କେନ୍ଦୁଝର, ୧୧ା୫(ଡି.ଏନ୍.ଏ.)-କେନ୍ଦୁଝର ଜିଲାରେ ମହାମାରୀ କରୋନା ଭାଇରସ କୋଭିଡ୍-୧୯ର ସଂକ୍ରମଣ ପ୍ରତିରୋଧ ଉଦ୍ଦେଶ୍ୟରେ ଜିଲାର ସମସ୍ତ କ୍ୱାରାଣ୍ଟାଇନ୍ ସେଣ୍ଟର, ଅସ୍ଥାୟୀ ସ୍ବାସ୍ଥ୍ୟ କେନ୍ଦ୍ର ଓ ଆଇସୋଲେସନ ସେଣ୍ଟରରେ ଜିଲାପାଳ ଓ ଜିଲା ମାଜିଷ୍ଟ୍ରେଟ ଆଶିଷ ଠାକ୍ରେ ସିଆର୍ପିସିର ୧୪୪ ଧାରା ଜାରି କରିଛନ୍ତି। ରାଜ୍ୟ ସରକାରଙ୍କ ପଦକ୍ଷେପ ଅନୁଯାୟୀ ଲକ୍ଡାଉନ୍ରେ ବିଭିନ୍ନ ରାଜ୍ୟରେ ଫସି ରହିଥିବା ପ୍ରବାସୀ ଶ୍ରମଜୀବୀ, ଛାତ୍ରୀଛାତ୍ର, ତୀର୍ଥ ଯାତ୍ରୀମାନେ ନିଜ ଜିଲାକୁ ଫେରୁଛନ୍ତି। ଜିଲାରେ ପହଞ୍ଚିବା ପରେ ପ୍ରବାସୀମାନେ ଗ୍ରାମ ପଞ୍ଚାୟତସ୍ତରୀୟ କ୍ୱାରାଣ୍ଟାଇନ ସେଣ୍ଟରରେ ୨୧ଦିନ ରହିବେ। ଏହି କେନ୍ଦ୍ରମାନଙ୍କରେ ସାମାଜିକ ଦୂରତ୍ୱ କଡ଼ାକଡ଼ି ଭାବେ ପାଳନ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଉପରୋକ୍ତ କେନ୍ଦ୍ରମାନଙ୍କରେ ବାହାର ଲୋକମାନଙ୍କର ବେନିୟମ ପ୍ରବେଶ ଫଳରେ ସରକାରଙ୍କ ନିର୍ଦ୍ଦେଶାବଳୀ ଉଲ୍ଲଂଘନ ଏବଂ କରୋନା ଭାଇରସ ସଂକ୍ରମଣର ଆଶଙ୍କା ରହିଛି। ଏଣୁ କରୋନା ଭାଇରସ ପ୍ରତିରୋଧ ନିମନ୍ତେ ଜିଲାପାଳ ଓ ଜିଲା ମାଜିଷ୍ଟ୍ରେଟ ରବିବାର ଜିଲାର ସମସ୍ତ କ୍ୱାରାଣ୍ଟାଇନ ସେଣ୍ଟର ଗୁଡ଼ିକରେ ୧୪୪ ଧାରା ଜାରି କରିଛନ୍ତିି। ଏହା ଆସନ୍ତା ୩୦ ତାରିଖ ମଧ୍ୟରାତ୍ର ପର୍ଯ୍ୟନ୍ତ ବଳବତ୍ତର ରହିବ।
