ଭୁବନେଶ୍ୱର, ୧୯।୧୦(କ୍ରୀଡ଼ା ପ୍ରତିନିଧି)-
ଆଗାମୀ ନଭେମ୍ବର ୧ ଓ ୨ ତାରିଖରେ ଅଲିମ୍ପିକ୍ କ୍ୱାଲିଫାୟର୍ସ ହକି କଳିଙ୍ଗ ଷ୍ଟାଡିୟମରେ ଅନୁଷ୍ଠିତ ହେବ। ଏଥିରେ ଉଭୟ ଭାରତୀୟ ମହିଳା ଓ ପୁରୁଷ ଦଳ ଖେଳିବେ। ମହିଳା ଦଳର ପ୍ରତିଦ୍ୱନ୍ଦ୍ୱୀ ଆମେରିକା ଥିବାବେଳେ ପୁରୁଷ ଦଳ ରୁଷିଆ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରିବ। ଉଭୟ ଦଳ ୨ଟି ଲେଖାଏ ମ୍ୟାଚ ଖେଳିବେ। ଏହାପରେ ୨୦୨୦ ଟୋକିଓ ଅଲିମ୍ପିକ୍ସ ପାଇଁ କେଉଁ ଦଳ ଯୋଗ୍ୟତା ଅର୍ଜନ କରିବ ତାହା ସ୍ପଷ୍ଟ ହେବ। ଏହି ଗୁରୁତ୍ୱପୂର୍ଣ୍ଣ ପ୍ରତିଯୋଗିତା ପାଇଁ ଶୁକ୍ରବାର ଭାରତୀୟ ହକି ଦଳ ଘୋଷିତ ହୋଇଛି। ଅଧିନାୟିକା ରାଣୀ ରାମପାଲଙ୍କ ଉପସ୍ଥିତିରେ ମୁଖ୍ୟ କୋଚ୍ ଜୋର୍ଡ ମାରିଜନେ ମହିଳା ଦଳ ତାଲିକା ଘୋଷଣା କରିଥିବାବେଳେ ଅଧିନାୟକ ମନପ୍ରୀତ ସିଂ ଉପସ୍ଥିତ ଥାଇ ମୁଖ୍ୟ କୋଚ୍ ଗ୍ରାହାମ ରିଡ୍ ପୁରୁଷ ଦଳ ଘୋଷଣା କରିଥିଲେ।
ରାଣୀଙ୍କ ନେତୃତ୍ୱାଧୀନ ମହିଳା ଦଳରେ ଓଡ଼ିଶାର ୩ ଖେଳାଳି ସ୍ଥାନ ପାଇଛନ୍ତି। ସେମାନେ ହେଲେ ଦୀପ୍ ଗ୍ରେସ୍ ଏକ୍କା, ଲିଲିମା ମିଞ୍ଜ ଓ ନମିତା ଟପ୍ପୋ। ମନପ୍ରୀତଙ୍କ ପୁରୁଷ ଦଳରେ କିନ୍ତୁ ମାତ୍ର ଜଣେ ଓଡ଼ିଆ ଖେଳାଳି ଅମିତ ରୋହିଦାସ ସ୍ଥାନ ହାସଲ କରି ପାରିଛନ୍ତି। ଅଭିଜ୍ଞ ଡିଫେଣ୍ଡର ବୀରେନ୍ଦ୍ର ଲାକ୍ରା ବାଦ୍ ପଡ଼ିଛନ୍ତି। ସବିତାଙ୍କୁ ମହିଳା ଦଳର ଏବଂ ଏସ.ଭି. ସୁନୀଲଙ୍କୁ ପୁରୁଷ ଦଳର ଉପଅଧିନାୟିକା ଓ ଉପଅଧିନାୟକ ଦାୟିତ୍ୱ ଦିଆ ଯାଇଛି। ଟୋକିଓ ଅଲିମ୍ପିକ୍ସ ୨୦୨୦ ଜୁଲାଇ ୨୫ରୁ ଅଗଷ୍ଟ ୭ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିରେ ୧୨ଟି ଲେଖାଏ ମହିଳା ଓ ପୁରୁଷ ଦଳ ଅଂଶଗ୍ରହଣ କରିବେ।
ସନ୍ତୁଳନକୁ ଧ୍ୟାନରେ ରଖାଯାଇଛି
