ଭବାନୀପାଟଣା/କୋକସରା,୧୬।୫(ଡି.ଏନ୍.ଏ.)-ହାଇଦ୍ରାବାଦରେ ଫସି ରହିଥିବା କଳାହାଣ୍ଡି ଜିଲାର ୪୦ ଜଣ ପ୍ରବାସୀ ଓଡ଼ିଆ ଶୁକ୍ରବାର ଏକ୍ ବସ୍ରେ ଆସି କୋକସରା ବ୍ଲକ ଅଫିସ ସମ୍ମୁଖରେ ପହଞ୍ଚିଥିଲେ। ବିଡିଓ ମନୀଷା ଦାସ ସେମାନଙ୍କୁ ମାଝିଗୁଡାଠାରେ ଥିବା ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରରେ ରଖିବାର ବ୍ୟବସ୍ଥା କରିଥିଲେ। ଏଥିରେ ବ୍ଲକ ଅନ୍ତର୍ଗତ ଥୁଟିବର ଗ୍ରାମର ୩୨ଜଣ ଥିବା ବେଳେ ବଡକେନ୍ଦୁଗୁଡାର ୨, ଟେମରାର ୨, ଫୁପଗାଁର ଜଣେ, ଧର୍ମଗଡ ବ୍ଲକ ତେଣ୍ଡାପାଳି ଗ୍ରାମର ଜଣେ, ବଗାଡ଼ରର ଜଣେ ଓ ଜୟପାଟଣା ବ୍ଲକର ଜଣେ ରହିଛନ୍ତି। ସ୍ବାସ୍ଥ୍ୟକେନ୍ଦ୍ରକୁ ନିଆଯିବା ସମୟରେ ଡବ୍ଲ୍ୟୁଇଓ ଦାମୋଦର ବିଶ୍ୱାଳ, ସାମାଜିକ ସୁରକ୍ଷା କର୍ମୀ ଦୀପକ କୁମାର ବେହେରା, ମାଝିଗୁଡା ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ କୃଷ୍ଣଚନ୍ଦ୍ର ଦାଶ, କୋକସରା ସରପଞ୍ଚ କିଶୋର ଚନ୍ଦ୍ର ପ୍ରଧାନୀ ପ୍ରମୁଖ ଉପସ୍ଥିତ ଥିଲେ।
