ଗୋପାଳପୁର,୭ା୧୧-ଆଇଆର୍ଡିଏ (ଇନ୍ସ୍ୟୁରାନ୍ସ ରେଗୁଲେଟାରି ଆଣ୍ଡ ଡେଭଲପ୍ମେଣ୍ଟ ଅଥରିଟି)ର ଅଧିକାରୀ ପରିଚୟ ଦେଇ ଅନ୍ଲାଇନ୍ରେ ଗଞ୍ଜାମ ଜିଲା ଗୋପାଳପୁର ଥାନା ଡୁରା ଗ୍ରାମର ଜଣେ ବ୍ୟକ୍ତିଙ୍କଠାରୁ ୧୭ ଲକ୍ଷରୁ ଊର୍ଦ୍ଧ୍ୱ ଟଙ୍କା ଠକେଇ ହୋଇଥିବା ଅଭିଯୋଗ ହୋଇଛି। ଏହାର ଶିକାର ହୋଇଛନ୍ତି ଶକ୍ତି କୁମାର ପାତ୍ର। ମଙ୍ଗଳବାର ଗୋପାଳପୁର ଥାନାଧିକାରୀ ବିବେକାନନ୍ଦ ମହନ୍ତ ଠକେଇର ତଦନ୍ତ ଚଳାଇଥିବା ବେଳେ ଶକ୍ତିଙ୍କ ବାପା ବ୍ରହ୍ମପୁର ସାଇବର ଥାନାରେ ଅଭିଯୋଗ କରିବେ ବୋଲି କହିଛନ୍ତି।
୨୦୧୩ରେ ଶକ୍ତିଙ୍କ ନଁାରେ ତାଙ୍କ ବାପା ବିର୍ଲା ସନ୍ ଲାଇଫ୍ ଇନ୍ସ୍ୟୁରାନ୍ସରେ ଏକ ପଲିସି କରିଥିଲେ। ୨୦୧୫ରେ ଜଣେ ବ୍ୟକ୍ତି ତାଙ୍କ ବାପାଙ୍କୁ ଫୋନ କରି ଆଇଆର୍ଡିଏର ଅଧିକାରୀ ବୋଲି ପରିଚୟ ଦେଇଥିଲେ। ବିର୍ଲା ସନ୍ ଲାଇଫ ଇନ୍ସ୍ୟୁରାନ୍ସର ବିବରଣୀ ଦେବା ସହ ଉକ୍ତ ପଲିସିରେ ୨ ଲକ୍ଷ ୪୫ ହଜାର ଟଙ୍କା ବୋନସ ଆସିଛି, ଏଥିରେ ଇନକମ୍ ଟ୍ୟାକ୍ସ ଲାଗିବ ବୋଲି କହିଥିଲେ। ଏଥିରୁ ମୁକ୍ତି ପାଇବାକୁ ହେଲେ ଅନ୍ୟ ଏକ ଇନ୍ସ୍ୟୁରାନ୍ସ କରିବାକୁ କହି ଏକ ଆକାଉଣ୍ଟ ନମ୍ବର ତାଙ୍କୁ ଦେଇଥିଲେ। ଏହା ଶୁଣି ତାଙ୍କ ବାପା ଉକ୍ତ ଆକାଉଣ୍ଟ ନମ୍ବରରେ ୪୫ ହଜାର ଟଙ୍କା ଜମା କରିଥିଲେ। ପରେ ଉକ୍ତ ଇନ୍ସ୍ୟୁରାନ୍ସର ଏକ ନକଲ ଘରେ ପହଞ୍ଚତ୍ଥିଲା, କିନ୍ତୁ ବୋନସ ଟଙ୍କା ଆସିନଥିଲା। ପୁଣି ଉକ୍ତ ବ୍ୟକ୍ତି ଫୋନ କରି ତାଙ୍କ ବାପାଙ୍କୁ ଇନ୍କମ୍ ଟ୍ୟାକ୍ସ ଭରିବା ପାଇଁ କହି ଆକାଉଣ୍ଟ ଓ ଫୋନ ନମ୍ବର ଦେଇଥିଲେ। ଏଥିରେ ମଧ୍ୟ ତାଙ୍କ ବାପା ୧୯ ହଜାର ଟଙ୍କା ପୈଠ କରିଥିଲେ। ପରେ ବିର୍ଲା ସନ୍ ଲାଇଫ୍ ଇନ୍ସ୍ୟୁରାନ୍ସର ଏମ୍ଡି ପରିଚୟ ଦେଇ ଫୋନ ଆସିଥିଲା। ବୋନସ ଟଙ୍କା ପାଇବା ପାଇଁ ଏକ ଆକାଉଣ୍ଟ ନମ୍ବରରେ ଟଙ୍କା ପଠାଇବାକୁ କୁହାଯାଇଥିଲା। ସେହି ଆକାଉଣ୍ଟ ନମ୍ବରରେ ମଧ୍ୟ ତାଙ୍କ ବାପା ଟଙ୍କା ଜମା କରିଥିଲେ। ଏପରି ୨୦୧୫ରୁ ୨୦୧୭ ମଧ୍ୟରେ ୨୫ଟି ବ୍ୟାଙ୍କ ଆକାଉଣ୍ଟରେ ୧୭ ଲକ୍ଷରୁ ଊର୍ଦ୍ଧ୍ୱ ଟଙ୍କା ଶକ୍ତିଙ୍କ ବାପା ଜମା କରିିଥିଲେ। କିଛି ଦିନ ପରେ ଶକ୍ତିଙ୍କ ବାପା କଲ ଆସିଥିବା ନମ୍ବରକୁ ଫୋନ କରିବାରୁ ତାହା ସୁଇଚ୍ ଅଫ୍ କହିବାରୁ ଏ ନେଇ ଅନ୍ଲାଇନରେ ପୋଲିସର ଉଚ୍ଚ ପଦାଧିକାରୀଙ୍କୁ ଅଭିଯୋଗ କରିଥିଲେ। ମଙ୍ଗଳବାର ଉକ୍ତ ଅଭିଯୋଗକୁ ଗୋପାଳପୁର ଥାନାଧିକାରୀ ପାଇ ଶକ୍ତିଙ୍କ ବାପାଙ୍କୁ ଡାକି ବିଭିନ୍ନ ଡକ୍ୟୁମେଣ୍ଟ ଯାଞ୍ଚ କରିଥିଲେ।
