ପୁରୀ ଅଫିସ,୫ା୮: ପୁରୀ ସରକାରୀ ମହିଳା ମହାବିଦ୍ୟାଳୟରେ ଅତିଥି ଅଧ୍ୟାପକ ଚୟନ ପ୍ରକ୍ରିୟାରେ ବ୍ୟାପକ ଅନିୟମିତତା ହୋଇଥିବା ନେଇ କେତେଜଣ ପ୍ରାର୍ଥୀ ମୁଖ୍ୟମନ୍ତ୍ରୀ ଓ ଉଚ୍ଚଶିକ୍ଷା ବିଭାଗ ମନ୍ତ୍ରୀଙ୍କୁ ଅଭିଯୋଗ କରିଥିଲେ। ଏପରିକି ଚୟନ ପ୍ରକ୍ରିୟାକୁ ନେଇ ବହୁ ପ୍ରାର୍ଥୀ ସୂଚନା ଅଧିକାର ଆଇନ(ଆରଟିଆଇ)ରେ କଲେଜକୁ ରିପୋର୍ଟ ମାଗିଛନ୍ତି। ଅନ୍ୟପଟେ ଚୟନ ପ୍ରକ୍ରିୟା ସମ୍ପର୍କରେ ସବିଶେଷ ରିପୋର୍ଟ ପ୍ରଦାନ କରିବାକୁ ଉଚ୍ଚ ଶିକ୍ଷା ବିଭାଗ କଲେଜ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି। ଘଟଣାର ତଦନ୍ତ ଲାଗି ଉଚ୍ଚ ଶିକ୍ଷା ବିଭାଗ ଆଞ୍ଚଳିକ ଶିକ୍ଷା ନିର୍ଦ୍ଦେଶାଳୟକୁ ନିର୍ଦ୍ଦେଶ ଦେଇଥିବା ଜଣାପଡିଛି। ଏନେଇ କଲେଜ ଅଧ୍ୟକ୍ଷା ଅଞ୍ଜଳି କୁମାରୀ ଶୁକ୍ଳା କୁହନ୍ତି, ଚୟନ ପ୍ରକ୍ରିୟାରେ କୌଣସି ଅନିୟମିତତା କରାଯାଇନାହିଁ। ଏହା ସମ୍ପର୍ଣ୍ଣ ମିଥ୍ୟା। ଚୟନ ପ୍ରକ୍ରିୟା ରାଜ୍ୟ ସରକାରଙ୍କ ପକ୍ଷରୁ ଆସିଥିବା ଗାଇଡ ଲାଇନ ଅନୁସାରେ କରାଯାଇଛି। ଯେ କୌଣସି ତଦନ୍ତକୁ ସାମ୍ନା କରିବାକୁ ମୁଁ ପ୍ରସ୍ତୁତ ରହିଛି। ଅନ୍ୟପଟେ ଚୟନ ପ୍ରକ୍ରିୟାରେ ଚଞ୍ଚକତା କରାଯାଇଥିବା ନେଇ କେତେଜଣ ଛାତ୍ରୀ ଶନିବାର ଅପରାହ୍ନରେ କଲେଜ ଆଗରେ ବିକ୍ଷୋଭ କରିବା ସହ କଲେଜ ଅଧ୍ୟକ୍ଷାଙ୍କୁ ଘେରିଥିଲେ। କଲେଜରେ ହୋ ହଲ୍ଲା କରିଥିଲେ। ତେବେ ଚୟନ ପ୍ରକ୍ରିୟାରେ କୌଣସି ଚଞ୍ଚକତା କରାଯାଇ ନ ଥିବା ଅଧ୍ୟକ୍ଷା ଶୁକ୍ଳା ପିଲାମାନଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡିଥିଲା। ଏନେଇ ଉଚ୍ଚଶିକ୍ଷା ବିଭାଗର ଦୃଷ୍ଟି ଆକର୍ଷଣ କରାଯିବ ବୋଲି କେତେଜଣ ଛାତ୍ରୀ ଗଣମାଧ୍ୟମ ଆଗରେ କହିଛନ୍ତି। ଅନ୍ୟପଟେ ଚୟନ ପ୍ରକ୍ରିୟାରୁ ବାଦ ପଡିଥିବା ପ୍ରାର୍ଥୀ ନିଯୁକ୍ତିକୁ ରଦ୍ଦ କରାଯିବା ସହ ଏହାର ଯାଞ୍ଚ ଲାଗି ଦାବି କରିଛନ୍ତି।
ପ୍ରକାଶ ଯେ, ଗତ ଜୁନ ୨୬ରୁ ଜୁଲାଇ ୨ତାରିଖ ପର୍ଯ୍ୟନ୍ତ ୧୫ଟି ବିଭାଗରେ ଅତିଥି ଅଧ୍ୟାପକ ପଦବୀ ଲାଗି ଚୟନ କରାଯାଇଥିଲା। ପ୍ରାୟ ୧୦୦ରୁ ଊର୍ଦ୍ଧ୍ୱ ଆଶାୟୀ ପ୍ରାର୍ଥୀ ଅଂଶଗ୍ରହଣ କରିଥିଲେ। ଅଧ୍ୟାପକ ଚୟନରେ ବ୍ୟାପକ ଦୁର୍ନୀତି କରାଯାଇ ଅନଭିଜ୍ଞ ଏବଂ ଅଯୋଗ୍ୟ ପ୍ରାର୍ଥୀଙ୍କୁ ଚୟନ କରାଯାଇଛି ବୋଲି ବାଦ ପଡିଥିବା ପ୍ରାର୍ଥୀ ଦାବି କରିଛନ୍ତି। ପୂର୍ବରୁ ଏଠାରେ ୨୦୧୮-୧୯ ଶିକ୍ଷା ବର୍ଷରେ ଅତିଥି ଅଧ୍ୟାପକ ଭାବେ ନିଷ୍ଠାର ସହିତ ନିଜ ଅଧ୍ୟାପନା କରିଛନ୍ତି, ସେମାନଙ୍କୁ ଏହି ଚୟନ ପ୍ରକ୍ରିୟାରୁ ବାଦ ଦିଆଯାଇଛି ବୋଲି ଉଚ୍ଚଶିକ୍ଷା ବିଭାଗକୁ ଦେଇଥିବା ଦାବିପତ୍ରରେ ଉଲ୍ଲେଖ ରହିଛି।
