ଦୁବାଇ,୧୭।୧୧ (ପି.ଟି.): ସଦ୍ୟ ପ୍ରକାଶିତ ଅନ୍ତର୍ଜାତୀୟ ଟେଷ୍ଟ ର଼୍ୟାଙ୍କିଙ୍ଗ୍ରେ ଭାରତୀୟ ଦ୍ରୁତ ବୋଲର ମହମ୍ମଦ ସାମି ଓ ଓପନର ମୟଙ୍କ ଅଗ୍ରଓ୍ବାଲ କ୍ୟାରିୟର ଶ୍ରେଷ୍ଠ ସ୍ଥାନ ହାସଲ କରିଛନ୍ତି। ବାଂଲାଦେଶ ବିପକ୍ଷ ପ୍ରଥମ ଟେଷ୍ଟରେ ଭାରତ ଏକ ଇନିଂସ ଓ ୧୩୦ ରନ୍ରେ ବିଜ ହାସଲ କରିବା ରବିବାର ପ୍ରକାଶିତ ର଼୍ୟାଙ୍କିଙ୍ଗ୍ରେ ଭାରତୀୟ ଖେଳାଳିମାନେ ଉନ୍ନତି କରିଛନ୍ତି। ସାମି ପ୍ରଥମ ଓ ଦ୍ୱିତୀୟ ଇନିଂସରେ ଯଥାକ୍ରମେ ୩ ଓ ୪ ଉଇକେଟ୍ ହାସଲ କରି ୮ଟି ସ୍ଥାନ ଉପରକୁ ଉଠି ବୋଲିଂ ତାଲିକାର ସପ୍ତମ ସ୍ଥାନ ଅଧିକାର କରିଛନ୍ତି। ସେ ତୃତୀୟ ଶ୍ରେଷ୍ଠ ଭାରତୀୟ ବୋଲର ଭାବେ ୭୯୦ ରେଟିଂ ପଏଣ୍ଟ ହାସଲ କରିଛନ୍ତି। ତେବେ ପୂର୍ବରୁ କିମ୍ବଦନ୍ତୀ ବୋଲର କପିଲ ଦେବ ୮୭୭ ଓ ଯଶପ୍ରୀତ ବୁମ୍ରା ୮୩୨ ପଏଣ୍ଟ ପାଇଥିଲେ।
ସେହିପରି ୨୪୩ ରନର ଦ୍ୱିଶତକ ପାଳି ଖେଳିଥିବା ଅଗ୍ରଓ୍ବାଲ ଉପରକୁ ଉଠି ୧୧ତମ ସ୍ଥାନ ଅଧିକାର କରିଛନ୍ତି। ୨୮ ବର୍ଷୀୟ ଅଗ୍ରଓ୍ବାଲ ପ୍ରଥମ ୮ଟି ଟେଷ୍ଟରେ ୮୫୮ ରନ ସଂଗ୍ରହ କରି ୬୯୧ ରେଟିଂ ପଏଣ୍ଟ ହାସଲ କରିଛନ୍ତି। ବିଶ୍ୱର କେବଳ ୭ଜଣ ବ୍ୟାଟ୍ସମ୍ୟାନ ପ୍ରଥମ ୮ଟି ଟେଷ୍ଟରେ ଅଗ୍ରଓ୍ବାଲଙ୍କଠାରୁ ଅଧିକ ରନ ସଂଗ୍ରହ କରିଛନ୍ତି। ସେମାନେ ହେଲେ ଡନ୍ ବ୍ରାଡମ୍ୟାନ (୧୨୧୦), ଇଭର୍ଟନ ଓ୍ବିକ୍ସ (୯୬୮), ସୁନୀଲ ଗାଭାସ୍କର (୯୩୮), ମାର୍ଟ ଟେଲର (୯୦୬), ଜର୍ଜ ହେଡଲୀ (୯୦୪), ଫ୍ରାଙ୍କ ଓ୍ବରେଲ (୮୯୦) ଓ ହର୍ବଟ ସୁଟକ୍ଲିଫ୍ (୮୭୨)।
