ପୁରୀ ଅଫିସ,୧୬ା୪: କରୋନା ଟାଣିଛି ଲକ୍ଷ୍ମଣରେଖା। ବାଇଶିପାହାଚ ଡେଇଁପାରୁନି ଭକ୍ତ। ହେଲେ ଅନେକ ଶ୍ରଦ୍ଧାଳୁଙ୍କ ମନ ବୁଝୁନି। କାଳିଆ ସାଆନ୍ତଙ୍କୁ କିଏ ସ୍ବପ୍ନରେ ଦେଖୁଛନ୍ତି ତ ଆଉ କିଏ ଭାବ ଭକ୍ତିରେ ହଜି ଯାଉଛନ୍ତି। ଏମିତି ଉଦାହରଣ ଅନେକ ରହିଛି, ଯେଉଁଥିପାଇଁ ସକାଳେ ଶ୍ରୀମନ୍ଦିର ଆଖପାଖରେ ଘେରା ପକାଉଛନ୍ତି ଅନେକ ଭକ୍ତ। କରୋନା କଟକଣା ଥିଲେ ବି ଛୁଟି ଆସୁଛନ୍ତି ସିଂହଦ୍ୱାରକୁ। ଦୁଇହାତ ଟେକି ପତିତପାବନଙ୍କୁ ଦର୍ଶନ କରୁଛନ୍ତି। କାହାର ଆଖିରୁ ଲୁହଧାର ବି ଗଡ଼ିଯାଉଛି। ଏମିତି ଚିତ୍ର ପ୍ରତ୍ୟହ ସକାଳେ ସିଂହଦ୍ୱାରରେ ଦେଖିବାକୁ ମିଳୁଛି। ତେବେ ବୁଧବାର ସକାଳେ ଶ୍ରୀମନ୍ଦିର ପଶ୍ଚିମଦ୍ୱାରରେ ଏମିତି ଜଣେ ନିଆରା ଭକ୍ତଙ୍କୁ ଦେଖିବାକୁ ମିଳିଥିଲା, ଯିଏ ସୁଦୂର ଢେଙ୍କାନାଳରୁ ବାଇକ୍ରେ କାଳିଆ ପାଇଁ ଆଣିଥିଲେ ତୁଳସୀ ଓ ଫୁଲ।
ଲୀଳାମୟ ଠାକୁର ଶ୍ରୀଜଗନ୍ନାଥଙ୍କୁ ରସିକ ରାଜ କୁହାଯାଏ। ତାଙ୍କର ବିଭିନ୍ନ ନୀତି ଓ ବେଶରେ ଭିନ୍ନ ଭିନ୍ନ ରଙ୍ଗ ଓ ବାସ୍ନାର ଫୁଲ ଲାଗିଥାଏ। ଶ୍ରୀମନ୍ଦିରରେ ହେଉ କି ପହଣ୍ଡିରେ ଅବା ରଥ ଉପରେ ଫୁଲରେ ସୁସଜ୍ଜିତ ହୋଇ ଭକ୍ତଙ୍କୁ ଦର୍ଶନ ଦିଅନ୍ତି। ତୁଳସୀ ଓ ଦୟଣା ପ୍ରିୟ ଠାକୁର ସେ। ତାଙ୍କ ପୂଜାରେ ତୁଳସୀ, ମସ୍ତକରେ ତୁଳସୀ ଆଉ ମହାପ୍ରସାଦରେ ବି ତୁଳସୀ। ସେଇଥିପାଇଁ ତ ମହାପ୍ରଭୁଙ୍କ ଟାହିଆ, ଟୋପର, ଗୁଣା, ନାକଚଣା ସମେତ ପ୍ରତିଟି ପୁଷ୍ପାଳଙ୍କାରରେ ତୁଳସୀ ବ୍ୟବହୃତ ହୋଇଥାଏ। ଠାକୁରଙ୍କ ଛଡ଼ା ତୁଳସୀ ପାଇଗଲେ ଭକ୍ତ ମନ ପୂରିଉଠେ। ତୁଳସୀରେ ପୂଜା, ତୁଳସୀରେ ଉପଚାର, ତୁଳସୀରେ ଆଜ୍ଞା ଓ ତୁଳସୀରେ ଅନୁରାଗ। ମହାପ୍ରଭୁଙ୍କର ଏମିତି ନୀତି ନାହିଁ, ଯେଉଁଠି ତୁଳସୀ ନ ଥାଏ। ହେଲେ ଏବେ କରୋନା କଟକଣା ଯୋଗୁ ଶ୍ରଦ୍ଧାଳୁ ଆସୁ ନ ଥିବାରୁ ଫୁଲ, ତୁଳସୀର ଅଭାବ ଦେଖାଦେଇଛି। ଏକଥା ଜାଣିବା ପରେ ଢେଙ୍କାନାଳରୁ ବୁଧବାର ଫୁଲ, ତୁଳସୀ ଆଣି ଶ୍ରୀକ୍ଷେତ୍ର ଆସିଥିଲେ ଚିଣ୍ଟୁବାବା। ଏକ ବାଇକ୍ରେ ହୁଣ୍ଡି ଲଦି ସେଥିରେ ଫୁଲ ଓ ତୁଳସୀ ଭର୍ତ୍ତି କରି ପହଞ୍ଚିଥିଲେ ପଶ୍ଚିମ ଦ୍ୱାରରେ। ସେବକମାନଙ୍କୁ ଦେବା ପରେ ଭାବ ଭକ୍ତିରେ ଚିଣ୍ଟୁବାବାଙ୍କ ଆଖିରୁ ଝରି ପଡ଼ିିଥିଲା ଦୁଇଟୋପା ଲୁହ। ଏ ସମ୍ପର୍କରେ ଚିଣ୍ଟୁବାବା କହିଛନ୍ତି, ସେ ଗତ କିଛିବର୍ଷ ହେଲା ମହାପ୍ରଭୁଙ୍କ ପାଇଁ ଫୁଲ, ତୁଳସୀ ଆଣି ଯୋଗାଇ ଦେଉଛନ୍ତି। କିନ୍ତୁ ଲକ୍ଡାଉନ ପରେ ତାଙ୍କର ଆସିବା ସମ୍ଭବ ହେଲା ନାହିଁ। ଗଣମାଧ୍ୟମରେ ମହାପ୍ରଭୁଙ୍କୁ ଫୁଲ, ତୁଳସୀ ନିଅଣ୍ଟ ପଡୁଥିବା ଜାଣିବା ପରେ ତାଙ୍କ ମନ ଅଥୟ ହେଲା। କିପରି ଫୁଲ, ତୁଳସୀ ନେଇ ଶ୍ରୀକ୍ଷେତ୍ର ଯିବେ ସେହି ଚିନ୍ତାରେ ରହିଥିଲେ। ଏକଘରିଆ ଗ୍ରାମବାସୀ ଏବଂ ଶରଣ ଶ୍ରୀକ୍ଷେତ୍ର ବିକାଶ ପରିଷଦ ସହଯୋଗରେ ସେ ଢେଙ୍କାନାଳ ଜିଲାପାଳଙ୍କଠାରୁ ଏକ ପାସ୍ ପାଇବା ପରେ ବୁଧବାର ବାଇକ୍ରେ ଫୁଲ, ତୁଳସୀ ଆଣି ମହାପ୍ରଭୁଙ୍କୁ ସମର୍ପି ଦେଇଥିଲେ। ତେବେ ପାସ୍ ଗୋଟିଏ ଦିନ ପାଇଁ ବୈଧ ଥିବାରୁ ମନ ଉଣା କରିଛନ୍ତି ଚିଣ୍ଟୁବାବା। ପୁନଶ୍ଚ ଢେଙ୍କାନାଳ ଜିଲାପାଳଙ୍କୁ ଅନୁରୋଧ କରିବେ। ତାଙ୍କୁ ପାସ୍ ମିଳିଲେ ସେ ପୁଣି ଏହି ଲକ୍ଡାଉନ ସମୟରେ ଫୁଲ, ତୁଳସୀ ଆଣି ଆସିବେ ବୋଲି କହିଛନ୍ତି। ମହାପ୍ରଭୁଙ୍କ ଉପରେ ତାଙ୍କର ଆସ୍ଥା ଓ ବିଶ୍ୱାସ ରହିଛି। ଏହି ଛୋଟିଆ ସେବା ପାଇଁ ମହାପ୍ରଭୁ ତାଙ୍କୁ ନିଶ୍ଚିତ ସହାୟ ହେବେ ବୋଲି ଚିଣ୍ଟୁବାବା କହିଛନ୍ତି।
