କଟକ ଅଫିସ,୨୫ା୩: ନୂତନ ମୋଟର ଯାନ ଆଇନ୍ କଡ଼ାକଡ଼ି ଭାବେ ଲାଗୁ ହେବା ପରେ ରାଜ୍ୟର ପ୍ରାୟତଃ ସମସ୍ତ ଆଞ୍ଚଳିକ ପରିବହନ କାର୍ଯ୍ୟାଳୟ(ଆର୍ଟିଓ)ରେ ଲୋକମାନଙ୍କ ଭିଡ ଦେଖିବାକୁ ମିଳିଥିଲା। କରୋନା ଭୂତାଣୁର ଭୟାବହତା ସତ୍ତ୍ବେ ଆର୍ଟିଓଗୁଡିକରେ ଭିଡ଼ କମି ନ ଥିଲା। ଏହାକୁ ନେଇ ରାଜ୍ୟ ପରିବହନ ପ୍ରାଧିକରଣ(ଏସ୍ଟିଏ) ଚିନ୍ତା ପ୍ରକାଶ କରି ପୂର୍ବରୁ ଡ୍ରାଇଭିଂ ଲାଇସେନ୍ସ(ଡିଏଲ୍) ଏବଂ ଲନର୍ସ ଲାଇସେନ୍ସ(ଏଲଏଲ୍) ପରୀକ୍ଷା ବନ୍ଦ କରିଦେଇଥିଲା। କିନ୍ତୁ ଅନ୍ଲାଇନ୍ରେ ଆବେଦନ ଚାଲୁ ରହିଥିଲା। ବର୍ତ୍ତମାନ ସାରା ରାଜ୍ୟରେ ଲକ୍ଡାଉନ୍ ଜାରି ହୋଇଥିଲେ ମଧ୍ୟ ଅନ୍ଲାଇନ୍ରେ ଲୋକମାନେ ଆବେଦନ କରୁଥିଲେ। ଏଣୁ ଅନ୍ଲାଇନ୍ ଆବେଦନକୁ ବନ୍ଦ କରିବାକୁ ରାଜ୍ୟ ପରିବହନ କମିଶନର୍ ତଥା ଏସ୍ଟିଏର ଅଧ୍ୟକ୍ଷ ସଞ୍ଜୀବ ପଣ୍ଡା ନିର୍ଦ୍ଦେଶ ଦେଇଛନ୍ତି। ଆସନ୍ତା ୩୧ତାରିଖ ପର୍ଯ୍ୟନ୍ତ ଏହି ସୁବିଧା ବନ୍ଦ ରହିବ। ତେବେ ଆର୍ଟିଓଗୁଡିକରେ ନୂତନ ଗାଡ଼ି ପଞ୍ଜୀକରଣ, ପର୍ମିଟ୍ ପ୍ରଦାନ ଏବଂ ଫିଟ୍ନେସ୍ ପ୍ରମାଣପତ୍ର ପ୍ରଦାନ ସେବା ଜାରି ରହିବ। କିନ୍ତୁ ମଧ୍ୟାହ୍ନ ସାଢେ ୧୨ଟା ପର୍ଯ୍ୟନ୍ତ ହିଁ ଆର୍ଟିଓ ପରିସରରେ ଥିବା କ୍ୟାଶ୍ କାଉଣ୍ଟର୍ ଖୋଲା ରହିବ ବୋଲି ଜଣାପଡିଛି।