ସେହିପରି ଅଲରାଉଣ୍ଡର ରବୀନ୍ଦ୍ର ଜାଡେଜା ୪ଟି ସ୍ଥାନ ଉପରକୁ ଉଠି ବ୍ୟାଟ୍ସମ୍ୟାନ ତାଲିକାର ଯୁଗ୍ମ ୩୫ତମ ସ୍ଥାନରେ ରହିଛନ୍ତି। ସେହିପରି ଦ୍ରୁତ ବୋଲର ଇଶାନ୍ତ ଶର୍ମା ଓ ଉମେଶ ଯାଦବ ଗୋଟିଏ ସ୍ଥାନ ଉପରକୁ ଉଠି ଯଥାକ୍ରମେ ୨୦ ଓ ୨୨ତମ ସ୍ଥାନରେ ରହିଛନ୍ତି। ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ବୋଲିଂ ତାଲିକାର ଶ୍ରେଷ୍ଠ ୧୦ତମ ସ୍ଥାନରେ ରହିଛନ୍ତି ଓ ଅଲରାଉଣ୍ଡର ତାଲିକାରେ ଚତୁର୍ଥ ସ୍ଥାନରେ ରହିଛନ୍ତି।
ବାଂଲାଦେଶ ଦୃଷ୍ଟିକୋଣରୁ ଦେଖିବାକୁ ଗଲେ ମୁସ୍ଫିକର ରହିମ ୫ଟି ସ୍ଥାନ ଉପରକୁ ଉଠି ବ୍ୟାଟିଂ ତାଲିକାର ୩୦ତମ ସ୍ଥାନରେ ରହିଛନ୍ତି। ସେହିପରି ଲିଟନ ଦାସ ୯୨ରୁ ୮୬ତମ ସ୍ଥାନକୁ ଉନ୍ନତି କରିଛନ୍ତି। ବୋଲିଂରେ ଆବୁ ଜାଏଦ ୧୮ଟି ସ୍ଥାନ ଉପରକୁ ଉଠି ୬୨ତମ ସ୍ଥାନରେ ରହିଛନ୍ତି।
ଆଇସିସି ବିଶ୍ୱ ଟେଷ୍ଟ ଚାମ୍ପିୟନଶିପ୍ ପଏଣ୍ଟ ତାଲିକାରେ ଭାରତ ୩୦୦ ପଏଣ୍ଟ ପାଇ ତା’ର ଶୀର୍ଷ ସ୍ଥାନକୁ ଆହୁରି ମଜଭୁତ କରିଛି। ଶ୍ରୀଲଙ୍କା ଓ ନ୍ୟୁଜିଲାଣ୍ଡ ୬୦ ଲେଖାଏ ପଏଣ୍ଟ ପାଇଛନ୍ତି। ଓ୍ବେଷ୍ଟଇଣ୍ଡିଜ୍ ଓ ଦକ୍ଷିଣ ଆଫ୍ରିକା ଗୋଟିଏ ଲେଖାଏ ସିରିଜ ଖେଳିଥିଲେ ମଧ୍ୟ କୌଣସି ପଏଣ୍ଟ ପାଇନାହାନ୍ତି। ଲିଗ୍ ଶେଷରେ ଶ୍ରେଷ୍ଠ ଦୁଇଟି ଦଳ ୟୁନାଇଟେଡ କିଙ୍ଗ୍ଡମ୍ ରେ ୨୦୨୧ ଜୁନରେ ଫାଇନାଲ ମୁକାବିଲାରେ ଅବତୀର୍ଣ୍ଣ ହେବେ ଓ ବିଜୟୀ ଦଳ ବିଶ୍ୱ ଟେଷ୍ଟ ଚାମ୍ପିୟନଶିପ୍ ମୁକୁଟ ହାସଲ କରିବ।
