ରଣନୈତିକ ଭୌଗୋଳିକ ସ୍ଥିତି ଅଛି, ଯାହା ଶକ୍ତି ବାଣିଜ୍ୟକୁ ଅଧିକ ଆକର୍ଷଣୀୟ ଏବଂ ସହଜ କରିଥାଏ। ପଞ୍ଚମ- ଭାରତ ବିଶ୍ୱସ୍ତରୀୟ ସ୍ଥିରତା ପ୍ରତି ପ୍ରତିବଦ୍ଧ, ଯାହା ଭାରତର ଶକ୍ତି କ୍ଷେତ୍ରରେ ନୂତନ ସମ୍ଭାବନା ସୃଷ୍ଟି କରୁଛି।
ପ୍ରଧାନମନ୍ତ୍ରୀ ମୋଦି କହିଛନ୍ତି, ଏକ ବିକଶିତ ଭାରତ ପାଇଁ ଆଗାମୀ ଦୁଇ ଦଶନ୍ଧି ବହୁତ ଗୁରୁତ୍ୱପୂର୍ଣ୍ଣ। ଆଗାମୀ ପାଞ୍ଚ ବର୍ଷ ମଧ୍ୟରେ, ଅନେକ ମାଇଲଖୁଣ୍ଟ ଅତିକ୍ରମ କରିବାକୁ ପଡିବ। ଆମର ଅନେକ ଶକ୍ତି ଲକ୍ଷ୍ୟ ୨୦୩୦ ସମୟସୀମା ସହିତ ସମନୱିତ। ଆମେ ୨୦୩୦ ସୁଦ୍ଧା ୫୦୦ ଗିଗା ୱାଟ ନବୀକରଣୀୟ ଶକ୍ତି କ୍ଷମତା ଯୋଡିବାକୁ ଚାହୁଁଛୁ। ଭାରତ ୨୦୩୦ ସୁଦ୍ଧା ନେଟ ଶୂନ୍ୟ କାର୍ବନ ମହତ୍ତ୍ୱାକାଂକ୍ଷାର ଲକ୍ଷ୍ୟ ରଖିଛି। ୨୦୩୦ ସୁଦ୍ଧା ୫ ନିୟୁତ ମେଟ୍ରିକ ଟନ ସବୁଜ ହାଇଡ୍ରୋଜେନ ଉତ୍ପାଦନ କରିବା ଆମର ଲକ୍ଷ୍ୟ। ଆମର ଏହି ଲକ୍ଷ୍ୟଗୁଡ଼ିକ ମହତ୍ୱାକାଂକ୍ଷୀ ମନେହୁଏ, କିନ୍ତୁ ଭାରତ ୧୦ ବର୍ଷ ମଧ୍ୟରେ ଯାହା ହାସଲ କରିଛି ତାହା ଏହି ଆତ୍ମବିଶ୍ୱାସ ସୃଷ୍ଟି କରିଛି ଯେ ଆମେ ଏହି ଲକ୍ଷ୍ୟଗୁଡ଼ିକୁ ମଧ୍ୟ ହାସଲ କରିବୁ।
ଗତ ୧୦ ବର୍ଷ ମଧ୍ୟରେ, ଭାରତ ଦଶମରୁ ପଞ୍ଚମ ଅର୍ଥନୀତିକୁ ଉନ୍ନୀତ ହୋଇଛି। ୧୦ ବର୍ଷ ମଧ୍ୟରେ ଆମେ ଆମର ସୌର ଶକ୍ତି କ୍ଷମତାକୁ ୩୨ ଗୁଣ ବୃଦ୍ଧି କରିଛୁ। ଆଜି ଭାରତ ବିଶ୍ୱର ତୃତୀୟ ବୃହତ୍ତମ ସୌରଶକ୍ତି ଉତ୍ପାଦନକାରୀ ରାଷ୍ଟ୍ର। ଆମର ଅଣ-ଜୀବାଶ୍ମ କ୍ଷମତା ତିନିଗୁଣ ଅଧିକ। ପ୍ୟାରିସ ଚୁକ୍ତିନାମା ପୂରଣ କରିବାରେ ଭାରତ ଜି୨୦ ଦେଶମାନଙ୍କ ମଧ୍ୟରେ ପ୍ରଥମ ଦେଶ। ଭାରତ କିପରି ସମୟ ପୂର୍ବରୁ ତା’ର ଲକ୍ଷ୍ୟ ହାସଲ କରୁଛି ତାହାର ଏକ ଉଦାହରଣ ହେଉଛି ଇଥାନଲ ମିଶ୍ରଣ। ଆଜି ଭାରତ ୯୦ ପ୍ରତିଶତ ଇଥାନଲ ମିଶ୍ରଣ କରୁଛି।