ବେଲଜିୟମ ଟୁର୍ରେ ଶତପ୍ରତିଶତ ବିଜୟ ରେକର୍ଡ ନେଇ ଫେରିବାପରେ ଅଲିମ୍ପିକ୍ସ କ୍ୱାଲିଫାୟର୍ସ ପାଇଁ ୧୮ ଜଣିଆ ଦଳ ଚୟନ କରିବା ସହଜ ନ ଥିଲା ବୋଲି କହିଛନ୍ତି ମୁଖ୍ୟ କୋଚ୍ ରିଡ୍। ଦଳରେ ସନ୍ତୁଳନକୁ ପ୍ରାଥମିକତା ଦିଆ ଯାଇଛି। ବିଭିନ୍ନ ବିଭାଗରେ ବିକଳ୍ପ ଖେଳାଳିଙ୍କୁ ଧ୍ୟାନରେ ରଖି ଆମେ ଏହି ଦଳ ଚୟନ କରିଛୁ। ରୁଷିଆ ବିପକ୍ଷରେ ଆମକୁ ଏକାଗ୍ରତାର ସହିତ ଖେଳିବାକୁ ପଡ଼ିବ ବୋଲି ସେ ପ୍ରକାଶ କରିଛନ୍ତି।
ରିଦିମ ଗୁରୁତ୍ୱପୂର୍ଣ୍ଣ
ଅଲିମ୍ପିକ୍ କ୍ୱାଲିଫାୟର୍ସ ପୂର୍ବରୁ ପ୍ରସ୍ତୁତି ପାଇଁ ଇଂଲଣ୍ଡ ଟୁର୍ରେ ଯାଇଥିବା ମହିଳା ଦଳ ଚମତ୍କାର ପ୍ରଦର୍ଶନ କରିଛି। ତେଣୁ ଆମେ ଦଳ ଅପରିବର୍ତ୍ତିତ ରଖିବାକୁ ନିଷ୍ପତ୍ତି ନେଇଛୁ। ଅଭିଜ୍ଞ ଓ ଯୁବ ଖେଳାଳିଙ୍କୁ ନେଇ ଦଳ ବେଶ୍ ସନ୍ତୁଳିତ। ଇଂଲଣ୍ଡ ଟୁର୍ରେ ଭଲ ପ୍ରଦର୍ଶନ ହୋଇଥିବାରୁ ସେହି ରିଦିମକୁ ବଜାୟ ରଖିବା ଉପରେ ଗୁରୁତ୍ୱ ଦିଆଯାଇଛି। ଆମେରିକା ଏକ ଭଲ ଦଳ। ତେଣୁ ଆମେ ଏହି ଦଳକୁ ଭେଟିବା ପୂର୍ବରୁ କୌଣସି ତ୍ରୁଟି କରିବାକୁ ଚାହୁଁନାହୁଁ ବୋଲି ମାରିଜନେ ପ୍ରକାଶ କରିଛନ୍ତି।
ଓଡ଼ିଶା ଖେଳାଳି ଅବିଚ୍ଛେଦ୍ୟ ଅଙ୍ଗ
ଭାରତୀୟ ମହିଳା ଦଳରେ ସ୍ଥାନ ପାଇଥିବା ଓଡ଼ିଶା ଖେଳାଳିମାନେ ଚମତ୍କାର ପ୍ରଦର୍ଶନ କରି ଆସିଛନ୍ତି। ଆମେ କୌଣସି ବ୍ୟକ୍ତିଗତ ନୁହେଁ ଦଳଗତଭାବେ ଭଲ ଖେଳି ଆସୁଛୁ। ପ୍ରଦର୍ଶନ ଦୃଷ୍ଟିରୁ ଓଡ଼ିଶା ଖେଳାଳିମାନେ ଏବେ ଦଳର ଅବିଚ୍ଛେଦ୍ୟ ଅଙ୍ଗ ପାଲଟି ଯାଇଛନ୍ତି। ନିକଟ ଅତୀତରେ ଆମେରିକା ଭଲ ଖେଳି ଆସୁଥିଲେ ହେଁ ଆମେ ମଧ୍ୟ ପ୍ରସ୍ତୁତ ଅଛୁ। ଆମର ଫିଟ୍ନେସ୍ ସ୍ତରରେ ବହୁ ଉନ୍ନତି ଆସିଛି। ଆମେ ଏବେ ବିଶ୍ୱର ଯେ କୌଣସି ଦଳକୁ ହରାଇବାର କ୍ଷମତା ରଖିଛୁ। ତେଣୁ ଆମେରିକା କିପରି ଖେଳିବ ତା’ ଉପରେ ଗୁରୁତ୍ୱ ନ ଦେଇ ଆମେ ନିଜ ଦକ୍ଷତା ଅନୁସାରେ ଖେଳି ଅଲିମ୍ପିକ୍ସ ଯୋଗ୍ୟତା ପାଇଁ ଲକ୍ଷ୍ୟ ରଖିଛୁ ବୋଲି ଅଧିନାୟିକା ରାଣୀ ପ୍ରକାଶ କରିଛନ୍ତି। ଭାରତୀୟ ମହିଳା ଦଳ ପ୍ରଥମଥର ପାଇଁ କଳିଙ୍ଗ ଷ୍ଟାଡିୟମରେ ଖେଳିବାକୁ ଯାଉଛି। ଓଡ଼ିଶା ଦର୍ଶକ ହକିକୁ ସର୍ବଦା ସମର୍ଥନ ଦେଇ ଆସିଛନ୍ତି। ବର୍ଷା କିମ୍ବା ଶୀତକୁ ଏମାନେ ଖାତିର ନ କରି ଦଳକୁ ଉତ୍ସାହିତ କରିଛନ୍ତି। ତେଣୁ ଆମେ ମଧ୍ୟ ଏହି ଷ୍ଟାଡିୟମରେ ମ୍ୟାଚ ଖେଳିବାକୁ ବ୍ୟଗ୍ର। ଦର୍ଶକଙ୍କ ଭରପୂର ଉପସ୍ଥିତି ନିଶ୍ଚିତ ଆମକୁ ଅଧିକ ଉତ୍ସାହ ପ୍ରଦାନ କରିବ ବୋଲି ରାଣୀ କହିଛନ୍ତି।
ରୁଷିଆକୁ ହାଲ୍କା ନେଉନାହୁଁ
ର଼୍ୟାଙ୍କିଙ୍ଗ୍ରେ ଭାରତ ତୁଳନାରେ ରୁଷିଆ ବହୁ ପଛରେ ଥିଲେ ହେଁ ଏହି ଦଳକୁ କୌଣସି ପରିସ୍ଥିତିରେ ହାଲ୍କା ଭାବେ ନେଇ ହେବନି। କାରଣ ଆମକୁ ମନେ ରଖିବାକୁ ହେବ ଯେ ଏହି ଦଳ ମଧ୍ୟ ଅଲିମ୍ପିକ୍ସ କ୍ୱାଲିଫାୟର୍ସ ଖେଳିବାକୁ ଆସିଛି। ଦଳର ପ୍ରସ୍ତୁତି ମଧ୍ୟ ସେହି ଅନୁସାରେ ହୋଇଥିବ ନିଶ୍ଚିତ। ଆମେ ପ୍ରତିପକ୍ଷ ଦଳକୁ ସମ୍ମାନ ଜଣାଇ ନିଜ ଦକ୍ଷତା ଅନୁସାରେ ଖେଳିବୁ ଏବଂ ଯୋଗ୍ୟତା ହାସଲ କରିବାକୁ ଚେଷ୍ଟା କରିବୁ ବୋଲି ଅଧିନାୟକ ମନପ୍ରୀତ ପ୍ରକାଶ କରିଛନ୍ତି।
ଭାରତୀୟ ପୁରୁଷ ହକି ଦଳ
ପି.ଆର. ଶ୍ରୀଜେଶ, କ୍ରିଷ୍ଣନ ବାହାଦୁର ପାଠକ, ହରମନପ୍ରୀତ ସିଂ, ବରୁଣ କୁମାର, ସୁରେନ୍ଦର କୁମାର, ଗୁରିନ୍ଦର ସିଂ, ରୂପିନ୍ଦର ପାଲ୍ ସିଂ, ଅମିତ ରୋହିଦାସ, ମନପ୍ରୀତ ସିଂ(ଅଧିନାୟକ), ନୀଳକାନ୍ତ ଶର୍ମା, ହାର୍ଦ୍ଦିକ ସିଂ, ବିବେକ ସାଗର ପ୍ରସାଦ, ଲଳିତ କୁମାର ଉପାଧ୍ୟାୟ, ଏସ.ଭି. ସୁନୀଲ(ଉପ-ଅଧିନାୟକ), ମନଦୀପ ସିଂ, ଆକାଶଦୀପ ସିଂ, ରମଣଦୀପ ସିଂ, ସିମରନଜିତ ସିଂ।
ଭାରତୀୟ ମହିଳା ହକି ଦଳ
ସବିତା(ଉପ-ଅଧିନାୟିକା), ରଜଜନୀ ଏଟିମାରପୁ, ଦୀପ୍ ଗ୍ରେସ୍ ଏକ୍କା, ଗୁରଜିତ କୌର, ରୀନା ଖୋଖର, ସାଲିମା ଟେଟେ, ସୁଶିଲା ଚାନୁ ପୁଖରାମବାମ, ନିକ୍କି ପ୍ରଧାନ, ମୋନିକା, ନେହା ଗୋୟଲ, ଲିଲିମା ମିଞ୍ଜ, ନମିତା ଟପ୍ପୋ, ରାଣୀ ରାମପାଲ (ଅଧିନାୟିକା), ବନ୍ଦନା କାଟରିୟା, ନଭନୀତ କୌର, ଲାଲରେମସିଆମି, ନଭଜୋତ କୌର, ଶର୍ମିଳା ଦେବୀ।
